കോഴിക്കോട്: മുസ്ലിംലീഗ് സ്ഥാനാർഥി പട്ടികയിൽ സർപ്രൈസ് എൻട്രിയായി കോൺഗ്രസ് നേതാവ് ദിനേശ് പെരുമണ്ണയുടെ പേര് പ്രഖ്യാപിച്ചത് മുതൽ ത്രില്ലിലാണ് സ്ഥാനാർഥിയും കുന്ദമംഗലം മണ്ഡലവും. കഴിഞ്ഞ രണ്ട് തവണയും പി ടി എ റഹീമിന് മുമ്പിൽ കൈവിട്ട മണ്ഡലം പിടിക്കുക എന്നത് മാത്രമാണ് ഇനി ലക്ഷ്യം. കോഴിക്കോട്ടെ ജില്ല കോൺഗ്രസുകാരനായ ദിനേശ് പെരുമണ്ണയെ യുഡിഎഫ് സ്വതന്ത്രനായാണ് മുസ്ലിം ലീഗ് കുന്ദമംഗലം മണ്ഡലത്തിൽ രംഗത്തിറക്കുന്നത്.
കഴിഞ്ഞ തവണ മണ്ഡലത്തിൽ യുഡിഎഫ് സ്ഥാനാർഥിയായി ടി സിദ്ദീഖ് ആയിരുന്നു മത്സരിച്ചിരുന്നത്. എന്നാൽ വിജയിച്ചില്ല. കഴിഞ്ഞ രണ്ട് തവണയായി പിടിഎ റഹീമിലൂടെ ഇടതുപക്ഷം വിജയിക്കുന്ന കുന്ദമഗലം മണ്ഡലം തിരിച്ചു പിടിക്കുക എന്ന ലക്ഷ്യത്തില്‍ വലിയ പരീക്ഷണത്തിനാണ് മുസ്ലിം ലീഗ് ഒരുങ്ങിയിരിക്കുന്നത്. മുൻ ജില്ല പഞ്ചായത്ത് അംഗം കൂടിയായ ദിനേശിന് മണ്ഡലത്തിൽ ഏറെ സ്വാധീനമുണ്ട്. 2006ൽ ലീഗ് സ്ഥാനാർഥി യു സി രാമനിലൂടെ നേടിയ വിജയം ഇത്തവണ ദിനേഷ് പെരുമണ്ണയിലൂടെ ആവര്‍ത്തിക്കാന്‍ കഴിയുമെന്നാണ് മുസ്ലിം ലീഗും യുഡിഎഫും പ്രതീക്ഷിക്കുന്നത്.
