'ಮೆಟ್ ಗಾಲಾ' ಎಂಬುದು ವಿಶ್ವ ಪ್ರಸಿದ್ಧ ಫ್ಯಾಶನ್ ಈವೆಂಟ್. ಪ್ರತೀ ವರ್ಷ ಮೇ ತಿಂಗಳ ಮೊದಲ ಸೋಮವಾರ (ಭಾರತದಲ್ಲಿ ಮಂಗಳವಾರ ಮುಂಜಾನೆ) ನ್ಯೂಯಾರ್ಕ್ನಲ್ಲಿ ಈ ಫ್ಯಾಶನ್ ಗಾಲಾ ಸಮಾರಂಭ ನಡೆಯುತ್ತದೆ. ಈ ಬಾರಿ ರಾಷ್ಟ್ರಪ್ರಶಸ್ತಿ ವಿಜೇತ ನಟಿ ಆಲಿಯಾ ಭಟ್ ಸೀರೆಯುಟ್ಟು ಅದ್ಭುತವಾಗಿ ಕಾಣಿಸಿಕೊಂಡರು.
ಬಾಲಿವುಡ್ ಬಹುಬೇಡಿಕೆಯ ತಾರೆ ಆಲಿಯಾ ಭಟ್ ಅವರಿಗೆ ಮೆಟ್ ಗಾಲಾ ಹೊಸ ಅನುಭವವೇನಲ್ಲ. ಪ್ರತಿಷ್ಠಿತ ಸಮಾರಂಭದಲ್ಲಿ ಸತತವಾಗಿ ಎರಡನೇ ಬಾರಿಗೆ ಕಾಣಿಸಿಕೊಂಡಿದ್ದು, 2023ರಲ್ಲಿ ಚೊಚ್ಚಲ ಪ್ರವೇಶ ಮಾಡಿದ್ದರು. ಬೆರಗುಗೊಳಿಸುವಂಥ ಸಬ್ಯಸಾಚಿ ಸೀರೆಯಲ್ಲಿ ಆಕರ್ಷಕವಾಗಿ ಕಾಣಿಸಿಕೊಂಡಿದ್ದಾರೆ. ಈ ಮೂಲಕ ಆಲಿಯಾ ಪ್ರೇಕ್ಷಕರು ಮತ್ತು ಛಾಯಾಗ್ರಾಹಕರ ಗಮನ ಸೆಳೆದರು.
ಈ ವರ್ಷದ ಮೆಟ್ ಗಾಲಾ ಥೀಮ್ 'ಸ್ಲೀಪಿಂಗ್ ಬ್ಯೂಟೀಸ್: ರೀವೇಕನಿಂಗ್ ಫ್ಯಾಶನ್'. ಈವೆಂಟ್‌ಗೆ ತಾವು ಆಯ್ಕೆ ಮಾಡಿಕೊಂಡ ಉಡುಪಿನ ಬಗ್ಗೆ ಮಾತನಾಡಿದ ಆಲಿಯಾ ಭಟ್, "ಈವೆಂಟ್‌ನಲ್ಲಿ ಎರಡನೇ ಬಾರಿ ಭಾಗಿಯಾಗಿದ್ದೇನೆ. ಆದರೆ ನಾನು ಮೊದಲ ಬಾರಿಗೆ ಸೀರೆ ಧರಿಸಿದ್ದೇನೆ. ನಾನು 'ಗಾರ್ಡನ್ ಆಫ್ ಟೈಮ್' ಡ್ರೆಸ್ ಕೋಡ್ ಅನ್ನು ಪರಿಗಣಿದ್ದೇನೆ. ಇದು ಟೈಮ್‌ಲೆಸ್‌ ಎಂದು ನಾನು ಭಾವಿಸಿದ್ದೇನೆ. ಸೀರೆಗಿಂತ ಹೆಚ್ಚು ಕಾಲಾತೀತ ಸೌಂದರ್ಯ ಮತ್ತೊಂದಿಲ್ಲ" ಎಂದು ತಿಳಿಸಿದರು.
ಮೆಟ್ ಗಾಲಾ ನೋಟ ವೈರಲ್ ಆಗೋ ಮುನ್ನ ಬ್ಲ್ಯಾಕ್ ಆ್ಯಂಡ್ ವೈಟ್ ಫೋಟೋ ಶೇರ್ ಮಾಡಿ ಅಭಿಮಾನಿಗಳ ಕುತೂಹಲ ಹೆಚ್ಚಿಸಿದ್ದರು. ಕುತೂಹಲಕಾರಿ ಫೋಟೋ ಹಂಚಿಕೊಂಡ ನಟಿ "ಮೆಟ್ ಸೆಟ್ ಗೋ" ಎಂದು ಬರೆದುಕೊಂಡಿದ್ದರು. ಸೀರೆಯಲ್ಲಿನ ನಟಿಯ ಬೆರಗುಗೊಳಿಸುವ ನೋಟ ಕಣ್ತುಂಬಿಕೊಳ್ಳಲು ಅಭಿಮಾನಿಗಳು ಉತ್ಸುಕರಾದರು. ಜಾಗತಿಕ ವೇದಿಕೆಯಲ್ಲಿ ಭಾರತೀಯ ಸಂಸ್ಕೃತಿಯನ್ನು ಪ್ರತಿನಿಧಿಸಿದ ಬಗ್ಗೆ ನಟಿಗೆ ಮೆಚ್ಚುಗೆ ವ್ಯಕ್ತವಾದವು. ಬ್ಲ್ಯಾಕ್ ಆ್ಯಂಡ್ ವೈಟ್ ಫೋಟೋ ಹಂಚಿಕೊಂಡ ಕೆಲವೇ ಕೆಲ ಗಂಟೆಗಳ ಅಂತರದಲ್ಲಿ ಆಲಿಯಾ ಐದು ಸರಣಿ ಕಲರ್ಫುಲ್ ಚಿತ್ರಗಳನ್ನು ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ಎರಡನೇ ಬಾರಿ 'ಮೆಟ್ ಗಾಲಾ'ಗೆ ಸಾಕ್ಷಿಯಾಗಲಿರುವ ಆಲಿಯಾ; ನ್ಯೂಯಾರ್ಕ್ಗೆ ತೆರಳಿದ ನಟಿಯ ವಿಡಿಯೋ - Alia Bhatt
ಆಲಿಯಾ ಭಟ್ 2023ರಲ್ಲಿ ಮೆಟ್ ಗಾಲಾ ಪ್ರವೇಶಿಸಿದರು. ಕಳೆದ ವರ್ಷ ಪ್ರಬಲ್ ಗುರುಂಗ್ ಡಿಸೈನ್ ಮಾಡಿದ್ದ ಉಡುಗೆ ಧರಿಸಿ ಮನಮೋಹಕ ನೋಟ ಬೀರಿದ್ದರು. ಸಣ್ಣ ಮುತ್ತುಗಳಿಂದ ಅಲಂಕರಿಸಲ್ಪಟ್ಟ ದೊಡ್ಡ ಬಿಳಿ ಗೌನ್‌ನಲ್ಲಿ ತಮ್ಮ ಸೊಬಗು ಬೀರಿದ್ದು, ಎಲ್ಲೆಡೆ ಪ್ರಶಂಸೆಗೆ ಪಾತ್ರರಾದರು.
ಇನ್ನೂ ಚೆಲುವೆಯ ಸಿನಿಮಾ ವಿಚಾರ ಗಮನಿಸುವುದಾದರೆ, 'ಜಿಗ್ರಾ' ಚಿತ್ರೀಕರಣವನ್ನು ಪೂರ್ಣಗೊಳಿಸಿದ್ದಾರೆ. ಚಿತ್ರದಲ್ಲಿ ನಟಿಸಿದ್ದಲ್ಲದೇ ನಿರ್ಮಾಪಕಿಯಾಗಿಯೂ ಕೆಲಸ ಮಾಡಿದ್ದಾರೆ. ತಮ್ಮ ಎಟರ್ನಲ್ ಸನ್‌ಶೈನ್ ಪ್ರೊಡಕ್ಷನ್ಸ್ ಮತ್ತು ಕರಣ್ ಜೋಹರ್ ಅವರ ಧರ್ಮ ಪ್ರೊಡಕ್ಷನ್ಸ್ ಸೇರಿ ಸಿನಿಮಾ ನಿರ್ಮಾಣ ಮಾಡಿದ್ದಾರೆ. ಅಲ್ಲದೇ ಖ್ಯಾತ ಚಲನಚಿತ್ರ ನಿರ್ಮಾಣ ಸಂಸ್ಥೆ ಯಶ್ ರಾಜ್ ಫಿಲ್ಮ್ಸ್‌ನ ಮುಂದಿನ ಸ್ಪೈ ಆ್ಯಕ್ಷನ್ ಸಿನಿಮಾಗೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರೆ. ಜೊತೆಗೆ ಸಂಜಯ್ ಲೀಲಾ ಬನ್ಸಾಲಿ ಅವರ ಲವ್ ಆ್ಯಂಡ್ ವಾರ್‌ ಸಿನಿಮಾದಲ್ಲಿ ಪತಿ ರಣ್ಬೀರ್ ಕಪೂರ್ ಮತ್ತು ವಿಕ್ಕಿ ಕೌಶಲ್ ಜೊತೆ ನಟಿಸಲಿದ್ದಾರೆ.
