മുംബൈ: ഏകദിന ലോകകപ്പില്‍ (Cricket World Cup 2023) തുടര്‍ച്ചയായ രണ്ടാം കിരീടം ലക്ഷ്യം വച്ചായിരുന്നു ഇംഗ്ലണ്ട് (England Cricket Team) ഇന്ത്യന്‍ മണ്ണിലേക്ക് എത്തിയത്. എന്നാല്‍ ടൂര്‍ണമെന്‍റില്‍ ദയനീയ പ്രകടനമാണ് നിലവിലെ ചാമ്പ്യന്മാര്‍ കാഴ്‌ചവയ്‌ക്കുന്നത്. കളിച്ച അഞ്ച് മത്സരങ്ങളില്‍ നാലെണ്ണത്തിലാണ് ടീം തോല്‍വി വഴങ്ങിയത്.
ഇതിന് പിന്നാലെ ഇംഗ്ലണ്ട് കളിക്കാര്‍ക്കെതിരെ രൂക്ഷ വിമര്‍ശനമുന്നയിച്ചിരിക്കുകയാണ് ഇന്ത്യയുടെ മുന്‍ താരം ഗൗതം ഗംഭീര്‍. ഇംഗ്ലണ്ട് താരങ്ങള്‍ തങ്ങളുടെ രാജ്യത്തിനായല്ല, മറിച്ച് അവരുടെ പ്രശസ്‌തിക്കായി കളിക്കുന്നതായി തോന്നുന്നുവെന്നാണ് ഗംഭീര്‍ പറയുന്നത് (Gautam Gambhir Against England players).
"തുടക്കത്തിൽ തന്നെയുള്ള ഇംഗ്ലണ്ടിന്‍റെ ശരീരഭാഷ കാണുമ്പോള്‍ അവര്‍ ഒരു താത്‌പര്യവുമില്ലാതെയാണ് കളിക്കാനിറങ്ങുന്നത് എന്ന് തോന്നും. എപ്പോഴും നിങ്ങള്‍ക്ക് ഒരുപോലെ ബാറ്റ് ചെയ്യാന്‍ കഴിയില്ല. എന്നാല്‍ മികച്ച പ്രകടനം നടത്തണമെന്ന് ആഗ്രഹിക്കുന്ന ഒരു ബാറ്റര്‍ പോലും ഈ മുഴുവൻ ബാറ്റിങ് യൂണിറ്റിലും ഇല്ല.
ചെയ്യാൻ കഴിയുന്നതും ചെയ്യാൻ ആഗ്രഹിക്കുന്നതും തമ്മിൽ വ്യത്യാസമുണ്ട്. പല കളിക്കാരും പറയുന്നത് തങ്ങളുടെ ശൈലി ഇതാണെന്നും, ഇത്തരത്തില്‍ കളിക്കുന്ന തങ്ങളെ തിരഞ്ഞെടുക്കണോ വേണ്ടയോ എന്ന് തീരുമാനിക്കേണ്ടത് നിങ്ങളാണ് എന്നുമാണ്. അതിനർത്ഥം അവര്‍ അങ്ങേയറ്റം സ്വാർത്ഥരാണെന്നാണ്. ഒരു ടീം സ്പോർട്‌സിൽ സ്വാർത്ഥതയ്ക്ക് ഒരു സ്ഥാനവുമില്ല.
എനിക്ക് തോന്നുന്നത് എല്ലാവരും കളിക്കുന്നത് അവരുടെ പ്രശസ്‌തിക്ക് വേണ്ടിയാണെന്നാണ്. അല്ലാതെ രാജ്യത്തിന് വേണ്ടിയല്ല", ഗൗതം ഗംഭീര്‍ (Gautam Gambhir) വ്യക്തമാക്കി. ലോകകപ്പിലെ ആദ്യ മത്സരത്തില്‍ കഴിഞ്ഞ തവണത്തെ രണ്ടാം സ്ഥാനക്കാരായ ന്യൂസിലന്‍ഡിനോട് ഇംഗ്ലണ്ട് തോല്‍വി വഴങ്ങിയിരുന്നു.
രണ്ടാം മത്സരത്തില്‍ ബംഗ്ലാദേശിനെതിരെ വിജയിച്ചുവെങ്കിലും പിന്നീട് തുടര്‍ തോല്‍വികളാണ് ജോസ് ബട്‌ലറെയും സംഘത്തെയും കാത്തിരുന്നത്. അഫ്‌ഗാനിസ്ഥാന്‍, ദക്ഷിണാഫ്രിക്ക, ശ്രീലങ്ക എന്നീ ടീമുകളാണ് നിലവിലെ ചാമ്പ്യന്മാരെ ചുരുട്ടിക്കൂട്ടിയത്. ഇനി ഈ മാസം 29-ന് ആതിഥേയരായ ഇന്ത്യയാണ് ഇംഗ്ലണ്ടിന്‍റെ എതിരാളി. ലഖ്‌നൗവിലെ ഈഡന്‍ ഗാര്‍ഡന്‍സിലാണ് ഇന്ത്യ-ഇംഗ്ലണ്ട് പോര് നടക്കുക.
ഏകദിന ലോകകപ്പ് 2023 ഇംഗ്ലണ്ട് സ്‌ക്വാഡ് : ഡേവിഡ് മലാൻ, ജോണി ബെയർസ്‌റ്റോ, ജോ റൂട്ട്, ഹാരി ബ്രൂക്ക്, ജോസ് ബട്‌ലര്‍ (ക്യാപ്‌റ്റന്‍/വിക്കറ്റ് കീപ്പര്‍), മൊയീൻ അലി, സാം കറൻ, ബെൻ സ്‌റ്റോക്‌സ്, ലിയാം ലിവിങ്‌സ്‌റ്റണ്‍, ഡേവിഡ് വില്ലി, ക്രിസ് വോക്‌സ്, ഗസ് അറ്റ്കിൻസൺ, ബ്രൈഡൻ കാർസി, മാർക്ക് വുഡ്, ആദിൽ റഷീദ് (England Squad for Cricket World Cup 2023).
