नाशिक - आज(28 सप्टेंबर) सकाळपासून नाशकात पावसाची संततधार सुरू आहे, गंगापूर धरण क्षेत्रात सुरू असलेल्या पावसामुळे धरण 99 टक्के भरले आहे. त्यामुळे धरणातून गोदावरी नदीत 3 हजार क्यूसेक वेगाने पाण्याचा विसर्ग सुरू आहे. त्यामुळे गोदावरी नदीच्या पाण्याची पातळी वाढली असून, नदी काठच्या नागरिकांना सतर्कतेचा इशारा देण्यांत आला आहे.
पश्चिम बंगालच्या उपसागरामधील गुलाब चक्रीवादळामुळे राज्यात जोरदार पावसाचा इशारा हवामान खात्याने दिला होता. त्या अनुषंगाने आज सकाळपासून नाशिकमध्ये पावसाची संततधार सुरू आहे. त्यामुळे जनजीवन काहीसे विस्कळीत झाले आहे. नाशिक जिल्हा आपत्ती व्यवस्थापन प्राधिकरणाचे मुख्य कार्यकारी अधिकारी भागवत डोईफोडे यांनी नागरिकांना सतर्कतेचा इशारा दिला आहे.
हेही वाचा - मुलींची शपथ घेऊन सांगतो, मी काहीही चुकीचं केलं नाही, ईडीच्या चौकशीला सामोरे जाणार - अनिल परब
- नाशिक जिल्ह्यात आतापर्यंत 966 मिलीमीटर पाऊस -
नाशिक जिल्ह्यात आतापर्यंत 966 मिलीमीटर पावसाची नोंद करण्यात आली आहे. इगतपुरीत आतापर्यंत सर्वाधिक 3097 मिलीमीटर पाऊस झाला आहे. त्यापाठोपाठ पेठ तालुक्यात 2278 मिलीमीटर पावसाची नोंद झाली आहे.
- जिल्ह्यातील या धरणातून पाण्याचा विसर्ग सुरू -
नाशिक जिल्ह्यातील एकूण 24 मोठी आणि मध्यम धरण प्रकल्प आहेत. यातील बहुतांश धरणे 90 टक्केहून अधिक भरली आहेत. या धरणांपैकी गंगापूर, काश्यपी, आळंदी, वाघड, पुणेगाव, दारणा, भावली, करंजगाव, नाग्यासक्या, चनकापूर, हरणबारी, नादुरमध्यमेश्वर, केळझर धरणातून पाण्याचा विसर्ग कमी अधिक प्रमाणात सुरू आहे.
हेही वाचा - चिमुकल्याने देवदूतासारखे येऊन वाचवले तिघांचे प्राण, मात्र तलावात बुडून एकाचा मृत्यू
