ಭಾರತೀಯ ಚಿತ್ರರಂಗದ ಬ್ಲಾಕ್‌ಬಸ್ಟರ್ ಸಿನಿಮಾ 'ಆರ್ಆರ್ಆರ್' ನಂತರ ಹೆಸರಾಂತ ನಿರ್ದೇಶಕ ಎಸ್.ಎಸ್.ರಾಜಮೌಳಿ ತಮ್ಮ ಮುಂದಿನ ಪ್ರೊಜೆಕ್ಟ್ ಕಡೆ ಗಮನಹರಿಸಿದ್ದು, ಟಾಲಿವುಡ್ ಸೂಪರ್‌ ಸ್ಟಾರ್ ಮಹೇಶ್ ಬಾಬು ಜೊತೆ ಹೊಸ ಸಿನಿಮಾ ಮಾಡುತ್ತಿದ್ದಾರೆ. ತಾತ್ಕಾಲಿಕವಾಗಿ ಇದಕ್ಕೆ 'SSMB29' ಹೆಸರಿಡಲಾಗಿದೆ. ಚಿತ್ರದ ಮೇಲಿನ ಕ್ರೇಜ್, ಅಂತೆಕಂತೆಗಳು ದೊಡ್ಡ ಮಟ್ಟಿಗಿವೆ. ಮಹೇಶ್ ಬಾಬು ಅಭಿಮಾನಿಗಳು ಚಿತ್ರದ ಅಪ್ಡೇಟ್ಸ್ಗಾಗಿ ಕಾತರರಾಗಿದ್ದಾರೆ.
ಮೇ.1ರಂದು, ಸತ್ಯದೇವ್ ಅಭಿನಯದ ಕೃಷ್ಣಮ್ಮ ಚಿತ್ರದ ಪ್ರೀ-ರಿಲೀಸ್ ಈವೆಂಟ್ ಹೈದರಾಬಾದ್‌ನಲ್ಲಿ ನಡೆದಿತ್ತು. ಖ್ಯಾತ ನಿರ್ದೇಶಕರುಗಳಾದ ಕೊರಟಾಲ ಶಿವ, ಎಸ್.ಎಸ್.ರಾಜಮೌಳಿ ಮತ್ತು ಅನಿಲ್ ರವಿಪುಡಿ ಒಂದೇ ವೇದಿಕೆಯಲ್ಲಿದ್ದರು. ಮೂವರು ನಿರ್ದೇಶಕರನ್ನು ಒಟ್ಟುಗೂಡಿಸಿದ ಕಾರ್ಯಕ್ರಮದ ಫೋಟೋ, ವಿಡಿಯೋಗಳು ಟ್ವಿಟರ್‌ನಲ್ಲಿ ಟ್ರೆಂಡಿಂಗ್ ಆಗಿದೆ. ರಾಜಮೌಳಿ ಹಾಗೂ ಅನಿಲ್ ನಡುವಿನ ತಮಾಷೆಯ ಕ್ಷಣಗಳು ಸೋಷಿಯಲ್ ಮೀಡಿಯಾದಲ್ಲಿ ಸೌಂಡ್ ಮಾಡುತ್ತಿವೆ.
ಈ ಕಾರ್ಯಕ್ರಮದಲ್ಲಿ ಅನಿಲ್ 'ದೇವರ' ಮತ್ತು 'ಎಸ್ಎಸ್ಎಂಬಿ 29'ರ ಸುತ್ತಲಿರುವ ಉತ್ಸಾಹ ಹೆಚ್ಚಿಸುವ ಕೆಲಸ ಮಾಡಿದರು. 'ಎಸ್ಎಸ್ಎಂಬಿ 29' ಶೂಟಿಂಗ್ ಯಾವಾಗ ಪ್ರಾರಂಭವಾಗುತ್ತದೆ ಎಂದು ರಾಜಮೌಳಿಗೆ ಪ್ರಶ್ನಿಸಿದರು. ಜೂನಿಯರ್ ಎನ್ಟಿಆರ್ ನಟನೆಯ ದೇವರ ಬಗ್ಗೆ ಮಾಹಿತಿ ಕೊಡುವಂತೆ ಕೊರಟಾಲ ಶಿವ ಅವರಲ್ಲಿ ಕೇಳಿದರು. ನಗುವಿನೊಂದಿಗೆ ಎದುರು ಬಂದ ರಾಜಮೌಳಿ ತಮಾಷೆಯಾಗಿ, ಅನಿಲ್ ಅವರಿಗೆ ಹೊಡೆಯುವಂತೆ ಪ್ರೇಕ್ಷಕರನ್ನು ಪ್ರೋತ್ಸಾಹಿಸಿದರು. ಅನಿಲ್ಗೆ ಮುಸುಕು ಹಾಕಿ ಹೊಡೆದರೆ 10 ಸಾವಿರ ರೂ ಕೊಡುತ್ತೇನೆ ಎಂದು ರಾಜಮೌಳಿ ಹೇಳಿದ್ದು, ಪ್ರೇಕ್ಷಕರೂ ಸೇರಿದಂತೆ ವೇದಿಕೆಯಲ್ಲಿದ್ದವರು ನಕ್ಕು ನಕ್ಕು ಸುಸ್ತಾದರು.
ಇದನ್ನೂ ಓದಿ: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ 'ಟಾಕ್ಸಿಕ್' 2 ಭಾಗಗಳಲ್ಲಿ ನಿರ್ಮಾಣ? - Toxic
ಗುಂಟೂರು ಖಾರಂ ಯಶಸ್ಸಿನಲ್ಲಿರುವ ಮಹೇಶ್ ಬಾಬು ಎಸ್ಎಸ್ಎಂಬಿ29ಗಾಗಿ ವಿಶೇಷ ತಯಾರಿ ನಡೆಸುತ್ತಿದ್ದಾರೆ. ತಮ್ಮ ಹೊಸ ನೋಟದ ಮೂಲಕ ಹಲವು ಊಹಾಪೋಹಗಳನ್ನು ಹುಟ್ಟುಹಾಕಿದ್ದಾರೆ. ರಾಜಮೌಳಿ ನಿರ್ದೇಶನದ ಈ ಚಿತ್ರ ಒಂದು ಜಂಗಲ್ ಅಡ್ವೆಂಚರ್ ಎಂದು ವರದಿಗಳಾಗಿವೆ. ಮಹೇಶ್ ಬಾಬು ಅವರ ಪಾತ್ರ ಭಗವಾನ್ ಹನುಮಾನ್‌ನಿಂದ ಪ್ರೇರಿತವಾಗಿದೆ.
ಮತ್ತೊಂದೆಡೆ, ಜೂನಿಯರ್ ಎನ್ಟಿಆರ್ ಮತ್ತು ಜಾಹ್ನವಿ ಕಪೂರ್ ಅಭಿನಯದ ಕೊರಟಾಲ ಶಿವ ಅವರ 'ದೇವರ' ಪ್ರೊಜೆಕ್ಟ್ ಕೂಡ ಬಹಳ ಕುತೂಹಲ ಸೃಷ್ಟಿಸಿದೆ. ಎರಡು ಭಾಗಗಳಲ್ಲಿ ಈ ಚಿತ್ರ ಮೂಡಿಬರಲಿದೆ. ವಿಶ್ವಾದ್ಯಂತ ಸದ್ದು ಮಾಡಿದ ಆರ್ಆರ್ಆರ್ ನಂತರ ಬರುತ್ತಿರುವ ಜೂನಿಯರ್ ಎನ್ಟಿಆರ್ ಮುಖ್ಯಭೂಮಿಕೆಯ ಚಿತ್ರವಿದು. ಎರಡೂ ಚಿತ್ರಗಳ ಅಪ್ಡೇಟ್ಸ್ ಮತ್ತು ಬಿಡುಗಡೆ ದಿನಾಂಕಗಳಿಗಾಗಿ ಅಭಿಮಾನಿಗಳ ಕಾತರ ಹೆಚ್ಚಿಸಿದೆ. ತೆಲುಗು ಚಿತ್ರರಂಗದ ಬಹುನಿರೀಕ್ಷೆಯ ಚಿತ್ರ ಇದು ಎಂಬುದು ಮತ್ತೊಂದು ವಿಶೇಷ ಸಂಗತಿ.
