ಚೆನ್ನೈ(ತಮಿಳುನಾಡು): ಇಲ್ಲಿನ ಚೆಪಾಕ್ ಕ್ರೀಡಾಂಗಣದಲ್ಲಿ ನಡೆಯಲಿರುವ ಐಪಿಎಲ್ ಫೈನಲ್ ಪಂದ್ಯಕ್ಕೆ ಮಳೆ ಅಡ್ಡಿಪಡಿಸುವ ಆತಂಕವಿದೆ. ಕೆಲ ದಿನಗಳಿಂದ ತಮಿಳುನಾಡಿನಲ್ಲಿ ಮಳೆಯಾಗುತ್ತಿದೆ. ಶುಕ್ರವಾರ ಸುರಿದ ವರುಣನಿಂದಾಗಿ ಕೋಲ್ಕತ್ತಾ ನೈಟ್ ರೈಡರ್ಸ್ ಅಭ್ಯಾಸಕ್ಕೆ ನಡೆಸಲೂ ಸಾಧ್ಯವಾಗಿಲ್ಲ. ಆಟಗಾರರು ಒಳಾಂಗಣದಲ್ಲಿ ಫುಟ್ಬಾಲ್ ಮಾತ್ರ ಆಡಿ ದೈಹಿಕ ಕಸರತ್ತು ನಡೆಸಿದರು.
ಶನಿವಾರ ಬೆಳಗ್ಗೆ ಹೈದರಾಬಾದ್ ಅಭ್ಯಾಸ ನಡೆಸಿದ ಬಳಿಕ, ಸಂಜೆ ಕೆಕೆಆರ್ಗೆ ಅಭ್ಯಾಸ ನಿಗದಿಯಾಗಿತ್ತು. ಆದರೆ, ಮಳೆ ಸುರಿದ ಕಾರಣ ಆಭ್ಯಾಸದ ಅವಧಿ ಮೊಟಕುಗೊಳಿಸಲಾಯಿತು. ಫೈನಲ್ ಕದನಕ್ಕೂ ಮುನ್ನ ತಂಡಕ್ಕೆ ಮಳೆ ಅಡಚಣೆ ಉಂಟುಮಾಡಿತು.
ಕೆಂಪು ಮಣ್ಣಿನ ಪಿಚ್ ಬಳಕೆ: ಎಸ್ಆರ್ಎಚ್ ಮತ್ತು ಕೆಕೆಆರ್ ಫೈನಲ್ ಪಂದ್ಯಕ್ಕೆ ಕೆಂಪು ಮಣ್ಣಿನ ಪಿಚ್ ಬಳಕೆ ಮಾಡಲಾಗುತ್ತಿದೆ. ಎರಡನೇ ಕ್ವಾಲಿಫೈಯರ್ಗೆ ಇಲ್ಲಿ ಕಪ್ಪು ಮಣ್ಣಿನ ಪಿಚ್ ನೀಡಲಾಗಿತ್ತು. ಇದರಿಂದ ಸ್ಪಿನ್ನರ್ಗಳು ಪಂದ್ಯದಲ್ಲಿ ಮಿಂಚಿದ್ದರು. ಕೆಂಪು ಮಣ್ಣಿನಿಂದ ತಯಾರಿಸಲಾಗಿರುವ ಪಿಚ್ ಬ್ಯಾಟರ್ಗಳಿಗೆ ಹೆಚ್ಚು ನೆರವಾಗಲಿದೆ. ಹೀಗಾಗಿ ಪಂದ್ಯದಲ್ಲಿ ರನ್ ಮಳೆ ಹರಿಯುವ ನಿರೀಕ್ಷೆ ಇದೆ.
ಕೆಕೆಆರ್ ಮೆಂಟರ್ ಗೌತಮ್ ಗಂಭೀರ್ ಅವರು ಸಿದ್ಧಪಡಿಸಲಾದ ಈ ಪಿಚ್ ಅನ್ನು ಹಲವು ಬಾರಿ ಪರಿಶೀಲಿಸಿದರು. ಮುಖ್ಯ ಕೋಚ್ ಚಂದ್ರಕಾಂತ್ ಪಂಡಿತ್ ಮತ್ತು ಬೌಲಿಂಗ್ ಕೋಚ್ ಭರತ್ ಅರುಣ್ ಅವರೂ ಜೊತೆಗಿದ್ದರು. ತುಂತುರು ಹನಿ ಬೀಳುತ್ತಿರುವ ಕಾರಣ ಪಿಚ್ ಅನ್ನು ಕವರ್ನಿಂದ ಮುಚ್ಚಲಾಗಿದೆ.
ಮಳೆ ಬಂದರೆ ಫಲಿತಾಂಶದ ಲೆಕ್ಕಾಚಾರ: ಬಂಗಾಳಕೊಲ್ಲಿಯಲ್ಲಿ ರೆಮಲ್ ಚಂಡಮಾರುತ ಬೀಸುತ್ತಿದೆ. ಇದರಿಂದ ಹಲವೆಡೆ ವರುಣಾರ್ಭಟ ಮುಂದುವರಿದಿದೆ. ಇಂದಿನ ಐಪಿಎಲ್ ಫೈನಲ್ ಪಂದ್ಯಕ್ಕೆ ಮಳೆ ಅಡ್ಡಿ ಉಂಟಾದರೆ, ನಾಳೆಗೆ ಮೀಸಲು ದಿನ ಇರಲಿದೆ. ಮೀಸಲು ದಿನದಲ್ಲಿ ಮಳೆ ಬಂದರೆ ಫಲಿತಾಂಶ ಹೇಗೆ ಎಂಬುದು ಕ್ರಿಕೆಟ್‌ಪ್ರಿಯರ ಕುತೂಹಲ.
ಪಂದ್ಯ ಸಂಜೆ 7.30ಕ್ಕೆ ಆರಂಭವಾಗಲಿದೆ. ಈ ಅವಧಿಯಲ್ಲಿ ಮಳೆ ಬಂದರೆ ಓವರ್ ಕಡಿತ ಮಾಡುವುದಿಲ್ಲ. ರಾತ್ರಿ 9.40 ರೊಳಗೆ ಮಳೆ ನಿಂತು ಪಂದ್ಯ ಸಾಗಿದಲ್ಲಿ ನಿಗದಿತ 20 ಓವರ್ ಆಡಿಸಲಾಗುತ್ತದೆ. ಇದರ ಬಳಿಕವೂ ಮಳೆ ಬಂದಲ್ಲಿ ಪ್ರತಿ 8 ನಿಮಿಷಕ್ಕೆ ಒಂದು ಓವರ್ ಕಡಿತವಾಗಲಿದೆ. ಫೈನಲ್ ಪಂದ್ಯಕ್ಕೆ 2 ಗಂಟೆ ಹೆಚ್ಚುವರಿ ಅವಧಿ ಕೂಡ ನೀಡಲಾಗಿದೆ. ಅಂದರೆ, ಟಿ20 ಪಂದ್ಯದ ಒಟ್ಟಾರೆ ನಿಗದಿತ ಸಮಯ 3 ಗಂಟೆ 15 ನಿಮಿಷ. ಹೆಚ್ಚುವರಿ ಸಮಯ ಸೇರಿ 5 ಗಂಟೆ 15 ನಿಮಿಷವಾಗಲಿದೆ. ರಾತ್ರಿ 1 ಗಂಟೆಯವರೆಗೂ ಪಂದ್ಯ ನಡೆಯಲಿದೆ.
ಆಟ ಆರಂಭವಾಗಿ ಕೆಲ ಓವರ್ಗಳ ಬಳಿಕ ಮಳೆ ಸುರಿದು ಆಟ ನಿಂತರೆ ಮೀಸಲು ದಿನದಲ್ಲಿ ಪಂದ್ಯ ಎಲ್ಲಿ ನಿಂತಿರುತ್ತದೆಯೋ ಅಲ್ಲಿಂದಲೇ ಮುಂದುವರಿಯಲಿದೆ. ಮೀಸಲು ದಿನದಲ್ಲೂ ಎಡಬಿಡದೆ ಮಳೆ ಬಿದ್ದಲ್ಲಿ ಕನಿಷ್ಠ 5 ಓವರ್ ಆಟಕ್ಕೆ ಮೊರೆ ಹೋಗಲಾಗುತ್ತದೆ. ಅದೂ ಕೂಡ ಸಾಧ್ಯವಾಗದಿದ್ದಲ್ಲಿ ಸೂಪರ್ ಓವರ್ ಆಡಿಸಲಾಗುವುದು. ಇದ್ಯಾವುದೂ ನಡೆಯದಿದ್ದಲ್ಲಿ ಲೀಗ್ ಹಂತದಲ್ಲಿ ಅಂಕ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದ ಕೆಕೆಆರ್ ಚಾಂಪಿಯನ್ ಎಂದು ಘೋಷಿಸಲಾಗುತ್ತದೆ.
ಇದನ್ನೂ ಓದಿ: ಚೆನ್ನೈನಲ್ಲಿಂದು IPL ಫೈನಲ್: ಪೈಪೋಟಿಗೆ ಹೈದರಾಬಾದ್-ಕೋಲ್ಕತ್ತಾ ರೆಡಿ; ಕೌನ್‌ ಬನೇಗಾ ಚಾಂಪಿಯನ್? - IPL Final
