പട്‌ന (ബിഹാർ): പട്‌നയിൽ മഹാദലിത് സമുദായത്തിൽപ്പെട്ട സ്‌ത്രീയെ അർധനഗ്നയാക്കി മർദിച്ചുവെന്ന് പരാതി (Mahadalit Woman Beaten). പട്‌നയിലെ ഖുസ്രുപൂർ പൊലീസ് സ്റ്റേഷൻ പരിധിയിൽ ശനിയാഴ്‌ചയാണ് സംഭവം. പരിക്കേറ്റ യുവതി ആശുപത്രിയിൽ ചികിത്സയിലാണ്.
സാമ്പത്തിക ഇടപാടിനെച്ചൊല്ലി ആറ് പേർ ചേർന്ന് അർധനഗ്നയാക്കി മർദിക്കുകയും വായിൽ മൂത്രമൊഴിക്കുകയും ചെയ്‌തെന്ന് പരാതിയിൽ പറയുന്നു (Six miscreants beat up a Mahadalit woman). പ്രതിയിൽ നിന്ന് 1500 രൂപ കടം വാങ്ങിയിരുന്നു. പലിശ സഹിതം പണം തിരികെ നൽകുകയും ചെയ്‌തു. എന്നാൽ, തിരിച്ചടയ്ക്കാനുള്ള തുക കുടിശ്ശികയുണ്ടെന്ന് പറഞ്ഞാണ് പ്രതിയും കൂട്ടാളികളും ചേർന്ന് തന്നെ മർദിച്ചതെന്ന് സ്‌ത്രീ ആരോപിച്ചു.
പണം തിരിച്ചടച്ചില്ലെങ്കിൽ നഗ്നയാക്കി റോഡിലൂടെ നടത്തും എന്ന് പറഞ്ഞ് പ്രതികൾ ഭീഷണിപ്പെടുത്തിയിരുന്നു. തുടർന്ന് ശനിയാഴ്‌ച രാവിലെ താൻ പൊലീസിൽ പരാതി നൽകി. പൊലീസ് വീട്ടിലെത്തി സംഭവത്തെക്കുറിച്ച് അന്വേഷിച്ചെങ്കിലും പ്രതിക്കെതിരെ യാതൊരു നടപടിയും സ്വീകരിച്ചില്ലെന്നും സ്‌ത്രീ പറഞ്ഞു. 'ശനിയാഴ്‌ച (സെപ്റ്റംബർ 23) രാത്രി 10 മണിയോടെ വീട്ടിലെത്തിയ അക്രമികൾ തന്നെ ബലം പ്രയോഗിച്ച് പിടിച്ചുകൊണ്ടുപോകുകയും അർധ നഗ്നയാക്കി മർദിക്കുകയും ചെയ്‌തു.
തുടർന്ന് പ്രതിയുടെ മകനെക്കൊണ്ട് തന്‍റെ വായിൽ മൂത്രമൊഴിപ്പിക്കുകയും ചെയ്‌തു. എങ്ങനെയോ അവരുടെ വീട്ടിൽ നിന്ന് ഓടിരക്ഷപ്പെടുകയായിരുന്നു' - യുവതി പറഞ്ഞു. സംഭവത്തെ തുടർന്ന് പരാതി ലഭിച്ചിട്ടുണ്ടെന്നും അന്വേഷണം നടത്തിവരികയാണെന്നും ഖുസ്രുപൂർ പൊലീസ് സ്റ്റേഷനിലെ ഒരു ഇൻസ്പെക്‌ടർ പറഞ്ഞു.
ദലിത് യുവാവിനെ കൊലപ്പെടുത്തി, മാതാവിനെ വിവസ്ത്രയാക്കി : മധ്യപ്രദേശിലെ സാഗർ ജില്ലയിൽ ദലിത് യുവതി നൽകിയ പീഡന പരാതി പിൻവലിക്കാത്തതിന്‌ സഹോദരനെ സംഘം ചേർന്ന് മർദിച്ച്‌ കൊലപ്പെടുത്തുകയും മാതാവിനെ വിവസ്ത്രയാക്കുകയും ചെയ്‌തിരുന്നു. ഇവരുടെ വീട് തല്ലിത്തകർക്കുകയും ചെയ്‌തു. മകനെ മർദിക്കുന്നത് കണ്ട് മാതാവ് രക്ഷിക്കാൻ ശ്രമിച്ചു. ഇതിനിടെയാണ് അക്രമികൾ മാതാവിനെ വിവസ്ത്രയാക്കിയത്. സംഭവം അറിഞ്ഞ് പൊലീസ് എത്തിയാണ് പൊലീസ് ഇവർക്ക് ധരിക്കാൻ വസ്‌ത്രം നൽകിയത്.
പീഡന പരാതി നൽകിയ സഹോദരിയെയും അക്രമികൾ ക്രൂരമായി മർദിച്ചു. സംഭവത്തിൽ 12 പേർക്കെതിരെ പൊലീസ് കേസ് രജിസ്റ്റർ ചെയ്‌തു. മുഖ്യപ്രതികളായ എട്ട് പേരെ പൊലീസ് അറസ്റ്റ് ചെയ്‌തു. ഇതിൽ മൂന്ന് പേരെ തിരിച്ചറിഞ്ഞിട്ടില്ല. മൂന്ന് പേർക്കെതിരെ കൊലക്കുറ്റവും എസ്‌സി/എസ്‌ടി നിയമവും ചുമത്തി.
കോമൽ സിങ്, വിക്രം സിങ്, ആസാദ് സിങ് എന്നിവർ വീട്ടിലെത്തി താൻ നൽകിയ പീഡന പരാതി പിൻവലിക്കാൻ ആവശ്യപ്പെട്ടു. ഇതിന് തയ്യാറാകാതിരുന്നതോടെ വീട് അടിച്ചു തകർത്തു. തുടർന്ന് ഗ്രാമത്തിലെ ബസ് സ്റ്റോപ്പിൽ വാഹനം കാത്തുനിൽക്കുകയായിരുന്ന സഹോദരനെ മർദിക്കുകയും കൊലപ്പെടുത്തുകയും ചെയ്‌തുവെന്ന് യുവാവിന്‍റെ സഹോദരി മൊഴി നൽകി. ഇത് തടയാനെത്തിയ തന്‍റെ മാതാവിനെ നഗ്നയാക്കിയെന്നും പെൺകുട്ടി കൂട്ടിച്ചേർത്തു.
