ലാഹോര്‍: ന്യൂസിലന്‍ഡിനെതിരായ ഒന്നാം ഏകദിനത്തിലെ ഇരട്ട സെഞ്ചുറി പ്രകടനത്തിന് പിന്നാലെ ഇന്ത്യയുടെ യുവ ഓപ്പണര്‍ ശുഭ്‌മാന്‍ ഗില്ലിനെ വാനോളം പുകഴ്‌ത്തി പാകിസ്ഥാന്‍ മുന്‍ നായകന്‍ സല്‍മാന്‍ ബട്ട്. ഗില്ലിനെ ടെന്നീസ് ഇതിഹാസം റോജര്‍ ഫെഡററോട് ഉപമിച്ച സല്‍മാന്‍ ബട്ട് താരത്തിന്‍റെ ഷോട്ടുകള്‍ അവിശ്വസനീയമാണെന്നും പറഞ്ഞു. ഗില്‍ ഒരു അപൂര്‍വ പ്രതിഭയാണെന്നും മുന്‍ പാക് നായകന്‍ വ്യക്തമാക്കി.
"ഇംഗ്ലണ്ടില്‍ നടന്ന ലോക ടെസ്റ്റ് ചാമ്പ്യന്‍ഷിപ്പ് ഫൈനലില്‍ ന്യൂസിലന്‍ഡിനെതിരായ ഗില്ലിന്‍റെ കളി കണ്ടതുമുതല്‍ ഞാന്‍ അവന്‍റെ ആരാധകനായി മാറി. ഗില്ലിനെപ്പോലെ സാങ്കേതിക തികവോടെ ഈ പ്രായത്തില്‍ ഇത്രയും മികച്ച രീതിയില്‍ സ്ട്രോക്കുകള്‍ കളിക്കുന്ന താരങ്ങള്‍ അപൂര്‍വമാണ്. ഓരോ സ്ട്രോക്കുകളും പൂര്‍ത്തിയാക്കുന്ന രീതി അവനെ വ്യത്യസ്‌തനാക്കുന്നു.
സ്ട്രോക് പ്ലേ മാത്രമല്ല, റണ്‍ നേടുന്ന അവന്‍റെ രീതിയും വളരെ സവിശേഷമാണ്. അന്താരാഷ്‌ട്ര ക്രിക്കറ്റില്‍ ഇതുപോലെ ഏറെ താരങ്ങളെ നിങ്ങള്‍ക്ക് കാണാന്‍ കഴിയില്ല. പവര്‍ഹിറ്റര്‍മാരെക്കുറിച്ച് മാത്രമാണ് ടി20 ക്രിക്കറ്റിന്‍റെ ഈ കാലത്ത് ആളുകള്‍ സംസാരിക്കുന്നത്. എന്നാല്‍ ഫെഡററുടേത് പോലെ അവിശ്വസനീയമായ നിലവാരത്തിലും ടെച്ചിലുമാണ് ഗില്‍ തന്‍റെ ഷോട്ടുകള്‍ കളിക്കുന്നത്. അപൂര്‍വ പ്രതിഭയായ ഗില്ലില്‍ മഹാനായ കളിക്കാരന്‍റെ മിന്നലാട്ടങ്ങള്‍ ഇപ്പോഴെ കാണാന്‍ കഴിയും", സല്‍മാന്‍ ബട്ട് പറഞ്ഞു.
ന്യൂസിലന്‍ഡിനെതിരായ ഒരറ്റത്ത് വിക്കറ്റുകള്‍ വീഴുമ്പോഴും ഏത് ബോളര്‍ക്കെതിരെ എന്ത് ഷോട്ട് കളിക്കണമെന്നും ആരെ ആക്രമിക്കണമെന്നും ഗില്ലിന് കൃത്യതയുണ്ടായിരുന്നുവെന്നും ബട്ട് കൂട്ടിച്ചേര്‍ത്തു. ഹൈദരാബാദില്‍ നടന്ന മത്സരത്തില്‍ 149 പന്തില്‍ 208 റണ്‍സാണ് 23കാരനായ ഗില്‍ അടിച്ച് കൂട്ടിയത്. ഇതോടെ ഏകദിന ക്രിക്കറ്റില്‍ ഇരട്ട സെഞ്ചുറി നേടുന്ന ഏറ്റവും പ്രായം കുറഞ്ഞ താരമെന്ന റെക്കോഡും ഗില്‍ സ്വന്തമാക്കി.
മത്സരത്തിലെ പ്രകടനത്തോടെ ഏകദിനത്തില്‍ 1000 റണ്‍സെന്ന നാഴികകല്ല് പിന്നിടാനും ഗില്ലിന് കഴിഞ്ഞിരുന്നു. ഗില്ലിന്‍റെ 19ാമത്തെ ഇന്നിങ്‌സായിരുന്നവിത്. ഇതോടെ ഫോര്‍മാറ്റില്‍ ഏറ്റവും വേഗത്തില്‍ 1000 റണ്‍സ് നേടുന്ന ഇന്ത്യന്‍ താരമാവാനും ഗില്ലിന് കഴിഞ്ഞു. 24 ഇന്നിങ്‌സുകളില്‍ നിന്നും 1000 റണ്‍സ് നേടിയ വിരാട് കോലിയുടേയും ശിഖര്‍ ധവാന്‍റേയും റെക്കോഡാണ് ഗില്‍ തകര്‍ത്തത്. മത്സരത്തില്‍ ഇന്ത്യ 12 റണ്‍സിന് ജയം പിടിക്കുകയും ചെയ്‌തു.
