ന്യൂഡല്‍ഹി : ഏകദിന ലോകകപ്പില്‍ (Cricket World Cup 2023) ഓസ്‌ട്രേലിയയ്‌ക്ക് എതിരെ നെതര്‍ലന്‍ഡ്‌സിന് ബോളിങ്. ടോസ് നേടിയ ഓസ്‌ട്രേലിയന്‍ ക്യാപ്റ്റന്‍ പാറ്റ് കമ്മിന്‍സ് (Pat Cummins) ബാറ്റിങ് തെരഞ്ഞെടുക്കുകയായിരുന്നു. പാകിസ്ഥാനെതിരായ കഴിഞ്ഞ മത്സരത്തിലെ പ്ലേയിങ് ഇലവനില്‍ മാറ്റവുമായാണ് ഓസ്‌ട്രേലിയ നെതര്‍ലന്‍ഡ്‌സിനെതിരെ കളിക്കുന്നത്.
പരിക്കേറ്റ മാർക്കസ് സ്റ്റോയിനിസ് പുറത്തായപ്പോള്‍ കാമറൂൺ ഗ്രീൻ ടീമിലെത്തി. ശ്രീലങ്കയ്‌ക്ക് എതിരായ അവസാന മത്സരത്തിലെ പ്ലേയിങ് ഇലവനില്‍ മാറ്റം വരുത്തിയിട്ടില്ലെന്ന് നെതര്‍ലന്‍ഡ്‌സ് ക്യാപ്റ്റന്‍ സ്‌കോട്ട് എഡ്വേർഡ്‌സ് (Scott Edwards) അറിയിച്ചു.
ഓസ്‌ട്രേലിയ (പ്ലേയിങ് ഇലവൻ) : ഡേവിഡ് വാർണർ, മിച്ചൽ മാർഷ്, സ്റ്റീവ് സ്‌മിത്ത്, മർനസ് ലെബുഷയ്‌ന്‍, ജോഷ് ഇംഗ്ലിസ്, കാമറൂൺ ഗ്രീൻ, ഗ്ലെൻ മാക്‌സ്‌വെൽ, പാറ്റ് കമ്മിൻസ് (സി), മിച്ചൽ സ്റ്റാർക്ക്, ജോഷ് ഹേസൽവുഡ്, ആദം സാംപ.
നെതർലൻഡ്‌സ് (പ്ലേയിങ് ഇലവൻ) : വിക്രംജിത് സിങ്, മാക്‌സ് ഒഡൗഡ്, കോളിൻ അക്കർമാൻ, ബാസ് ഡി ലീഡ്, സിബ്രാൻഡ് ഏംഗൽബ്രെച്ച്‌, തേജ നിദാമാനുരു, സ്‌കോട്ട് എഡ്വേർഡ്‌സ് (ക്യാപ്‌റ്റൻ, വിക്കറ്റ് കീപ്പർ), ലോഗൻ വാൻ ബീക്ക്, റോലോഫ് വാൻ ഡെർ മെർവെ, ആര്യൻ ദത്ത്, പോൾ വാൻ മീകെരെൻ.
ഈ ഏകദിന ലോകകപ്പിലെ 24-ാം മത്സരമാണിത്. ഡല്‍ഹിയെ അരുണ്‍ ജയ്‌റ്റ്‌ലി സ്റ്റേഡിയത്തിലാണ് കളി നടക്കുന്നത്. ടൂര്‍ണമെന്‍റില്‍ തങ്ങളുടെ അഞ്ചാം മത്സരത്തിനാണ് ഇരു ടീമുകളും ഇറങ്ങുന്നത്. കളിച്ച നാല് മത്സരങ്ങളില്‍ രണ്ട് വിജയങ്ങളുള്ള ഓസ്‌ട്രേലിയ നിലവിലെ പോയിന്‍റ് പട്ടികയില്‍ നാലാം സ്ഥാനത്താണ്.
നിരാശജനകമായ തുടക്കത്തിന് ശേഷമാണ് അഞ്ച് തവണ ചാമ്പ്യന്മാരായ ഓസീസ് വിജയ വഴിയിലെത്തിയത്. ആദ്യ രണ്ട് മത്സരങ്ങളില്‍ ഇന്ത്യയോടും ദക്ഷിണാഫ്രിക്കയോടും പാറ്റ് കമ്മിന്‍സിന്‍റെ സംഘം തോല്‍വി വഴങ്ങിയിരുന്നു. തുടര്‍ന്ന് ശ്രീലങ്കയേയും പാകിസ്ഥാനെയും കീഴടക്കിയ ടീം ആത്മവിശ്വാസം വീണ്ടെടുത്തു.
ഇതോടെ ലോകകപ്പില്‍ തുടര്‍ച്ചയായ മൂന്നാം വിജയം ലക്ഷ്യമിട്ടാണ് ഓസീസ് വാങ്കഡെയില്‍ നെതര്‍ലന്‍ഡ്‌സിനെതിരെ ലക്ഷ്യം വയ്‌ക്കുന്നത്. മറുവശത്ത് കളിച്ച നാല് മത്സരങ്ങളില്‍ ഒരു വിജയം നേടിയ നെതര്‍ലന്‍ഡ്‌സ് നിലവിലെ പോയിന്‍റ് പട്ടികയില്‍ ഏഴാം സ്ഥാനക്കാരാണ്. ആദ്യ രണ്ട് മത്സരങ്ങളില്‍ പാകിസ്ഥാന്‍, ന്യൂസിലന്‍ഡ് എന്നീ ടീമുകളോട് തോറ്റ നെതര്‍ലന്‍ഡ്‌സ് മൂന്നാം മത്സരത്തില്‍ ദക്ഷിണാഫ്രിക്കയെ വീഴ്‌ത്തിയിരുന്നു.
എന്നാല്‍ കളിച്ച അവസാന മത്സരത്തില്‍ ശ്രീലങ്കയോട് തോറ്റു. ഇതോടെ ഓസീസിനെ കീഴടക്കി വിജയ വഴിയിലേക്ക് തിരികെ എത്താനുറച്ചാവും സ്‌കോട്ട് എഡ്വേർഡ്‌സിന്‍റെ ടീം ഇറങ്ങുക. ഏകദിനത്തിൽ ഇതേവരെ നേര്‍ക്കുനേര്‍ എത്തിയപ്പോള്‍ ഓസ്‌ട്രേലിയയെ തോൽപ്പിക്കാന്‍ നെതർലൻഡ്‌സിന് കഴിഞ്ഞിട്ടില്ല.
നേരത്തെ 2003ലും 2007ലുമായി രണ്ട് തവണയായിരുന്നു ഇരു ടീമുകളും തമ്മില്‍ മത്സരിച്ചത്. രണ്ട് തവണയും വിജയം ഓസീസിനൊപ്പമായിരുന്നു. ഇക്കുറി ഡല്‍ഹിയില്‍ ഓസീസിനോട് ഈ കണക്ക് കൂടെ തീര്‍ക്കാന്‍ ഡച്ച് ടീമിനുണ്ട്.
ലൈവായി മത്സരം കാണാനുള്ള വഴി : ഏകദിന ലോകകപ്പിലെ ഓസ്‌ട്രേലിയ vs നെതര്‍ലന്‍ഡ്‌സ് മത്സരം ടെലിവിഷനില്‍ സ്റ്റാര്‍ സ്‌പോര്‍ട്‌സ് നെറ്റ്‌വര്‍ക്കുകളിലൂടെയാണ് സംപ്രേഷണം ചെയ്യുന്നത്. പ്രസ്‌തുത മത്സരം ഡിസ്‌നി+ഹോട്ട്‌സ്റ്റാര്‍ ആപ്പിലും വെബ്‌സൈറ്റിലും ലഭ്യമാണ് (Where to watch Australia vs Netherlands Cricket World Cup 2023 match).
