തിരുവനന്തപുരം: സിഐ സുധീര്‍ ഉത്തരവാദിത്തത്തോടെ പ്രതികരിച്ചെങ്കില്‍ മൊഫിയ ആത്മഹത്യ ചെയ്യില്ലായിരുന്നുവെന്ന് കെപിസിസി പ്രസിഡന്‍റ് കെ സുധാകരന്‍. ഭരണകൂടത്തില്‍ നിന്ന് പ്രതീക്ഷിക്കാത്ത നിലപാടാണ് സര്‍ക്കാര്‍ സ്വീകരിച്ചത്. സംഭവത്തെ ന്യായീകരിച്ചത് പരിതാപകരമാണ്.
സത്രീ സംരക്ഷണത്തിന് മതില്‍ കെട്ടിയ പാര്‍ട്ടിയാണ് സിപിഎം. സ്ത്രീ സംരക്ഷണം വേണ്ട, ദ്രോഹിക്കാതെയിരുന്നൂടെയെന്നും സുധാകരന്‍ പറഞ്ഞു. എണ്ണിയാലൊടുങ്ങാത്ത ആത്മഹത്യയും കൊലപാതകവുമാണ് നടന്നത്.
സിഐയെ സ്ഥലം മാറ്റി ആദ്യം സംരക്ഷിച്ചു. നിസംഗനും വായ തുറക്കാത്ത ഒരു മുഖ്യമന്ത്രിയുമായി പിണറായി മാറരുത്. കേസില്‍ ജുഡീഷ്യല്‍ അന്വേഷണം പ്രഖ്യാപിക്കാന്‍ തടസമെന്തെന്നും സുധാകരന്‍ ചോദിച്ചു.
കേസില്‍ കോണ്‍ഗ്രസ് നേതാവിനെതിരെ ഉയര്‍ന്ന ആരോപണം പരിശോധിക്കും. റിപ്പോര്‍ട്ട് പരിശോധിച്ച ശേഷം തുടര്‍ നടപടി സ്വീകരിക്കും. കോണ്‍ഗ്രസ് ആലുവയില്‍ നടത്തിയത് അഹിംസ സമരമാണെന്നും സുധാകരന്‍ പറഞ്ഞു.
