എറണാകുളം : അവതാരകയെ അപമാനിച്ചെന്ന കേസില്‍ നടൻ ശ്രീനാഥ് ഭാസി അറസ്റ്റിൽ. മരട് പൊലീസാണ് നടനെ അറസ്റ്റ് ചെയ്‌തത്. യൂട്യൂബ് ചാനൽ അവതാരക നൽകിയ പരാതിയിലാണ് പൊലീസ് നടപടി.
അഭിമുഖത്തിനിടെ അധിക്ഷേപിച്ചുവെന്ന് ആരോപിച്ച് അവതാരക മരട് പൊലീസിൽ പരാതി നൽകിയിരുന്നു. ചട്ടമ്പി എന്ന ചിത്രത്തിന്‍റെ പ്രചരണത്തിന്‍റെ ഭാഗമായുള്ള അഭിമുഖത്തിനിടെയായിരുന്നു പരാതിക്ക് ആധാരമായ സംഭവം. നടനെതിരെ കേസെടുത്ത പൊലീസ് ഇന്ന് (26-09-22) രാവിലെ മരട് സ്റ്റേഷനിൽ ഹാജരാകാൻ നിർദേശിച്ചിരുന്നു.
എന്നാൽ നടൻ സാവകാശം തേടുകയും പൊലീസ് നാളെ ഹാജരാകാൻ നിർദേശിക്കുകയും ചെയ്‌തു. ഇതിനിടെ ഉച്ചയോടെ തന്നെ പൊലീസ് സ്റ്റേഷനിൽ ഹാജരായ ശ്രീനാഥ് ഭാസിയെ പ്രാഥമികമായി ചോദ്യം ചെയ്യുകയും അറസ്റ്റ് രേഖപ്പെടുത്തുകയുമായിരുന്നു.
സ്ത്രീത്വത്തെ അപമാനിക്കൽ, ലൈംഗിക ചുവയോടെ സംസാരിക്കൽ, പൊതുസ്ഥലത്ത് അസഭ്യം പറയൽ തുടങ്ങി ഇന്ത്യൻ ശിക്ഷാനിയമപ്രകാരം ജാമ്യം ലഭിക്കാവുന്ന വകുപ്പുകൾ പ്രകാരമുള്ള കേസാണ് നടനെതിരെ ചുമത്തിയത്.
