പിണറായിക്ക് എതിരെ മത്സരിച്ച ഡിസിസി ജനറല്‍ സെക്രട്ടറി സി രഘുനാഥ് കോൺഗ്രസ് വിട്ടു

C Raghunath Kannur: കോണ്‍ഗ്രസ് പാര്‍ട്ടിവിട്ട് കണ്ണൂർ ഡിസിസി ജനറല്‍ സെക്രട്ടറി സി രഘുനാഥ്. പാര്‍ട്ടി തന്നെ തഴയുകയാണെന്ന് വിമർശനം. യുഡിഎഫിന്‍റെ ജനവിചാരണ സദസിന് പോലും ക്ഷണിച്ചില്ലെന്നും കുറ്റപ്പെടുത്തല്‍.

കണ്ണൂര്‍: ധര്‍മ്മടത്ത് പിണറായി വിജയനെതിരെ മത്സരിച്ച കോണ്‍ഗ്രസ് നേതാവ് സി രഘുനാഥ് പാര്‍ട്ടി വിട്ടു. നിലവില്‍ കണ്ണൂര്‍ ഡിസിസി ജനറല്‍ സെക്രട്ടറിയാണ് സി രഘുനാഥ് (C Raghunath Quit Congress). പാര്‍ട്ടി തന്നെ തഴയുകയാണെന്നും നേതൃത്വവുമായി അഭിപ്രായ ഭിന്നതയുണ്ടെന്നും അതാണ് പാര്‍ട്ടി വിടാന്‍ കാരണമെന്നും അദ്ദേഹം പറഞ്ഞു. പാര്‍ട്ടി വിട്ടതിന് പിന്നാലെ ഡിസിസി നേതൃത്വത്തിനെതിരെ അതിരൂക്ഷ വിമര്‍ശനമാണ് സി രഘുനാഥ് നടത്തിയത്.

കഴിഞ്ഞ തവണ ധര്‍മ്മടത്ത് ഗതികെട്ട സ്ഥാനാര്‍ഥിയായിരുന്നു താന്‍ എന്ന് സി രഘുനാഥ് തുറന്നടിച്ചു. മാത്രമല്ല തെരഞ്ഞെടുപ്പ് കാലത്ത് കെപിസിസി പ്രസിഡന്‍റായിരുന്ന മുല്ലപ്പള്ളി രാമചന്ദ്രൻ തിരിഞ്ഞു പോലും നോക്കിയില്ലെന്ന് അദ്ദേഹം കുറ്റപ്പെടുത്തി. നിലവില്‍ കണ്ണൂര്‍ ഡിസിസി ഓഫിസ് ഒരു കറക്ക് കമ്പനിയുടെ കൈയിലാണ് (C Raghunath Kannur). പോകുന്നവരെല്ലാം പോകട്ടെയെന്ന എന്ന ചിന്തയാണ് നേതൃത്വത്തിനുള്ളത്. ഡിസിസിക്ക് പിന്നില്‍ വേട്ടക്കാരന്‍റെ മനസുള്ള നേതൃത്വമാണ്. ഡിസിസിയിൽ നിലവിലുള്ളവരില്‍ ഒരാളും സിപിഎം അക്രമം നേരിട്ടവരല്ലെന്നും പുതിയ ഡിസിസി നേതൃത്വം മനഃപൂർവ്വം തന്നെ തഴയുകയാണെന്നും സി രഘുനാഥ് പറഞ്ഞു (Congress Party In Kannur).

സൈബർ ആക്രമണം അതിരു കടക്കുകയാണ്. നിലവിലെ ഡിസിസി നേതൃത്വമാണ് കണ്ണൂർ മണ്ഡലത്തിൽ സതീശൻ പാച്ചേനിയുടെ പരാജയത്തിന് കാരണമെന്നും അദ്ദേഹം ചൂണ്ടിക്കാട്ടി. സുധാകരന്‍റെ ആളെന്ന് പറഞ്ഞു നടക്കുന്ന ചിലർ കപട മുഖങ്ങളാണെന്നും അവർ സുധാകരനെ പോലും അംഗീകരിക്കുന്നില്ലെന്നും ആദ്ദേഹം വ്യക്തമാക്കി (DCC General Secretary C Raghunath).

പിണറായി സർക്കാരിനെതിരെ യുഡിഎഫ് നടത്തിയ ജനവിചാരണ സദസിൽ തന്നെ ക്ഷണിച്ചില്ല. 2001 മുതൽ എല്ലാം പരിപാടികളിയും സജീവ സാന്നിധ്യമായിരുന്ന താന്‍. മൂന്ന് തെരഞ്ഞെടുപ്പുകളിൽ ധർമ്മടം മണ്ഡലത്തിൽ ചുമതലയും വഹിച്ചിരുന്നു. യുഡിഫ് ചെയർമാൻ കൂടിയായിരുന്നു താന്‍. ഇതൊന്നും നോക്കാതെ മനഃപൂർവ്വം തന്നെ തഴയുകയാണ്. നേതൃത്വത്തിന്‍റെ നിലപാടിൽ മനം മടുത്തു നൂറു കണക്കിന് പ്രവർത്തകർ മാറി നില്‍ക്കുന്നു. ഇതിന് പരിഹാരം ഉണ്ടാക്കുന്നില്ല. ഓരോ ജില്ലയിലും പാർട്ടി വിട്ടു പോകുന്നവരുടെ എണ്ണം കൂടുകയാണെന്നും രഘുനാഥ് വ്യക്തമാക്കി.

കെപിസിസി പ്രസിഡന്‍റ് സുധാകരന് (KPCC President K Sudhakaran) വിചാരിച്ചത് പോലെ തിളങ്ങാൻ സാധിച്ചില്ല. അത് എന്ത് കൊണ്ടാണെന്ന് അറിയില്ലെന്നും സി രഘുനാഥ് പറഞ്ഞു. കണ്ണൂർ കോർപറേഷൻ ഭരണത്തിനെതിരെ അഴിമതി ആരോപണം ഉന്നയിച്ചത്തോടെയാണ് സി രഘുനാഥ് പാർട്ടിക്ക് അനഭിമാനിതനായത്. പാർട്ടി വിട്ടെങ്കിലും തുടർ പ്രവർത്തനം എങ്ങനെയെന്നത് ആദ്ദേഹം വിശദീകരിച്ചില്ല. ഇക്കാര്യത്തില്‍ ഞായറാഴ്‌ച യോഗം ചേർന്ന് തീരുമാനം എടുക്കുമെന്നും സി രഘുനാഥ് കൂട്ടിച്ചേര്‍ത്തു.