തിരുവനന്തപുരം : മന്ത്രി എംബി രാജേഷിനെ രൂക്ഷമായ ഭാഷയില്‍ അധിക്ഷേപിച്ച് പ്രതിപക്ഷ നേതാവ് വിഡി സതീശൻ. ബജറ്റ് ചർച്ചയ്ക്കിടെയാണ് മന്ത്രിയെ പേരെടുത്തുപറഞ്ഞ് പ്രതിപക്ഷ നേതാവ് വിമർശിച്ചത്. കേന്ദ്ര ബജറ്റിനെതിരായ വിമർശനം താൻ കൃത്യമായി ഉന്നയിച്ചിട്ടുണ്ട്. സ്‌പീക്കർ കസേരയിൽ നിന്ന് താഴെയിറങ്ങി ഇരുന്നയാള്‍ അതിലും തറയാവരുതെന്നായിരുന്നു മന്ത്രിക്കെതിരായ അധിക്ഷേപ പരാമര്‍ശം.
നേരത്തെ നിയമസഭയിൽ സംസാരിച്ചപ്പോൾ കേന്ദ്ര ബജറ്റ് സംബന്ധിച്ച് പ്രതിപക്ഷ നേതാവ് ഒരു വിമർശനവും ഉന്നയിച്ചിരുന്നില്ലെന്ന് മന്ത്രി എംബി രാജേഷ് പറഞ്ഞിരുന്നു. ഈ വിമർശനത്തിനാണ് പ്രതിപക്ഷ നേതാവ് മറുപടി നൽകിയത്. കേന്ദ്ര സർക്കാരിനെതിരെ കൃത്യമായ നിലപാടാണ് കോൺഗ്രസ് എടുത്തിട്ടുള്ളത്. കേന്ദ്ര ബജറ്റിനെതിരായ വിമർശനം താൻ കൃത്യമായി ഉന്നയിച്ചിട്ടുണ്ട്. മന്ത്രി അത് കാണാതെ പോയതാണോ എന്നറിയില്ല. മുകളിലെ സ്‌പീക്കർ കസേരയിൽ നിന്ന് താഴെ ഇറങ്ങി ഇരുന്നയാളാണ് രാജേഷ്. അതിലും തറയായിട്ട് മന്ത്രി മാറരുതെന്നും പ്രതിപക്ഷ നേതാവ് പറഞ്ഞു.
'അന്തസിന് നിരക്കാത്ത പ്രസ്‌താവന': പ്രതിപക്ഷ നേതാവിന്‍റേത് നിയമസഭയുടെ അന്തസിന് നിരക്കാത്ത പരാമർശമാണ് എന്നായിരുന്നു എംബി രാജേഷിന്‍റെ മറുപടി. കേന്ദ്ര ബജറ്റ് നടന്ന ദിവസം പ്രതിപക്ഷ നേതാവിന്‍റെ ഫേസ്ബുക്ക് പേജിൽ കശ്‌മീരിൽ നിന്നുള്ള ഒരു ചിത്രം മാത്രമാണ് ഉണ്ടായിരുന്നത്. വസ്‌തുതാപരമായി അക്കാര്യം ചൂണ്ടിക്കാട്ടിയതിന് സഭയുടെ അന്തസിന് നിരക്കാത്ത മറുപടി പറഞ്ഞത് ശരിയായില്ല. സ്‌പീക്കറുടെ കസേരയേയും മന്ത്രിസ്ഥാനത്തേയും അപമാനിക്കുന്ന തരത്തിലാണ് സതീശൻ സംസാരിച്ചതെന്നും എംബി രാജേഷ് പറഞ്ഞു. ഇക്കാര്യം പരിശോധിക്കാമെന്നായിരുന്നു സ്‌പീക്കർ എഎൻ ഷംസീറിൻ്റെ മറുപടി.
പരാമര്‍ശം പിന്‍വലിച്ചു : മന്ത്രി എംബി രാജേഷിനെതിരായ പരാമർശത്തിൽ ഖേദം പ്രകടിപ്പിച്ച് പ്രതിപക്ഷ നേതാവ്. പരാമർശം പിൻവലിക്കുന്നു. ബജറ്റ് ചർച്ചയ്ക്ക് ധനമന്ത്രി കെഎൻ ബാലഗോപാൽ സംസാരിക്കാൻ എഴുന്നേറ്റപ്പോഴാണ് പ്രതിപക്ഷ നേതാവ് പ്രസ്‌താവനയില്‍ ഖേദം പ്രകടിപ്പിച്ചത്.
