പത്തനംതിട്ട: പമ്പ നദിയിൽ അടിക്കടി വെള്ളപ്പൊക്കം ഉണ്ടാകുന്ന സാഹചര്യത്തിൽ അടിയന്തര രക്ഷാപ്രവർത്തനങ്ങൾ ആവശ്യമായി വന്നാൽ എങ്ങനെ നേരിടും എന്ന് പരിശോധിക്കുന്നതിനായി ഫയർ ആൻഡ് റെസ്ക്യൂ സർവീസിന്‍റെ നേതൃത്വത്തിൽ എൻഡിആർഎഫിന്‍റെ സഹകരണത്തോടെ മോക്ഡ്രിൽ നടത്തി.
പമ്പ നദിയിൽ കുളിച്ചു കൊണ്ടിരുന്ന അയ്യപ്പഭക്തൻ ചുഴിയിലും ഒഴുക്കിലും പെട്ട് മുങ്ങിത്താഴ്ന്നപ്പോള്‍ ഫയർ ആന്‍ഡ് റെസ്ക്യൂ സർവീസിന്‍റെ സ്‌കൂബ ഡൈവേഴ്‌സ്‌ രക്ഷാപ്രവർത്തനം നടത്തി പ്രാഥമിക ശുശ്രൂഷ നൽകി ആശുപത്രിയിൽ എത്തിക്കുന്നതായിരുന്നു മോക്ക് ഡ്രിൽ. സ്ഥലത്ത് തടിച്ച് കൂടിയ അയ്യപ്പഭക്തർ ആദ്യം പരിഭ്രാന്തരായെങ്കിലും പിന്നീട് മോക്ഡ്രിൽ ആണെന്ന് മനസിലായതോടെ ആശങ്ക അകന്നു.
Also Read: കരിമല വഴിയുള്ള കാനന പാത തുറക്കുന്നതിന് നടപടി തുടങ്ങിയതായി ശബരിമല എ.ഡി.എം
ജലാശയ അപകടങ്ങൾ ഉണ്ടായാൽ സ്വീകരിക്കേണ്ട പ്രാഥമിക രക്ഷാപ്രവർത്തനങ്ങളെക്കുറിച്ച് അയ്യപ്പ ഭക്തൻമാർക്ക് ഫയർഫോഴ്‌സ്‌ ബോധവൽക്കരണ ക്ലാസ് നടത്തി. ഫയർ ആന്‍ഡ് റെസ്ക്യൂ സർവീസ് പമ്പ സ്പെഷ്യൽ ഓഫീസർ എ.ടി. ഹരിദാസ്, സബ് ഇൻസ്പെക്ടർ സാബു സെബാസ്‌റ്റ്യൻ എന്നിവർ നേതൃത്വം നല്‍കി.
