मुंबई - मुंबईतील गोवालिया टँक ( Gowalia Tank ) म्हणजेच ऑगस्ट क्रांती मैदान ( August Kranti Maidan ) येथे सुमारे २०० वर्षांपूर्वी वाघाचे दर्शन झाले होते. या या पार्श्वभूमीवर बृहन्मुंबई महानगरपालिका शाळांमधील विद्यार्थ्यांमध्ये निसर्गाची आवड निर्माण व्हावी, निसर्ग सान्निध्यामध्ये त्यांना भटकंती करता यावी तसेच अन्नसाखळीतील महत्त्वपूर्ण घटक असलेल्या वाघाची माहिती व्हावी, या उद्देशाने बृहन्मुंबई महानगरपालिकेच्या शाळांमध्ये ‘वाघोबा क्लब’ स्थापन करण्यात येईल, अशी घोषणा महाराष्ट्र राज्याचे पर्यावरण, पर्यटन व राजशिष्टाचार मंत्री तथा मुंबई उपनगर जिल्ह्याचे पालकमंत्री आदित्य ठाकरे ( Aaditya Thackeray Cabinet Minister of Tourism and Environment ) यांनी केली आहे.
मुंबईत व्याघ्र दर्शनाला २०० वर्षे पूर्ण -
मुंबईतील गोवालिया टँक म्हणजेच ऑगस्ट क्रांती मैदान येथे सुमारे २०० वर्षांपूर्वी वाघाचे दर्शन झाले होते. या घटनेला आज (दिनांक ९ फेब्रुवारी २०२२) २०० वर्षे पूर्ण झाली आहेत. व्याघ्र दर्शनाच्या या २०० व्या वर्धापन दिनानिमित्त खाकी हेरिटेज फाउंडेशन, किड्स फॉर टायगर्स आणि बॉम्बे नॅचरल हिस्ट्री सोसायटी यांच्या संयुक्त विद्यमाने गोवालिया टँक येथे आज बृहन्मुंबई महानगरपालिका शाळेतील विद्यार्थ्यांसाठी आयोजित चित्रकला स्पर्धेत विद्यार्थ्यांना मार्गदर्शन करताना पालकमंत्री ठाकरे यांनी ही घोषणा केली. विद्यार्थ्यांनी काढलेल्या चित्रांचे आदित्य ठाकरे यांनी निरीक्षण केले. तसेच गोवालिया टँक येथे ठेवण्यात आलेल्या वाघाच्या प्रतिकृतीचे त्यांनी अनावरण देखील केले.
हेही वाचा : Community Facilitation Centers : देशातील सर्वात मोठ्या सार्वजनिक सुविधा केंद्राचे लोकार्पण
‘वाघोबा क्लब’ स्थापन करणार -
पर्यावरण मंत्री आदित्य ठाकरे विद्यार्थ्यांशी संवाद साधताना म्हणाले की, दक्षिण मुंबईत वाघ दिसल्याची शेवटची नोंद २०० वर्षांपूर्वी करण्यात आली होती. ९ फेब्रुवारी १८२२ रोजी मलबार हिलवरून हा वाघ खाली आला आणि त्याने गोवालिया टँक येथील तळ्यामध्ये तहान भागवली. त्यानंतर तो हर्मिटेज आणि प्रोस्पेक्ट लॉजमध्ये असणाऱया टेकडीवर पसार झाला. त्याच्या पायाचे ठसे दुसऱया दिवशी सकाळीसुद्धा स्पष्ट दिसत होते. मुंबईतील प्राणी, पक्षी, कीटक आणि सागरी जीवसृष्टी आणि एकूणच निसर्ग, त्यातील विविध जीवघटक, त्यांचे परस्परांवर अवलंबून असलेले जीवित्व याविषयी विद्यार्थ्यांना माहिती होणे आवश्यक आहे. त्यातूनच निसर्ग, पर्यावरण, आपल्यासोबत इतर घटकांचे सजीव सृष्टीतील अस्तित्व याचे महत्त्व विद्यार्थ्यांना कळेल, त्यातून निसर्गाविषयीच्या अभ्यासाची गोडी वाढेल, या उद्देशाने महानगरपालिका शाळेतील मुलांसाठी ‘वाघोबा क्लब’ स्थापन करण्यात येणार असल्याची माहिती आदित्य ठाकरे यांनी यावेळी दिली.
