मुंबई - शहरी नक्षलवाद आणि माओवाद्यांशी संबंधाप्रकरणी अटक करण्यात आलेले प्राध्यापक आनंद तेलतुंबडे यांनी ( Anand Teltumbde file bail application in Mumbai High Court ) मुंबई उच्च न्यायालयात जामीन अर्ज दाखल केला आहे. आजारी असलेल्या 92 वर्षीय आईला भेटण्यासाठी अंतरिम जामीन तेलतुंबडे यांनी दाखल केला आहे. यावर न्यायमूर्ती एसएस शिंदे यांच्या नेतृत्वाखालील खंडपीठासमोर बुधवारी या प्रकरणाची सुनावणी होणार आहे.
गेल्या वर्षी नोव्हेंबर महिन्यात आपला भाऊ आणि जहाल नक्षली मिलिंद तेलतुंबडेच्या मृत्यूचं कारण देत प्रा. आनंद तेलतुंबडेंनी जामीन अर्ज दाखल केला होता. गडचिरोलीतील कोर्चीमध्ये स्पेशल फोर्ससोबत झालेल्या चकमकीत 26 नक्षली ठार झाले होते. यामध्ये मिलिंद तेलतुंबडेचाही समावेश आहे.
31 डिसेंबर 2017 आणि 1 जानेवारी 2018 यादरम्यान भीमा कोरेगाव येथील झालेल्या हिंसाचाराच्या पार्श्वभूमीवर शहरी नक्षलवाद आणि भीमा कोरेगाव हिंसाचार प्रकरणी पुणे पोलिसांनी गुन्हा दाखल केला होता. त्यानंतर प्रा. आनंद तेलतुंबडेंना मागील वर्षी अटक करण्यात आली होती. तेव्हापासून तेलतुंबडे हे नवी मुंबईतील तळोजा कारागृहात आहेत.
