रुरकी (उत्तराखंड): आयकर अधिकाऱ्यांच्या वेशात आलेल्या भामट्यांनी एका उद्योगपतीच्या घरात फिल्मी स्टाईलमध्ये घुसून घरात ठेवलेली 20 लाखांची रोकड पळवली. दुसरीकडे, आपल्यासोबत झालेल्या फसवणुकीची माहिती उद्योजकाला समजल्यानंतर घटनेच्या 2 दिवसानंतर या प्रकरणाची माहिती पोलिसांना देण्यात आली. व्यापाऱ्याने दिलेल्या तक्रारीवरून पोलिसांनी गुन्हा दाखल करून तपास सुरू केला आहे.
घरात घेतली कसून झडती: मिळालेल्या माहितीनुसार, गंगानहर कोतवाली भागातील इंदिरा बिहार कॉलनी हे सुनहरा रोडवरील खाद्यपदार्थ बनवणाऱ्या कारखान्याचे मालक सुधीर कुमार जैन यांचे घर आहे. बुधवारी पांढऱ्या i20 कारमधून पाच जण त्यांच्या निवासस्थानी आले आणि त्यांनी स्वतःची आयकर अधिकारी म्हणून ओळख करून दिली. घरात प्रवेश केल्यानंतर घरातील सदस्यांची ५ जणांकडे चौकशी करून घराची कसून झडती घेण्यात आली.
वीस लाख घेऊन झाले पसार: यावेळी त्यांना घरात सुमारे वीस लाख रुपयांची रोकड आढळून आली, जी त्यांनी जमा केली आणि तेथून निघून गेले. एवढेच नाही तर घरातील सदस्यही बनावट आयकर अधिकार्‍यांना पाहुण्यांप्रमाणे दारात सोडायला आले आणि हस्तांदोलन करून त्यांचा निरोपही घेतला. इन्कम टॅक्सच्या छाप्यापूर्वी घरातील सर्व सदस्य बराच वेळ घाबरले होते आणि त्यांनी आपल्या जवळच्या व्यक्तींशी संपर्क साधला आणि त्यांना या प्रकरणाची माहिती दिली.
अन् छापा बनावट असल्याचे झाले स्पष्ट: त्यांनी याबाबत आयकर कार्यालयात चौकशी केली असता, त्यांना प्राप्तिकरने छापा टाकला नसल्याचे समोर आले, त्यानंतर त्यांना ही फसवणूक लक्षात आली. घटनेच्या दोन दिवसांनंतर फसवणूक झालेल्या व्यापाऱ्याने गंगनाहर कोतवाली पोलिसात तक्रार देण्यात आली. तक्रारीच्या आधारे पोलिसांनी संबंधित कलमांतर्गत अज्ञात चोरट्यांविरुद्ध गुन्हा दाखल केला असून, त्यासोबतच त्यांनी या प्रकरणाचा तपास सुरू केला आहे.
अनेक ठिकाणी होताहेत बनावट छापे: अभिनेता अक्षय कुमारच्या स्पेशल २६ चित्रपटात अशीच एक बनावट रेड टाकण्यात आल्याचे दाखवण्यात आले आहे. हा चित्रपट पाहून देशात अनेक ठिकाणी अशाच प्रकारच्या बनावट रेड झाल्याचेही उदाहरणे आहेत. मध्यंतरी गुजरातमधील एका व्यापाऱ्याच्या घरी अशाच प्रकारे बनावट छापा टाकण्यात आला होता. त्यानंतर तीन दिवसांनी हा छापा बनावट असल्याचे स्पष्ट झाले होते. तसेच उत्तरप्रदेशातही एका व्यापाऱ्यांवर असा छापा टाकून त्याला लुटण्यात आले होते.
