कांकेर (छत्तीसगड) Chhattisgarh Election 2023 : तृतीय पंथीयांना मुख्य प्रवाहात आणण्यासाठी देशभरात विविध उपक्रम राबवले जात आहेत. याचीच प्रचिती मंगळवारी छत्तीसगडमध्ये आली. छत्तीसगडमध्ये विधानसभा निवडणुकीदरम्यान एक वेगळचं चित्र पाहायला मिळालं. येथील कांकेर जिल्ह्यातल्या पखांजुरमध्ये ट्रान्सजेंडरसाठी खास मतदान केंद्र उभारण्यात आलं आहे. 'रेनबो मतदान केंद्र' असं त्याचं नाव. विशेष म्हणजे, या मतदान केंद्राचे सुरक्षा कर्मचारीही ट्रान्सजेंडरच आहेत. मतदानाच्या दिवशी सकाळीच ट्रान्सजेन्डर या रेनबो मतदान केंद्रावर मतदानासाठी पोहोचले होते.
फुलांचा वर्षाव करून स्वागत : या रेनबो मतदान केंद्रांवर जेव्हा ट्रान्सजेन्डर मतदानासाठी आले तेव्हा मतदार मित्रांनी त्यांचं फुलांचा वर्षाव आणि पुष्पगुच्छ देऊन स्वागत केलं. त्यानंतर त्यांना मतदान केंद्रावर नेण्यात आलं. तिथे या ट्रान्सजेन्डर मतदारांनी आपला मतदानाचा हक्क बजावला. या वेळी या मतदारांंचा चेहरा अभिमानानं फुलला होता. त्यांनी या उपक्रमाबद्दल जिल्हा प्रशासनाचं आभार मानलं आहे.
रेनबो मतदान केंद्राची गरज का : तृतीय लिंग समुदायाला स्पेशल वाटावं आणि लैंगिक समानतेचा संदेश मिळावा या उद्देशानं निवडणूक आयोगानं छत्तीसगडमध्ये एक नवीन पुढाकार घेतला आहे. निवडणूक आयोगानं अंतरागढ विधानसभेतील पखंजूर येथे देशातील पहिलं रेनबो मतदान केंद्र उभारलं. हे मतदान केंद्र इंद्रधनुष्याच्या सात रंगांनी सजवण्यात आलं आहे. ट्रान्सजेन्डर समुदायाला इंद्रधनुष्याच्या सात रंगानी दर्शवल्या जातं. त्यामुळे या केंद्राला सात रंगात बनवण्यात आलं आहे. या केंद्रांतर्गत ८ तृतीयपंथी मतदार आहेत. रेनबो मतदान केंद्राचं वैशिष्ट्य म्हणजे, या केद्रांची सुरक्षा बस्तर फायटर्सचे ७ ट्रान्सजेंडर सुरक्षा कर्मचारी करतील.
हे ही वाचा :
