പൂനെ : ഏകദിന ലോകകപ്പില്‍ (Cricket World Cup 2023) ന്യൂസിലന്‍ഡിനെതിരെ ദക്ഷിണാഫ്രിക്കയ്‌ക്ക് ബാറ്റിങ്. ടോസ് നേടിയ കിവീസ് നായകന്‍ ടോം ലാഥം ആദ്യം ഫീല്‍ഡ് ചെയ്യാന്‍ തീരുമാനിക്കുകയായിരുന്നു (New Zealand vs South Africa Toss Report). ഓസ്‌ട്രേലിയയ്‌ക്ക് എതിരായ കഴിഞ്ഞ മത്സരത്തിലെ ടീമില്‍ ഒരു മാറ്റവുമായാണ് ന്യൂസിലന്‍ഡ് ഇറങ്ങുന്നത്.
ലോക്കി ഫെര്‍ഗൂസണ്‍ പുറത്തായപ്പോള്‍ ടിം സൗത്തി പ്ലേയിങ് ഇലവനിലെത്തി. പാകിസ്ഥാനെതിരായ കഴിഞ്ഞ മത്സരത്തിലെ പ്ലേയിങ് ഇലവനില്‍ ദക്ഷിണാഫ്രിക്ക ഒരു മാറ്റം വരുത്തിയിട്ടുണ്ട്. കാഗിസോ റബാഡ ടീമിലെത്തിയപ്പോള്‍ തബ്രൈസ് ഷംസിയാണ് പുറത്തായത്.
ന്യൂസിലൻഡ് (പ്ലേയിങ് ഇലവൻ): ഡെവോൺ കോൺവേ, വിൽ യങ്, രചിൻ രവീന്ദ്ര, ഡാരിൽ മിച്ചൽ, ടോം ലാഥം (സി), ഗ്ലെൻ ഫിലിപ്‌സ്, ജെയിംസ് നീഷാം, മിച്ചൽ സാന്‍റ്‌നർ, മാറ്റ് ഹെൻറി, ടിം സൗത്തി, ട്രെന്‍റ് ബോൾട്ട്.
ദക്ഷിണാഫ്രിക്ക (പ്ലേയിങ് ഇലവൻ): ക്വിന്‍റൺ ഡി കോക്ക്, ടെംബ ബവുമ (സി), റാസി വാൻ ഡെർ ഡസ്സെൻ, എയ്‌ഡൻ മാർക്രം, ഹെൻറിച്ച് ക്ലാസെൻ, ഡേവിഡ് മില്ലർ, മാർക്കോ ജാൻസൻ, ജെറാൾഡ് കോറ്റ്‌സി, കേശവ് മഹാരാജ്, കാഗിസോ റബാഡ, ലുങ്കി എൻഗിഡി.
പൂനെയിലെ മഹാരാഷ്‌ട്ര ക്രിക്കറ്റ് അസോസിയേഷന്‍ സ്റ്റേഡിയത്തിലാണ് കളി നടക്കുന്നത്. ലോകകപ്പില്‍ തങ്ങളുടെ ഏഴാമത്തെ മത്സരത്തിനാണ് ദക്ഷിണാഫ്രിക്കയും ന്യൂസിലന്‍ഡും ഇറങ്ങുന്നത്. കളിച്ച ആറ് മത്സരങ്ങളില്‍ അഞ്ചെണ്ണം വിജയിച്ച ദക്ഷിണാഫ്രിക്ക നിലവിലെ പോയിന്‍റ് പട്ടികയില്‍ രണ്ടാം സ്ഥാനക്കാരാണ്. ടൂര്‍ണമെന്‍റില്‍ തകര്‍പ്പന്‍ ഫോമിലുള്ള പ്രോട്ടീസ് മൂന്നാം മത്സരത്തില്‍ നെതർലൻഡ്‌സിനോടായിരുന്നു അപ്രതീക്ഷിത തോല്‍വി വഴങ്ങിയത്.
എന്നാല്‍ തുടര്‍ന്ന് കളിച്ച മൂന്ന് മത്സരങ്ങളും വിജയിച്ച ടീം കൂടുതല്‍ അപകടകാരികളായി. ആറ് മത്സരങ്ങളില്‍ നിന്നും 12 പോയിന്‍റുള്ള ഇന്ത്യയാണ് നിലവിലെ പോയിന്‍റ് പട്ടികയില്‍ ഒന്നാം സ്ഥാനത്തുള്ളത്. എന്നാല്‍ ഇന്ത്യയേക്കാള്‍ മികച്ച റണ്‍റേറ്റാണ് പ്രോട്ടീസിനുള്ളത്. ഇതോടെ പൂനെയില്‍ കളി പിടിച്ചാല്‍ പ്രോട്ടീസിന് വീണ്ടും പോയിന്‍റ് പട്ടികയില്‍ തലപ്പത്ത് എത്താം.
മറുവശത്ത് ആറ് മത്സരങ്ങളില്‍ നിന്നും നാല് വിജയവുമായി നിലവിലെ പോയിന്‍റ് പട്ടികയില്‍ മൂന്നാം സ്ഥാനത്താണ് ന്യൂസിലന്‍ഡുള്ളത്. ആദ്യ നാല് മത്സരങ്ങളും പിടിച്ച് വിജയക്കുതിപ്പ് നടത്തുകയായിരുന്ന കിവികള്‍ പിന്നീട് ഇന്ത്യയോടും ഓസ്‌ട്രേലിയയോടും തോല്‍വി വഴങ്ങി. ഇതോടെ പ്രോട്ടീസിനെതിരെ കളി പിടിച്ച് വിജയ വഴിയിലേക്ക് തിരികെ എത്താനാവും ന്യൂസിലന്‍ഡ് പൂനെയില്‍ ലക്ഷ്യം വയ്‌ക്കുക.
ഇനി തോല്‍വി വഴങ്ങിയാല്‍ ടീമിന്‍റെ സെമി ഫൈനല്‍ സാധ്യതകള്‍ ഏറെ സങ്കീര്‍ണമാകും. ഏകദിന ലോകകപ്പ് വേദിയിലെ നേര്‍ക്കുനേര്‍ പോരാട്ടങ്ങളില്‍ ദക്ഷിണാഫ്രിക്കയ്‌ക്ക് മേല്‍ ന്യൂസിലൻഡിന് വമ്പന്‍ ആധിപത്യമുണ്ട്. ഇതേവരെ എട്ട് മത്സരങ്ങളിലാണ് ഇരു ടീമുകളും പരസ്‌പരം മത്സരിച്ചത്. ഇതില്‍ ആറെണ്ണവും ന്യൂസിലന്‍ഡ് വിജയിച്ചപ്പോൾ ദക്ഷിണാഫ്രിക്കയ്‌ക്ക് ഒപ്പം നിന്നത് വെറും രണ്ട് മത്സരങ്ങള്‍ മാത്രമാണ്.
എന്നാല്‍ ഏകദിന മത്സരങ്ങളുടെ കണക്കെടുത്താല്‍ ന്യൂസിലന്‍ഡിന് മേല്‍ ദക്ഷിണാഫ്രിക്കയ്‌ക്കാണ് ആധിപത്യം. ഫോര്‍മാറ്റില്‍ ഇതേവരെ 71 മത്സരങ്ങളിലാണ് ഇരു ടീമുകളും നേര്‍ക്കുനേര്‍ എത്തിയത്. ഇതില്‍ 41 മത്സരങ്ങളില്‍ ദക്ഷിണാഫ്രിക്ക വിജയം പിടിച്ചപ്പോള്‍ 25 എണ്ണമാണ് കിവീസ് നേടിയത്.
ALSO READ: ഇന്ത്യ ജയിച്ചാലും വാങ്കഡെയില്‍ വെടിക്കെട്ടില്ല; കാരണം വ്യക്തമാക്കി ബിസിസിഐ
മത്സരം തത്സമയം കാണാനുള്ള വഴി: ഏകദിന ക്രിക്കറ്റ് ലോകകപ്പിലെ ന്യൂസിലന്‍ഡ് vs ദക്ഷിണാഫ്രിക്ക മത്സരം ടെലിവിഷനില്‍ സ്റ്റാര്‍ സ്‌പോര്‍ട്‌സ് നെറ്റ്‌വര്‍ക്കിലൂടെയാണ് തത്സമയ സംപ്രേഷണം ചെയ്യുന്നത്. ഡിസ്‌നി + ഹോട്‌സ്റ്റാര്‍ ആപ്ലിക്കേഷനിലൂടെയും വെബ്‌സെറ്റിലൂടെയും മത്സരം കാണാം. (Where to Watch New Zealand vs South Africa Cricket World Cup 2023 match)
ALSO READ: 'മറ്റാരേക്കാളും മുകളില്‍, ലോകത്തെ ഏറ്റവും മികച്ചവന്‍'; ജസ്‌പ്രീത് ബുംറയെ പുകഴ്‌ത്തി വസീം അക്രം
