ന്യൂഡല്‍ഹി: ക്രൊയേഷ്യന്‍ പരിശീലകന്‍ ഇഗോർ സ്റ്റിമാകിന്‍റെ (Igor Stimac ) കീഴില്‍ വളര്‍ച്ചയുടെ പാതയിലാണ് ഇന്ത്യന്‍ ഫുട്‌ബോള്‍ ടീം (Indian football team). അടുത്തിടെ ഫിഫ ലോക റാങ്കിങ്ങില്‍ മുന്നിലുള്ള ടീമുകളെ ഉള്‍പ്പെടെ തോല്‍പ്പിച്ചുകൊണ്ട് ഇന്‍റർകോണ്ടിനെന്‍റൽ കപ്പും സാഫ് ചാമ്പ്യൻഷിപ്പും സ്റ്റിമാകിന്‍റെ കീഴിലായിരുന്നു ഇന്ത്യ നേടിയിരുന്നത്. എന്നാല്‍ ഇഗോർ സ്റ്റിമാകിനെ സംബന്ധിച്ച് ഏറെ ഗൗരവകരമായ ഒരു ആരോപണം പുറത്ത് വന്നിരിക്കുകയാണിപ്പോള്‍.
കഴിഞ്ഞ വര്‍ഷം ജൂണില്‍ നടന്ന ഏഷ്യന്‍ ചാമ്പ്യന്‍ഷിപ്പ് ക്വാളിഫയറില്‍ (Asian Cup qualifiers) അഫ്‌ഗാനിസ്ഥാനെതിരായ നിര്‍ണായക മത്സരത്തിനുള്‍പ്പെടെയുള്ള ഇന്ത്യന്‍ ടീമിനെ ഒരു ജ്യോതിഷിയുടെ നിര്‍ദേശ പ്രകാരമാണ് ഇഗോർ സ്റ്റിമാക് തിരഞ്ഞെടുത്തതെന്ന റിപ്പോര്‍ട്ടാണിത്. (coach Igor Stimac picked Indian football team on astrologer's advice). ഒരു ദേശീയ മാധ്യമമാണ് ഇതു സംബന്ധിച്ച റിപ്പോര്‍ട്ട് പുറത്ത് വിട്ടിരിക്കുന്നത്.
മത്സരത്തിന് മുന്നോടിയായി കളിക്കാരുടെ സാധ്യത ഇലവന്‍ സ്റ്റിമാക് ജ്യോതിഷിയ്‌ക്ക് അയച്ചുവെന്നാണ് റിപ്പോര്‍ട്ടില്‍ പറയുന്നത്. അഫ്‌ഗാനിസ്ഥാനെതിരെ ജൂണ്‍ 11-ന് മത്സരം നടക്കാനിരിക്കെ ഒമ്പതാം തീയതിയായിരുന്നു ക്രൊയേഷ്യന്‍ പരിശീലകന്‍ കളിക്കാരുടെ പട്ടിക ജ്യോതിഷിയ്‌ക്ക് കൈമാറിയത്.
ഒരോ താരങ്ങള്‍ക്കും നേരെ 'നല്ലത്', 'മികച്ച പ്രകടനം നടത്താന്‍ കഴിയും', 'അമിത ആത്മവിശ്വാസം ഒഴിവാക്കേണ്ടത് ആവശ്യമാണ്', 'ശരാശരിയിൽ താഴെയുള്ള ദിവസം', 'വളരെ നല്ല ദിവസം, പക്ഷേ ആക്രമണോത്സുകതയെ മറി കടക്കേണ്ടതുണ്ട്, 'പ്രസ്‌തുത ദിവസത്തേക്ക് ശുപാർശ ചെയ്യുന്നില്ല' എന്ന് എഴുതിക്കൊണ്ട് പട്ടിക തിരികെ അയച്ചുവെന്നും റിപ്പോര്‍ട്ടില്‍ വ്യക്തമാക്കുന്നുണ്ട്.
എന്നാല്‍ ജൂൺ 11-ന് മത്സരത്തിന് മുന്നോടിയായി പ്ലേയിങ് ഇലവന്‍ പ്രഖ്യാപിച്ചപ്പോള്‍ ജ്യോതിഷിയ്‌ക്ക് താല്‍പര്യമില്ലാത്ത് രണ്ട് 'പ്രശസ്‌തരായ' താരങ്ങളെ ഉള്‍പ്പെടുത്തിയെന്നും ഇതില്‍ പറയുന്നുണ്ട്.
2022 മെയ്, ജൂൺ മാസങ്ങളിൽ നൂറോളം സന്ദേശങ്ങള്‍ സ്റ്റിമാക്കും ജ്യോതിഷിയും കൈമാറിയിട്ടുണ്ട്. ഇക്കാലയളവില്‍ നാല് മത്സരങ്ങളാണ് ഇന്ത്യ കളിച്ചിരുന്നത്. ജോർദാൻ, കംബോഡിയ, അഫ്‌ഗാനിസ്ഥാൻ, ഹോങ്കോങ്‌ എന്നിവരായിരുന്നു എതിരാളികള്‍. ജോർദാനെതിരെ അന്താരാഷ്‌ട്ര സൗഹൃദ മത്സരവും ബാക്കി ടീമുകള്‍ക്കെതിരെ ഏഷ്യന്‍ കപ്പ് ക്വാളിഫയറിന്‍റെ ഭാഗവുമായാണ് ഇന്ത്യ കളിച്ചിരുന്നത്.
ഓരോ മത്സരങ്ങള്‍ക്ക് മുന്നോടിയായും സ്റ്റിമാക്കും ജ്യോതിഷിയും ബന്ധപ്പെട്ടിരുന്നു. താരങ്ങളുടെ പരിക്കിന്‍റെയും തന്ത്രങ്ങളുടേയും ഉള്‍പ്പെടെയുള്ള നിര്‍ണായക വിവരങ്ങളും ഇന്ത്യന്‍ പരിശീലകന്‍ ജ്യോതിഷിയുമായി പങ്കുവച്ചുവെന്നും റിപ്പോര്‍ട്ടില്‍ വ്യക്തമാക്കുന്നുണ്ട്. 2022 മെയ് മാസത്തിൽ ഇരുവരെയും ഇഗോർ സ്റ്റിമാകിനേയും ജ്യോതിഷിയേയും പരിചയപ്പെടുത്തിയത് താനാണെന്ന് ഓള്‍ ഇന്ത്യ ഫുട്‌ബോള്‍ ഫെഡറേഷന്‍റെ (All India Football Federation) അന്നത്തെ സെക്രട്ടറി ജനറൽ കുശാൽ ദാസ് സമ്മതിച്ചതായും റിപ്പോര്‍ട്ടില്‍ പറയുന്നുണ്ട്.
ALSO READ: Uefa Champions League Group A | യുണൈറ്റഡും ബയേണും നേർക്കുനേർ.. വെല്ലുവിളിയാകാൻ ഗലാട്ടസറെ
