मुंबई - मुंबईमध्ये २६ जुलै २००५ रोजी जलप्रलय आला होता. यावेळी प्लास्टिक पिशव्यांमुळे गटारे नाल्यातील पाण्याचा निचरा झाला नसल्याचे समोर आले होते. यासाठी राज्य सरकारने सिंगल युज प्लास्टिकवर बंदी घालण्याचा निर्णय घेतला. ( Mumbai BMC ) जून २०१८ मध्ये राज्य सरकारने सिंगल युज प्लास्टिक वर बंदी घातली. ५० मायक्रॉनपेक्षा कमी जाडीच्या प्लॅस्टिक पिशव्या विक्री, वापर करणारे व उत्पादन करणार्‍यांवर कारवाई करण्याचा निर्णय मुंबई महानगरपालिकेने घेतला. महानगरपालिकेच्या लायसन्स विभागाकडून जून २०१८ ते मार्च २०२० पर्यंत प्रतिबंधित प्लास्टिकवर कारवाई करण्यात आली.
६७० किलोवर प्लास्टिक जप्त - मुंबईमध्ये मार्च २०२० मध्ये कोरोना विषाणूचा प्रसार सुरु झाल्याने ही कारवाई बंद करण्यात आली होती. आता कोरोनाचा प्रसार कमी झाल्यावर १ जुलैपासून पुन्हा प्लास्टिक विरोधी कारवी तीव्र करण्यात आली आहे. मॉल, मार्केट, दुकाने, फेरीवाले अशा ठिकाणी कारवाईला सुरुवात करण्यात आली आहे. १ जुलै ते ३१ जुलै या महिनाभरात १८ हजारापेक्षा अधिक ठिकाणी भेटी देऊन केलेल्या तपासणीत तब्बल ६७० किलोवर प्लास्टिक जप्त केले. या धडक कारवाईत १७७ जणांकडून ८ लाख ८० हजार रुपयाचा दंड वसूल करण्यात आला आहे. ही कारवाई आणखी तीव्र केली जाणार असल्याचे उपायुक्त संजोग कबरे यांनी सांगितले.
या प्लास्टिकवर बंदी - ५० मायक्रॉन प्लॅस्टिकपासून बनवल्या जाणार्‍या पिशव्या ( हँडल असलेल्या व नसलेल्या) प्लॅस्टिकपासून बनवण्यात येणार्‍या व एकदाच वापरून टाकून दिल्या जाणार्‍या (डिस्पोजेबल) वस्तू उदा. ताट, कप, प्लेट, ग्लास, चमचे इत्यादी, हॉटेलमध्ये अन्नपदार्थ पॅकेजिंगसाठी वापरल्या जाणार्‍या प्लॅस्टिकच्या वस्तू, द्रव्य पदार्थ साठवण्यासाठी वापरात येणारे कप/पाऊच, सर्व प्रकारचे अन्नपदार्थ, धान्य इत्यादी साठवण्यासाठी व पॅकेजिंगसाठी वापरले जाणारे प्लास्टिक आणि प्लॅस्टिक वेष्टन यांचा समावेश आहे.
अशी केली जातेय कारवाई - उत्पादक, साठेदार, पुरवठादार, विक्रेते यांनी अधिसूचनेचे उल्लंघन केल्यास त्यांच्यावर महाराष्ट्र विघटनशील व अविघटनशील कचरा (नियंत्रण) अधिनियम २००६ च्या कलम ९ अन्वये प्रथम गुन्‍ह्यासाठी ५,००० रुपये, दुसऱ्या गुन्‍ह्यासाठी १०,००० रुपये आणि त्यानंतरच्या गुन्‍ह्यासाठी ३ महिन्यांपर्यंत तुरुंगवास व २५,००० रुपये पर्यंत दंड वसूल करण्यात येत आहे. संबंधितांनी कायद्याचे पालन करुन सहकार्य करावे, असे आवाहन महानगरपालिकेने केले आहे.
हेही वाचा - Malegaon Blast Case: मालेगाव बॉम्बस्फोट प्रकरणातील दुचाकीची न्यायालयाकडून पाहणी
