लातूर : उदगीर पाठोपाठ लातूर शहरात कोरोनाचा प्रादुर्भाव वाढत आहे. लेबर कॉलनी, एमआयडीसी भागात रुग्ण आढळून आल्यानंतर शुक्रवारी मोती नगर येथील एकाच कुटुंबातील 9 जणांना तर देसाई नगर येथील एकास कोरोनाची लागण झाली आहे. त्यामुळे 10 नव्या रुग्णांची भर पडली असून हे सर्व लातूर शहरातील आहेत.
एकीकडे जिल्हा प्रशासन नव्या रुग्णांची भर पडू नये म्हणून विविध उपाययोजना राबवत आहे. दोन दिवसांपूर्वी पालकमंत्री अमित देशमुख यांनी देखील रुग्णांमध्ये वाढ होऊ नये, यासंदर्भात बैठक घेतली होती. मात्र, जिल्ह्यात आणि लातूर शहरात रुग्ण वाढतच आहेत. शुक्रवारी जिल्ह्यातून 50 व्यक्तींचे अहवाल तपासणीसाठी दाखल झाले होते. पैकी 38 जणांचे अहवाल हे निगेटिव्ह असून 10 जणांचे अहवाल पॉझिटिव्ह तर दोघांचे अनिर्णित आहेत.
गुरुवारी मोती नगरमध्ये एक रुग्ण आढळून आला होता त्यांच्याच संपर्कातील हे नवे नऊ रुग्ण आहेत. तर एक नव्याने देसाई नगरातील आहे. उदगीर, निलंगा, चाकूर येथील सर्व अहवाल हे निगेटिव्ह आहेत. त्यामुळे उदगीर पाठोपाठ लातूर शहरात कोरोनाचा कहर पाहवयास मिळत आहे. लेबर कॉलनी, एमआयडीसीमधील हडको परिसर तसेच मोती नगर हे कंटेन्मेंट झोन घोषित केले असून या ठिकाणच्या नागरिकांना मनपाच्या वतीने अत्यावश्यक सेवा पुरवल्या जात आहे.
जिल्ह्यात एकूण कोरोनाबाधित रुग्णांचा आकडा 130 वर गेला असून 61 रुग्ण बरे होऊन घरी परतले आहेत. तर 66 जणांवर उपचार सुरू असून आतापर्यंत तिघांचा मृत्यू झाला आहे.
