ಬಾಲಿವುಡ್ ಅಭಿನೇತ್ರಿ ಅನುಷ್ಕಾ ಶರ್ಮಾ ಮತ್ತು ಸ್ಟಾರ್ ಕ್ರಿಕೆಟರ್ ವಿರಾಟ್ ಕೊಹ್ಲಿ ದಂಪತಿಗೆ ಎರಡನೇ ಮಗುವಾಗಿದೆ. ಫೆಬ್ರವರಿ 15ರಂದು ಗಂಡು ಮಗು ಜನಿಸಿದ್ದು, 'ಅಕಾಯ್' ಎಂಬ ವಿಭಿನ್ನ- ಆಕರ್ಷಕ ಹೆಸರಿಟ್ಟಿದ್ದಾರೆ. ಕಳೆದ ಗುರುವಾರ ಮಗು ಜನಿಸಿದ್ದು, ನಿನ್ನೆ ರಾತ್ರಿ ಈ ಸುದ್ದಿಯನ್ನು ಸ್ಟಾರ್ ಕಪಲ್ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ದಂಪತಿ ಸದ್ಯ ಎಲ್ಲಿದ್ದಾರೆ ಎಂಬ ನಿಖರ ಮಾಹಿತಿ ಹೊರಬಿದ್ದಿಲ್ಲ. ಆದರೆ ಲಂಡನ್‌ನಲ್ಲಿ ವಿರಾಟ್ ಅಡ್ಡಾಡುತ್ತಿರುವ ಫೋಟೋ ವೈರಲ್ ಆಗಿದೆ.
ಈ ಹಿಂದೆ ಲಂಡನ್ ಆಸ್ಪತ್ರೆಯಲ್ಲಿ ಅನುಷ್ಕಾ ಅವರ ಹೆರಿಗೆಯಾಗಲಿದೆ ಎಂಬ ವದಂತಿಗಳು ಹರಡಿದ್ದವು. ವಿರಾಟ್ ಅವರ ಫೋಟೋ ಲಂಡನ್ನಿಂದ ವೈರಲ್ ಆಗಿದ್ದು, ಊಹಾಪೋಹಗಳಿಗೆ ತುಪ್ಪ ಸುರಿದಿದೆ. ಆನ್‌ಲೈನ್‌ನಲ್ಲಿ ಶರವೇಗದಲ್ಲಿ ವೈರಲ್ ಆಗುತ್ತಿರುವ ಫೋಟೋದಲ್ಲಿ, ವಿರಾಟ್ ಲಂಡನ್‌ನ ಬೀದಿಗಳಲ್ಲಿ ಅಡ್ಡಾಡುತ್ತಿರುವಂತೆ ಕಾಣಿಸಿಕೊಂಡಿದ್ದಾರೆ. ಡಾರ್ಕ್ ಜಾಕೆಟ್, ಬಿಳಿ ಪ್ಯಾಂಟ್‌ ಮತ್ತು ಕ್ಯಾಪ್ ಧರಿಸಿದ್ದಾರೆ. ಈ ದಂಪತಿ ಲಂಡನ್ನಲ್ಲೇ ಇದ್ದಾರೆ ಎಂದು ಬಹುತೇಕ ನಂಬಲಾಗಿದೆ.
ಜನಪ್ರಿಯ ತಾರಾ ದಂಪತಿ ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಗಳಲ್ಲಿ ನಿನ್ನೆ ಸಂಜೆ ಈ ವಿಚಾರವನ್ನು ಹಂಚಿಕೊಂಡಿದ್ದಾರೆ. ಸಂತಸ ವ್ಯಕ್ತಪಡಿಸಿದ ಜೋಡಿ, ಮಗನಿಗೆ ಅಕಾಯ್ ಎಂದು ನಾಮಕರಣ ಮಾಡಿದ್ದೇವೆಂದೂ ಕೂಡ ತಿಳಿಸಿದ್ದಾರೆ. ಈ ಸಂದರ್ಭ ತಮ್ಮ ಗೌಪ್ಯತೆ ಗೌರವಿಸುವಂತೆಯೂ ವಿನಂತಿಸಿದರು. ಆಶೀರ್ವಾದ ಮತ್ತು ಶುಭಾಶಯಗಳಿಗಾಗಿ ಎಲ್ಲರಿಗೂ ಧನ್ಯವಾದಗಳನ್ನು ಸಹ ಅರ್ಪಿಸಿದರು.
ಈ ವಿಚಾರ ತಿಳಿಯುತ್ತಿದ್ದಂತೆ, ಅಭಿಮಾನಿಗಳು ಮತ್ತು ನೆಟ್ಟಿಗರು 'ಅಕಾಯ್' ಹೆಸರಿನ ಅರ್ಥ ಹುಡುಕಿದ್ದಾರೆ. ನಾನಾ ಭಾಷೆಗಳಲ್ಲಿ ಇದರರ್ಥ ಬಹಳ ಸಕಾರಾತ್ಮಕವಾಗಿ ಇದೆ. ಟರ್ಕಿಶ್ ಭಾಷೆಯಲ್ಲಿ ಹೊಳೆಯುವ ಚಂದ್ರ ಅಥವಾ ಹುಣ್ಣಿಮೆ ಚಂದ್ರ ಎಂಬ ಅರ್ಥ ಇದೆ. ಅಲ್ಲದೇ 'ಭೌತಿಕ ದೇಹ ಮೀರಿದ' ಎಂಬ ಅರ್ಥವನ್ನೂ ಒಳಗೊಂಡಿದೆ. ಹೀಗೆ ನಾನಾ ಅರ್ಥವಿದ್ದು, ವಿರುಷ್ಕಾ ದಂಪತಿ ಯಾವ ಅರ್ಥದಲ್ಲಿ ಈ ಹೆಸರಿಟ್ಟಿದ್ದಾರೆ ಎಂಬುದನ್ನು ಸ್ವತಃ ಅವರೇ ತಿಳಿಸಬೇಕಿದೆ.
ಇದನ್ನೂ ಓದಿ: ವಿರಾಟ್ ಕೊಹ್ಲಿ- ಅನುಷ್ಕಾ ಶರ್ಮಾ ದಂಪತಿಗೆ ಗಂಡು ಮಗು ಜನನ; ವಿಭಿನ್ನವಾಗಿ ಹೆಸರಿಟ್ಟ ವಿರುಷ್ಕಾ ಜೋಡಿ
ಅನುಷ್ಕಾ ಅವರ ಪ್ರೆಗ್ನೆನ್ಸಿ ಬಗ್ಗೆ ಕೆಲ ಸಮಯಗಳಿಂದ ಊಹಾಪೋಹಗಳು ಎದ್ದಿದ್ದವು. ಅಧಿಕೃತ ಮಾಹಿತಿಗೆ ಅಭಿಮಾನಿಗಳು ಬೇಡಿಕೆ ಇಟ್ಟಿದ್ದರು. ಅದಾಗ್ಯೂ ದಂಪತಿ ಈ ವಿಚಾರವನ್ನು ಖಚಿತಪಡಿಸಲಿಲ್ಲ, ಮತ್ತೊಂದೆಡೆ ನಿರಾಕರಿಸಲೂ ಇಲ್ಲ. ಮೊದಲ ಮಗುವಿನ ಜನನಕ್ಕೂ ಮುನ್ನ ತಾವು ಪೋಷಕರಾಗಲಿದ್ದೇವೆ ಎಂದು ಸೋಷಿಯಲ್ ಮೀಡಿಯಾಗಳಲ್ಲಿ ಘೋಷಿಸಿಕೊಂಡಿದ್ದರು. ಈ ಬಾರಿ ಮಗು ಜನಿಸಿ ಒಂದು ವಾರದ ಬಳಿಕ ವಿಚಾರವನ್ನು ಹಂಚಿಕೊಂಡಿದ್ದಾರೆ. 2018ರಲ್ಲಿ ತೆರೆಕಂಡ ಶಾರುಖ್ ಖಾನ್ ಅವರ 'ಝೀರೋ' ಸಿನಿಮಾದಲ್ಲಿ ಅನುಷ್ಕಾ ಶರ್ಮಾ ಕೊನೆಯದಾಗಿ ಕಾಣಿಸಿಕೊಂಡಿದ್ದರು. ಮುಂದಿನ ನೆಟ್‌ಫ್ಲಿಕ್ಸ್ ಚಿತ್ರ ಚಕ್ಡಾ ಎಕ್ಸ್‌ಪ್ರೆಸ್ ಬಿಡುಗಡೆಗೆ ತಯಾರಿ ನಡೆಸುತ್ತಿದ್ದಾರೆ.
ಇದನ್ನೂ ಓದಿ: ದಾದಾಸಾಹೇಬ್ ಫಾಲ್ಕೆ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವ: ಪ್ರಶಸ್ತಿ ವಿಜೇತರ ಪಟ್ಟಿ ಹೀಗಿದೆ
