पुणे - फेसबुकचा योग्य वापर केल्यास काय होऊ शकते याचे उदाहरण सांगवी पोलीस ठाण्यातील कर्मचारी आणि अधिकाऱ्यांनी दिले आहे. पोलिसांनी फेसबुकच्या आधारे पिता-पुत्राची भेट घडवली आहे. झेकरिया चेरीयन (५०) आणि राजेश चेरीयन असे पिता पुत्राचे नाव आहे. १५ दिवसांपूर्वी झेकरिया चेरीयन हे त्यांच्या मुलाच्या घराच्या परिसरातून बेपत्ता झाले होते. मात्र, फेसबुकच्या माध्यमातून ते पुन्हा आपल्या मुलाला शोधू शकले आहेत.
झेकरिया हे नुकतेच केरळ येथून पिंपरी-चिंचवड येथे मुलाकडे राहण्यासाठी आले आहेत. त्यांना या परिसराची जास्त माहिती नसून त्यांना मराठी आणि हिंदी देखील व्यवस्थित बोलता येत नव्हते. १५ दिवसांपूर्वी झेकरिया हे घराच्या बाहेर पडले आणि काही अंतरावर गेल्यानंतर घराचा पत्ता विसरले. त्यामुळे ते भलत्याच ठिकाणी गेले. त्यांनी घराचा शोध घेतला मात्र, त्यांना घर सापडत नव्हते. ते पायी चालत चालत सांगवी परिसरात तब्बल १० ते १२ किलोमीटर लांब आले. तर मुलगा राजेश तिकडे त्याचा शोध घेत होता. त्याने यासंबंधी निगडी पोलीस ठाण्यात वडील बेपत्ता झाल्याची तक्रारही नोंदवली होती.
शुक्रवारी दुपारी झेकरिया यांना अज्ञात व्यक्तीने पोलीस ठाण्यासमोर सोडले. पोलिसांनी झेकरिया यांच्याकडे चौकशी केली असता, त्यांनी फक्त आपल्या मुलाचे राजेश ऐवढंच नाव घेतले. त्यांना मराठी येत नसल्यामुळे पोलिसांनी त्यांची भाषा समजणाऱ्या व्यक्तीशी त्यांचे बोलणे करुन दिल्यानंतर सर्व हकीकत समोर आली. पोलीस कर्मचारी दत्ता नांगरे यांनी फेसबुकवर राजेश नावाच्या व्यक्तीचा शोध घेतला. त्यामधून त्यांचा मुलाचा शोध घेऊन संपर्क करत पिता पुत्राची भेट घडवली. यावेळी वडिलांना मुलाला पाहून अश्रू अनावर झाले होते. वरिष्ठ पोलीस निरीक्षक प्रभाकर शिंदे, पोलीस उपनिरीक्षक विनोद शेंडकर, श्रीकांत पाटील आणि पोलीस नाईक दत्ता नांगरे यांनी ही कामगिरी पार पाडली.