ओवल - भारतीय संघाचा सलामीवीर फलंदाज के एल राहुलवर आयसीसीने दंडात्मक कारवाई केली आहे. इंग्लंडविरुद्ध ओवल कसोटी सामन्याच्या तिसऱ्या दिवशी राहुलने आयसीसी आचारसंहितेचा भंग केला. यामुळे त्याची सामन्यातील 15 टक्के फी कापण्यात येणार आहे. राहुलने आयसीसी आचारसंहिता कलम 2.8 चे उल्लंघन केले. या कलमाअंतर्गत आंतरराष्ट्रीय सामन्यात पंचाच्या निर्णयावर नाराजी दर्शवल्याने कारवाई करण्यात येते. सामना शुल्काच्या 15 टक्के दंडाव्यतिरिक्त राहुलच्या शिस्तीसंबंधी रेकॉर्डमध्ये एक डिमेरिट पाँईटदेखील जोडला गेला आहे. गेल्या 24 महिन्यांच्या कालावधीत हा त्याचा पहिला डिमेरिट पाँईट आहे.
नेमकी काय आहे घटना
ही घटना शनिवारी भारताच्या दुसऱ्या डावातील 34 व्या षटकातील आहे. डीआरएस घेतल्यानंतर झेलच्या निर्णयावर राहुलने असहमती दर्शवली. घडले असे की, जेम्स अँडरसनच्या गोलंदाजीवर जॉनी बेअयस्टोने त्याचा झेल घेतला. तेव्हा मैदानावरील पंचांनी त्याला नॉटआऊट ठरवले. तेव्हा इंग्लंडचा कर्णधार जो रूटने रिव्ह्यू घेतला आणि तिसऱ्या पंचांनी राहुलला बाद ठरवले. या निर्णयावर राहुल नाराज दिसला. यामुळे त्याच्यावर कारवाई करण्यात आली.
के एल राहुलने आपली चूक कबुल केली आहे आणि आयसीसी एलिट पॅनलचे मॅच रेफरी ख्रिस बाँड यांच्या कारवाईचा त्याने स्वीकार केला आहे. यामुळे सुनावणीची गरज भासली नाही. मैदानावरील पंच रिचर्ड इलिंगवर्थ आणि एलेक्स वार्फ, तिसरे पंच मायकल गॉफ आणि माइक बर्न्स यांनी दंडात्मक कारवाई केली. दरम्यान, या कलमाअंतर्गत खेळाडूची 50 टक्के कापली जाऊ शकते. तसेच त्या खेळाडूला एक किंवा दोन डिमेरिट पाँईट दिले जातात. एखाद्या खेळाडूला जर 24 महिन्यात चार किंवा त्यापेक्षा जास्त डिमेरिट गुण मिळाले तर तेव्हा त्याला एक कसोटी सामना किंवा दोन एकदिवसीय किंवा दोन टी-20 सामन्यातून निलंबन केले जाते.
हेही वाचा - सचिन तेंडुलकर पुन्हा ताडोबाच्या प्रेमात
हेही वाचा - Eng vs Ind : रोहित शर्माच्या शतकी खेळीच्या जोरावर भारताची मोठ्या आघाडीकडे वाटचाल
