ಚಂಡೀಗಢ: ಐಪಿಎಲ್ ಅಂದ್ರೇನೆ ಹಾಗೆ. ಇಲ್ಲಿ ರೋಚಕತೆಗೆ ಕೊರೆತೆಯಿಲ್ಲ. ಶನಿವಾರ ಇಲ್ಲಿ ನಡೆದ ರಾಜಸ್ಥಾನ ರಾಯಲ್ಸ್ ಮತ್ತು ಪಂಜಾಬ್ ಕಿಂಗ್ಸ್ ನಡುವಿನ ಪಂದ್ಯವೂ ಕ್ರಿಕೆಟ್ ಪ್ರಿಯರಿಗೆ ರಸದೌತಣ ನೀಡಿತು. ಕಠಿಣ ಪಿಚ್ನಲ್ಲಿ ಇತ್ತಂಡಗಳು ಭರ್ಜರಿ ಹೋರಾಟ ನಡೆಸಿದರೂ, ರಾಜಸ್ಥಾನ ರಾಯಲ್ಸ್ ಕೊನೆಯಲ್ಲಿ ಗೆಲುವಿನ ನಗೆ ಬೀರಿತು.
ಪಂಜಾಬ್ ನೀಡಿದ್ದ 148 ರನ್ಗಳ ಸಾಧಾರಣ ಗುರಿಯನ್ನು ಬೆನ್ನಟ್ಟಿದ ರಾಜಸ್ಥಾನ ರಾಯಲ್ಸ್ ಫ್ಯ್ಲಾಟ್ ಪಿಚ್ನಲ್ಲಿ ಕೊನೆಯ 1 ಎಸೆತ ಬಾಕಿ ಉಳಿಸಿ 152 ರನ್ ಗಳಿಸಿತು. ಇದರಿಂದ ತಂಡ 3 ವಿಕೆಟ್ಗಳ ಜಯ ದಾಖಲಿಸಿತು. ಇದಕ್ಕೆ ಕಾರಣವಾಗಿದ್ದು ಶಿಮ್ರಾನ್ ಹೆಟ್ಮಾಯರ್ ಮತ್ತು ರೋವ್‌ಮನ್ ಪೊವೆಲ್.
ರಾಜಸ್ಥಾನ ತಂಡಕ್ಕೆ ಕೊನೆಯ 5 ಓವರ್ಗಳಲ್ಲಿ 49 ರನ್ಗಳ ಅಗತ್ಯವಿತ್ತು. ಬ್ಯಾಟರ್ಗಳಿಗೆ ಕಠಿಣ ಸವಾಲೊಡ್ಡಿದ್ದ ಪಿಚ್ನಲ್ಲಿ ರನ್ ಗಳಿಸಲು ಪರದಾಡಬೇಕಿತ್ತು. ಆದರೂ, ಕೆಚ್ಚೆದೆಯ ಪ್ರದರ್ಶನ ನೀಡಿದ ಹೆಟ್ಮಾಯರ್ ಸಿಡಿಯುವ ಮೂಲಕ ತಂಡಕ್ಕೆ ಗೆಲುವು ತಂದುಕೊಟ್ಟರು. ಕೆರೆಬಿಯನ್ ಆಟಗಾರ 10 ಎಸೆತಗಳಲ್ಲಿ 27 ರನ್ ಗಳಿಸಿದರು. ಕೊನೆಯ ಓವರ್ನಲ್ಲಿ 10 ರನ್ ಬೇಕಿದ್ದಾಗ ಮೊದಲೆರಡು ಎಸೆತಗಳಲ್ಲಿ ರನ್ ಬರಲಿಲ್ಲ. ತಂಡ ಆತಂಕದಲ್ಲಿದ್ದಾಗ ಭರ್ಜರಿ ಎರಡು ಸಿಕ್ಸರ್ ಬಾರಿಸಿ ಗೆಲುವಿನ ಸಂಭ್ರಮ ತಂದರು. ಇನ್ನೊಂದೆಡೆ ರೋವಮೆನ್ ಪೊವೆಲ್ 11 ರನ್ ಗಳಿಸಿ ಸಾಥ್ ನೀಡಿದರು.
ಆರಂಭಿಕ ಯಶಸ್ವಿ ಜೈಸ್ವಾಲ್ 39, ಮೊದಲ ಪಂದ್ಯವಾಡಿದ ಸ್ಪಿನ್ನರ್ ತನುಷ್ ಕೋಟ್ಯನ್ 24, ನಾಯಕ ಸಂಜು ಸ್ಯಾಮ್ಸನ್ 18, ರಿಯಾನ್ ಪರಾಗ್ 23 ರನ್ ಕಾಣಿಕೆ ನೀಡಿದರು. ಪಂಜಾಬ್ ಪರವಾಗಿ ಕಗಿಸೊ ರಬಾಡ, ಸ್ಯಾಮ್ ಕರ್ರನ್ ತಲಾ 2 ವಿಕೆಟ್ ಪಡೆದರು.
ತಿಣುಕಾಡಿದ ಪಂಜಾಬ್ ಬ್ಯಾಟರ್ಸ್: ಇದಕ್ಕೂ ಮೊದಲು ಬ್ಯಾಟ್ ಮಾಡಿದ ಪಂಜಾಬ್ ಕಿಂಗ್ಸ್ ಬ್ಯಾಟರ್ಗಳು ರನ್ ಗಳಿಸಲು ಪರದಾಡಿದರು. ಕೇಶವ್ ಮಹಾರಾಜ್, ಟ್ರೆಂಟ್ ಬೌಲ್ಟ್, ಆವೇಶ್ ಖಾನ್ ಬಿಗಿದಾಳಿಗೆ ಸಿಲುಕಿ ತತ್ತರಿಸಿದರು. ಮೊದಲ 10 ಓವರ್ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 52 ರನ್ ಮಾತ್ರ ಗಳಿಸಿತು. ಶಿಖರ್ ಧವನ್ ಬದಲಿಗೆ ಆಡಿದ ಅಥರ್ವ ಟಾಯ್ಡೆ 15, ಜಾನಿ ಬೈರ್ಸ್ಟೋವ್ 15, ಪ್ರಭ್ಶಿಮ್ರಾನ್ ಸಿಂಗ್ 10, ಹಂಗಾಮಿ ನಾಯಕ ಸ್ಯಾಮ್ ಕರ್ರನ್ 6 ರನ್ ಗಳಿಸಲು ಅದಕ್ಕಿಂತಲೂ ಹೆಚ್ಚು ಎಸೆತ ತೆಗೆದುಕೊಂಡರು. ಮಧ್ಯಮ ಕ್ರಮಾಂಕದಲ್ಲಿ ಜಿತೇಶ್ ಶರ್ಮಾ 29, ಲಿಯಾಮ್ ಲಿವಿಂಗ್ಸ್ಟೋನ್ 21, ಅಶುತೋಷ್ ಶರ್ಮಾ 31 ರನ್ ಗಳಿಸಿ ತಂಡವನ್ನು ಆಧರಿಸಿದರು.
ಬಿಗಿ ಬೌಲಿಂಗ್ ದಾಳಿ: ನಿಧಾನಗತಿ ಪಿಚ್ನ ಲಾಭ ಪಡೆದ ರಾಜಸ್ಥಾನ ಬೌಲರ್ಗಳು ಬಿಗಿ ದಾಳಿ ನಡೆಸಿದರು. ಕೇಶವ್ ಮಹಾರಾಜ್, ಆವೇಶ್ ಖಾನ್ ತಲಾ 2 ವಿಕೆಟ್ ಪಡೆದರು. ಟ್ರೆಂಟ್ ಬೌಲ್ಟ್ 1 ವಿಕೆಟ್ ಕಿತ್ತರೂ 4 ಓವರ್ಗಳಲ್ಲಿ 22 ರನ್ ಮಾತ್ರ ನೀಡಿದರು. ಕೇಶವ್ ಮಹಾರಾಜ್ 23 ರನ್ ಬಿಟ್ಟುಕೊಟ್ಟರು.
ಇದನ್ನೂ ಓದಿ: ಐಪಿಎಲ್ 2024: ರಾಜಸ್ಥಾನ್ ಬೌಲಿಂಗ್ ದಾಳಿಗೆ ನಲುಗಿದ ಪಂಜಾಬ್: ಸಂಜು ಪಡೆಗೆ 148 ರನ್ಗಳ ಗುರಿ - PBKS VS RR
