ചണ്ഡീഗഢ്: പഞ്ചാബ് കോൺഗ്രസിലെ പ്രശ്‌നങ്ങൾക്ക് ഒടുവില്‍ പരിഹാരമാകുന്നു. വരാനിരിയ്ക്കുന്ന നിയമസഭ തെരഞ്ഞെടുപ്പിനെ മുഖ്യമന്ത്രി അമരീന്ദര്‍ സിങിന്‍റെ നേതൃത്വത്തില്‍ നേരിടുമെന്ന് മുതിര്‍ന്ന കോണ്‍ഗ്രസ് നേതാവ് അശ്വനി സേക്രി പറഞ്ഞു. വമ്പിച്ച ഭൂരിപക്ഷത്തോടെ കോണ്‍ഗ്രസ് തെരഞ്ഞെടുപ്പില്‍ ജയിയ്ക്കുമെന്നും അദ്ദേഹം കൂട്ടിച്ചേര്‍ത്തു.
പരിഹസിച്ച് പ്രതിപക്ഷം
അശ്വനി സേക്രിയുടെ പ്രസ്‌താവനയ്ക്ക് പിന്നാലെ കോണ്‍ഗ്രസിനെ പരിഹസിച്ച് പ്രതിപക്ഷ പാര്‍ട്ടികള്‍ രംഗത്തെത്തി. സിദ്ദു പാർട്ടിയുടെ ഉന്നത പദവിയിലെത്തുന്നത് വലിയ മാറ്റമുണ്ടാക്കില്ലെന്ന് ആം ആദ്‌മി പാർട്ടി നേതാവ് നീൽ ഗാർഗ് പറഞ്ഞു.
കോൺഗ്രസനുള്ളിലെ പ്രശ്‌നങ്ങള്‍ വഷളായി കൊണ്ടിരിക്കുകയാണെന്നും ക്യാപ്റ്റൻ അമ്രീന്ദർ സിങ് പോലും പാർട്ടിക്ക് വോട്ട് ചെയ്യില്ലെന്നും അകാലിദൾ നേതാവ് കരംവീർ സിങ് ഗുരയ പറഞ്ഞു. കോൺഗ്രസ് ഇതുവരെ ജനങ്ങൾക്ക് വേണ്ടി ഒന്നും ചെയ്‌തിട്ടില്ലെന്നും അവരുടെ പ്രകടന പത്രികയിൽ നൽകിയ ഒരു വാഗ്‌ദാനം പോലും നിറവേറ്റിയിട്ടില്ലെന്നും അദ്ദേഹം ആരോപിച്ചു.
സിദ്ദു-അമരീന്ദര്‍ പോര്
നവജ്യോത് സിങ് സിദ്ദുവിനെ പാര്‍ട്ടി അധ്യക്ഷനാക്കുന്നതിനെതിരെ അമരീന്ദര്‍ സീങ് നേരത്തെ വിയോജിപ്പ് രേഖപ്പെടുത്തിയിരുന്നു. എഐസിസി ജനറല്‍ സെക്രട്ടറിയും പഞ്ചാബിന്‍റെ ചുമതലയുമുള്ള ഹരീഷ് റാവത്തുമായി കൂടിക്കാഴ്‌ച നടത്തിയതിന് പിന്നാലെയാണ് അദ്ദേഹം നിലപാട് മയപ്പെടുത്തിയത്. കോൺഗ്രസ് പ്രസിഡന്‍റ് സോണിയ ഗാന്ധിയുടെ ഏത് തീരുമാനവും എല്ലാവർക്കും സ്വീകാര്യമാകുമെന്നായിരുന്നു അമരീന്ദർ സിങിന്‍റെ പ്രസ്‌താവന.
നിയമസഭ തെരഞ്ഞെടുപ്പ് നടക്കാനിരിക്കെ പാർട്ടിയ്ക്കുള്ളിലെ കലഹം അവസാനിപ്പിയ്ക്കാന്‍ കോൺഗ്രസ് നേതൃത്വം ശ്രമം നടത്തിവരികയാണ്. പ്രശ്‌നപരിഹാരത്തിനായുള്ള നിർദേശങ്ങൾ സംബന്ധിച്ച റിപ്പോർട്ട് വെള്ളിയാഴ്‌ച സോണിയ ഗാന്ധിയ്ക്ക് ഹരീഷ് റാവത്ത് സമർപ്പിച്ചിരുന്നു.
Also read: അനുനയ നീക്കവുമായി റാവത്ത്; പഞ്ചാബ് കോൺഗ്രസില്‍ കലഹമൊഴിയുന്നു
