88 പുതിയ വാഹനങ്ങൾ, ശക്തി കൂട്ടി കേരള ഫയർഫോഴ്‌സ്

തിരുവനന്തപുരം: കേരള ഫയർഫോഴ്‌സിന് കരുത്തായി പുതിയ വാഹനങ്ങൾ. വിവിധ വിഭാഗങ്ങളിലായി 88 പുതിയ വാഹനങ്ങളാണ് സേനയുടെ ഭാഗമാകുന്നത്.

വ്യവസായശാലകളിലും, ഓയിൽ റിഫൈനറികളിലും തീപിടിത്തം ഉണ്ടാകുമ്പോൾ തീ അണയ്ക്കാൻ ഫലപ്രദമായ 10 ഫോം ടെൻഡർ വാഹനങ്ങൾ, വിവിധ ആവശ്യങ്ങൾക്ക് ഉപയോഗിക്കാവുന്ന 30 മൾട്ടി യൂട്ടിലിറ്റി വാഹനങ്ങൾ, 30 ജീപ്പ്,18 ആംബുലൻസ് എന്നിവയാണ് പുതിയതായി എത്തിയിരിക്കുന്നത്. പുതിയ വാഹനങ്ങളുടെ ഫ്ലാഗ് ഓഫ് മുഖ്യമന്ത്രി പിണറായി വിജയൻ നിർവഹിച്ചു.

4250 ലിറ്റർ വെള്ളവും 250 ലിറ്റർ ഫോമും വഹിക്കാൻ ശേഷിയുള്ളവയാണ് പുതിയ ഫോം ടെൻഡർ വാഹനങ്ങൾ. ഏത് പ്രതികൂല സാഹചര്യത്തിലും തകർന്ന പാതകളിലും മറ്റും ഉപയോഗിക്കാൻ കഴിയുന്നവയാണ് മൾട്ടി യൂട്ടിലിറ്റി വെഹിക്കിളുകൾ. പ്രകൃതി ദുരന്തങ്ങൾ നേരിടുന്നതിൽ ഇവ സേനയ്ക്ക് കരുത്ത് പകരും. 12 കോടിയോളം രൂപയാണ് വാഹനങ്ങളുടെ ചെലവ്.