ന്യൂഡല്‍ഹി: രാഷ്‌ട്രപതി ദ്രൗപതി മുർമുവിന്‍റെ നയപ്രഖ്യാപന പ്രസംഗത്തോടെ പാർലമെന്‍റ് ബജറ്റ് സമ്മേളനത്തിന് ഇന്ന് തുടക്കമാകും. രാഷ്‌ട്രപതിയായ ശേഷം ദ്രൗപതി മുർമു ആദ്യമായി പാർലമെന്‍റിലെ ഇരുസഭകളെയും അഭിസംബോധന ചെയ്യും. സര്‍ക്കാരിന്‍റെ നേട്ടങ്ങളെയും നയ മുൻഗണനകളെയും പ്രധാനമായും ഉയർത്തിക്കാട്ടുന്നതായിരിക്കും മുർമുവിന്‍റെ കന്നി പ്രസംഗം.
രാഷ്‌ട്രപതിയുടെ പ്രസംഗത്തിന് ശേഷം സാമ്പത്തിക സർവേ റിപ്പോര്‍ട്ട് ഇന്ന് അവതരിപ്പിക്കും. രാഷ്‌ട്രപതിയുടെ അഭിസംബോധനയ്‌ക്കും ധനകാര്യ ബില്ലിനുമുള്ള നന്ദി പ്രമേയത്തിന് അംഗീകാരം തേടുന്നതിനാണ് സർക്കാരിന്റെ മുൻഗണന. സംയുക്ത സിറ്റിങ് രാവിലെ 11 മണിക്കാണ്. ബജറ്റ് സമ്മേളനത്തിൽ രണ്ട് ഭാഗങ്ങളിലായി ആകെ 27 സിറ്റിങ്ങുകൾ ഉണ്ടാകും. 2024ലെ പൊതുതെരഞ്ഞെടുപ്പിന് മുമ്പുള്ള മോദി സർക്കാരിന്റെ അവസാന സമ്പൂർണ കേന്ദ്രബജറ്റാണ് നാളെ. കേന്ദ്ര ധനമന്ത്രി നിർമല സീതാരാമൻ തന്‍റെ അഞ്ചാമത്തെ ബജറ്റ് ലോക്‌സഭയിൽ അവതിരിപ്പിക്കും.
പ്രതിപക്ഷം കേന്ദ്രസർക്കാരിനെ ഒട്ടനവധി വിഷയങ്ങളിൽ കുരുക്കുമെന്നാണ് കരുതുന്നത്. അദാനി-ഹിൻഡൻബർഗ് തർക്കവും പൊതുമേഖല ബാങ്കുകളിലും എൽഐസിയിലും ഉണ്ടായേക്കാവുന്ന ആഘാതവും, ബിബിസിയുടെ 'ഇന്ത്യ: ദി മോദി ക്വസ്റ്റ്യൻ' എന്ന ഡോക്യുമെന്‍ററിക്ക് വിലക്ക് ഏർപ്പെടുത്തിയതിന് പിന്നിലെ യുക്തിയും പാര്‍ലമെന്‍റില്‍ ചര്‍ച്ചയായേക്കും. രാജ്യവ്യാപകമായി ജാതി അടിസ്ഥാനമാക്കിയുള്ള സാമ്പത്തിക സെൻസസ് ആവശ്യപ്പെടുകയും സ്ത്രീ സംവരണ ബില്ലുമൊക്കെ പാർലമെന്‍റിൽ ചൂടേറിയ ചർച്ചയിലേക്ക് നയിച്ചേക്കും.
ബില്ലുകൾ: 36 ബില്ലുകളാണ് ഈ സമ്മേളനത്തിൽ ഭരണകക്ഷികൾ കൊണ്ടുവരുന്നത്. അവയിൽ നാലെണ്ണം ബജറ്റുമായി ബന്ധപ്പെട്ടതാണ്. ബജറ്റ് പേപ്പറുകൾ പരിശോധിക്കുന്നതിനുള്ള ഒരു മാസത്തെ ഇടവേളയോടെ ഏപ്രിൽ 6 വരെ സമ്മേളനം തുടരും. രണ്ട് ഭാഗമായാണ് ബജറ്റ് സമ്മേളനം. ആദ്യ ഭാഗം ഇന്ന് ആരംഭിച്ച് ഫെബ്രുവരി 14ന് സമാപിക്കും. ബജറ്റ് സമ്മേളനത്തിന്‍റെ രണ്ടാം ഭാഗത്തിനായി മാർച്ച് 12-ന് പാർലമെന്‍റ് വീണ്ടും ചേരും.
മില്ലറ്റ് മെനു: പാർലമെന്‍റംഗങ്ങൾക്ക് സെഷനിൽ നിന്ന് ഇടവേള എടുക്കുമ്പോൾ മില്ലെറ്റ് (ധാന്യങ്ങൾ) അടിസ്ഥാനമാക്കിയുള്ള പുതിയ മെനുകൾ ആസ്വദിക്കാൻ കഴിയും. ജോവർ വെജിറ്റബിൾ ഉപ്പുമാവ് , റാഗി ദോശ, ബജ്‌രെ കി ടിക്കി, ബജ്‌ര ഖിച്‌ഡി, തിനയിൽ നിർമിച്ച ഭക്ഷ്യവസ്‌തുക്കൾ എന്നിവ പാർലമെന്‍റ് ഹൗസ് കാന്‍റീനുകളിൽ വിളമ്പും. പാർലമെന്‍റ് ജീവനക്കാർക്കും സന്ദർശകർക്കും മില്ലറ്റ് മെനു ലഭ്യമാകും. തിനയുടെ ഉപയോഗം പ്രോത്സാഹിപ്പിക്കുന്നതിനാണിത്.
