छत्रपती संभाजीनगर (औरंगाबाद) Supriya Sule News : पंतप्रधान नरेंद्र मोदी यांनी महिला सुरक्षा आणि युवकांना व्यसन करू नका असा सल्ला दिला, मात्र तो नेमका कोणासाठी होता? गृहमंत्री देवेंद्र फडणवीस यांना उद्देशून तर हा सल्ला नव्हता ना? असा खोचक टोला राष्ट्रवादीच्या शरद पवार गटाच्या सुप्रिया सुळे यांनी लगावला आहे. तसंच फडणवीस पत्रकार परिषदेत म्हणाले होते की, "आम्ही ड्रग्ज प्रकरणात राजकारण आणणार नाही." पण त्यांनी काहीच केलं नाही. ते स्वतः म्हणाले होते "मी ड्रग्जचे रॅकेट एक्सपोज करेल" मग करा ना, सर्वांना कळू द्या, यामागं कोण आहे? ललित पाटील पळून गेला, त्याचं काय केलं. तसंच "ड्रग्ज प्रकरणात भाजपाचा हात असू शकतो," असा संशयही त्यांनी यावेळी व्यक्त केला.
राज्यात गुन्हेगारी वाढली : "राज्यात गुन्हेगारी वाढली असून पुण्यासारख्या शहरात कोयता गँग पाहायला मिळाली. बाहेरुन अनेक मुलं-मुली शिक्षणासाठी वेगवेगळ्या शिक्षण संस्थांमध्ये येतात. अनेकांचं पालकत्व माझ्याकडंच आहे. मात्र, गुन्हेगारी वाढल्यानं आता कोणीही सुरक्षित नाही. हे ट्रिपल इंजिन खोके सरकार फक्त कार्यक्रमात व्यस्त असतं. राज्यातील परिस्थिती पंतप्रधानांना सांगण्यात आली नसावी. पंतप्रधान, मुख्यमंत्री, उपमुख्यमंत्री नाशिकला होते. मात्र, कांदा प्रश्नावर ते काहीच बोलले नाहीत. राज्यात पेपर फुटले हे देखील त्यांना माहिती नसावं. पक्ष आणि घर फोडण्यात व्यस्त असल्यानं यांना सुरक्षिततेचं काहीच वाटत नाही", अशी टीका सुप्रिया सुळेंनी केली.
घाटी रुग्णालयात दिली भेट : गुरुवारी रात्री घाटी रुग्णालयात दोन गटांमध्ये तुफान हाणामारी झाली. या हाणामारीमध्ये एका डॉक्टरच्या डोक्याला रॉड लागला. त्यामुळं संपूर्ण राज्यातून या प्रकरणावर संताप व्यक्त केला जात आहे. याच पार्श्वभूमीवर सुप्रिया सुळे यांनी घाटी रुग्णालयाला भेट देत जखमी डॉक्टर महिलेची विचारपूस केली. त्यानंतर त्यांनी पत्रकारांशी संवाद साधला. सदरील घटनेप्रकरणी भाष्य करत त्या म्हणाल्या की, "घाटी रुग्णालयात घडलेली घटना चुकीची आहे. शहरात गुन्हेगारी वाढली असून या प्रकरणी मी उद्या उपमुख्यमंत्री देवेंद्र फडणवीस आणि मंत्री हसन मुश्रीम यांच्या भेटीची वेळ मागणार आहे. त्यांनी उत्तर दिलं पाहिजे. डॉक्टरांवर झालेला हल्ला निंदनीय असून गृह मंत्रालयाच्या निष्काळजीपणामुळं हे होत आहे" असा आरोपही त्यांनी केला. तसंच "महाराष्ट्रात गृह विभागाला गुन्हेगारी थांबवणं शक्य नसेल, तर देशाचे केंद्रीय गृहमंत्री अमित शहांना महाराष्ट्रात यंत्रणा पाठवा अशी विनंती करणार आहे" असल्याचंही त्या म्हणाल्या.
हेही वाचा -
