अहमदनगर- शेवगाव तालुक्यातील पूर्व भागात बालमटाकळी येथे काल (शनिवार) मध्यरात्रीच्या सुमारास काही अज्ञात चोरट्यांनी धुमाकूळ घातला. चार ठिकाणी घरफोडी करत सोन्याच्या दागिन्यांसह रोख रक्कम घेऊन चोरटे पसार झाले. तर तीन ठिकाणी घरांचे कुलूप तोडून चोरी करण्याचाही प्रयत्न केला. परंतु, नागरिकांच्या सतर्कतेमुळे चोरी करण्याचा डाव फसला. मात्र, या घटनांमुळे गावात भीती निर्माण झाली आहे.
या घटनेबाबत सविस्तर माहिती अशी, की बालमटाकळी येथील वस्तीत राहणाऱ्या शिवाजी राजपूरे यांच्या राहत्या घरी दाराचे कुलूप तोडून चोरट्यांनी घरात प्रवेश केला. घरातील कपाटातून एकूण २६ ग्रॅम सोन्याचे दागिने लंपास करत घरातील साहित्याची नासधूस केली. तसेच गावातील राम मंदिराशेजारी असलेले मंदाबाई शिवाजी साबळे यांचे बंद घर फोडून चोरट्यांनी ६ ग्रॅम सोन्याचे दागिने व सहा हजार रोख रक्कम घेऊन घरातील सर्व सहित्याची नासधूस केली. यानंतर बालंबिका देवी मंदिराच्या काही अंतरावर असलेले गोरख बापूराव तिडके यांचेही घर फोडून दीड हजारांची रोख रक्कम व घरातील साहित्य घेऊन चोरटे पसार झाले. तर गावातील अन्य तीन ठिकाणी घरफोडी करण्याचा प्रयत्न केला. परंतु, नागरिकांच्या सतर्कतेमुळे चोरी करण्याचा डाव फसला. हा सर्व प्रकार गावकऱ्यांच्या लक्षात आल्यानंतर गावात भीतीचे वातावरण पसरले होते.
बालमटाकळीसह परिसरातील सर्वसामान्य जनतेबरोबरच येथील मंदिरे, दुकाने, बाजारपेठ सुरक्षित नाहीत. मागील काही दिवसांपूर्वी देखील बालमटाकळी येथे श्री बालंबिका देवी मंदिर व हनुमान मंदिरातील दानपेटया चोरत चोरट्यांनी येथे धाडसी चोरी केली होती. त्याच घटनांचा अद्याप तपास लागला नसून पुन्हा येथे धाड़सी चोरी झाली आहे. त्यामुळे चोरट्यांनी देखील पोलीसांना एक प्रकारचे खुले आव्हान दिल्याचे चित्र या भागात निर्माण झाले आहे. या भागात वाहन चोरी, घरफोड़ी, मोबाईल चोरी, या घटनांमध्ये वाढ झाल्याने नागरिंकामध्ये भय पसरले आहे. त्यामुळे पोलीस प्रशासनाच्या कार्यक्षमतेबद्दल नागरिकांमध्ये रोष निर्माण झाला असून दबक्या आवाजात लोक पोलीस प्रशासनाविरोधात चर्चा करीत आहेत.
