राज्यात कोरोनाची दुसरी लाट नाही, आरोग्यमंत्री राजेश टोपे यांचे स्पष्टीकरण

मुंबई - राज्य मंत्रिमंडळ बैठकीत आज कोविड नियंत्रणासंदर्भात सादरीकरण झाले. राज्यातील सहा जिल्ह्यांमध्ये सहा ठिकाणी टेलिमेडिसीन सुरू करण्यात येणार आहे. लवकरच टेलिमेडिसीन योजना ३६ जिल्ह्यांमध्ये लागू केली जाईल. राज्यात कोरोनाची दुसरी लाट नाही, अशी माहिती आरोग्यमंत्री राजेश टोपे यांनी पत्रकारांशी बोलताना दिली.

टोपे म्हणाले, राज्यात ऑक्सिजनचा तुटवडा नाही. एक हजार टन ऑक्सिजन निर्मिती होत आहे, तर कोविडची नियंत्रण केंद्रांची मागणी फक्त ८०० टन आहे. याबद्दलची व्यवस्था करण्यात येणार असून त्यांचा तुटवडा जाणवू दिला नाही. ऑक्सिजन वाहतुकीला आता रुग्णवाहिकांचा दर्जा दिला आहे, माहिती आरोग्यमंत्री राजेश टोपे यांनी दिली. लिक्विड ऑक्सिजनसाठी जिल्हाधिकार्‍यांना डीपीडीसीचा फंड वापरण्याची परवानगी राज्य सरकारने दिली आहे. ग्रामीण भागात ड्युरो आणि जम्बो सिलिंडर वाढवण्याचे आदेश देण्यात आले आहेत, असे आरोग्यमंत्र्यांनी सांगितले.

राज्याच्या मंत्रिमंडळाची लवकरच टास्क फोर्स सोबत बैठक होणार आहे. ऑक्सिजन पुरवठा ऑडिट करण्यात येईल. शहरांबरोबरच ग्रामीण भागातही आता डॅशबोर्ड उभारण्यात येणार आहे. मृत्यूदर वाढू नये, यासाठी सर्व दक्षता घेतली जात आहे. मृत्यूदर कमी होण्यासाठी आपण प्रयत्न करतोय. बरे होण्याचा दरही 70 टक्के आहे. राज्याचा मृत्यूदर हा गुजरातपेक्षा कमी आहे, अशी माहितीही आरोग्यमंत्री टोपे यांनी दिली.