ಬೆಂಗಳೂರು: ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ನಿರ್ಣಾಯಕ ಹಣಾಹಣಿಯಲ್ಲಿ ಅಂತಿಮ ಓವರ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಗೆಲುವಿನಲ್ಲಿ ಹೀರೋ ಆಗಿ ಹೊರಹೊಮ್ಮಿದ ಯಶ್ ದಯಾಳ್ ಅವರನ್ನು ಕೆಕೆಆರ್ ತಂಡದ ಸ್ಟಾರ್ ಫಿನಿಶರ್ ರಿಂಕು ಸಿಂಗ್ ಶ್ಲಾಘಿಸಿದ್ದಾರೆ. ಕೊನೆಯ ಓವರ್ನಲ್ಲಿ ತೋರಿದ ಯಶ್ ದಯಾಳ್ ಅದ್ಭುತ ಬೌಲಿಂಗ್ ಪ್ರದರ್ಶನದಿಂದಾಗಿ ಫಾಫ್ ಡು ಪ್ಲೆಸಿಸ್ ತಂಡವು ಪ್ಲೇಆಫ್ ಸ್ಥಾನವನ್ನು ಖಚಿತಪಡಿಸಿದೆ. ಈ ಮೂಲಕ ದಯಾಳ್ ಸುಮಾರು ಒಂದು ವರ್ಷದ ಬಳಿಕ ಮತ್ತೊಮ್ಮೆ ಕ್ರಿಕೆಟ್ ಜಗತ್ತಿನ ಗಮನ ಸೆಳೆದಿದ್ದಾರೆ.
ಕಳೆದ ವರ್ಷದ ಐಪಿಎಲ್ನಲ್ಲಿ ಗುಜರಾತ್ ಟೈಟಾನ್ಸ್ ಪರ ಆಡುತ್ತಿದ್ದ ಯಶ್ ದಯಾಳ್ ತಮ್ಮ ದುಬಾರಿ ಬೌಲಿಂಗ್ನಿಂದ ಸುದ್ದಿಯಾಗಿದ್ದರು. ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡಕ್ಕೆ ಕೊನೆಯ ಓವರ್ನಲ್ಲಿ 29 ರನ್ಗಳ ಅವಶ್ಯಕತೆಯಿತ್ತು. ಆಗ ಯಶ್ ದಯಾಳ್ ಎಸೆದ ಓವರ್ನಲ್ಲಿ ರಿಂಕು ಸಿಂಗ್ ಭರ್ಜರಿ ಐದು ಸಿಕ್ಸರ್ ಸಿಡಿಸಿ ತಂಡಕ್ಕೆ ಜಯ ತಂದುಕೊಟ್ಟಿದ್ದರು. ಐದು ಸಿಕ್ಸರ್ ಚಚ್ಚಿಸಿಕೊಂಡು ಯಶ್ ಟೀಕೆಗೆ ಗುರಿಯಾಗಿದ್ದರು. ಇದೀಗ ಅದೇ ಯಶ್ ಅವರು, ಭರ್ಜರಿ ಕಮ್ಬ್ಯಾಕ್ ಮಾಡಿದ್ದಾರೆ. ಸುಮಾರು ಒಂದು ವರ್ಷದ ಬಳಿಕ ಕೊನೆಯ ಓವರ್ನಲ್ಲಿ ಬೆಂಗಳೂರು ತಂಡಕ್ಕೆ ಜಯ ತಂದುಕೊಟ್ಟಿದ್ದಾರೆ.
ಹೇಗಿತ್ತು ಕೊನೆಯ ಓವರ್?: 219 ರನ್ ಗೆಲುವಿನ ಟಾರ್ಗೆಟ್ ಪಡೆದ ಸೂಪರ್ ಕಿಂಗ್ಸ್ಗೆ ಕೊನೆಯ ಓವರ್ನಲ್ಲಿ 17 ರನ್ ಬಾರಿಸಿದರೆ ಪ್ಲೇಆಫ್ ಹಂತಕ್ಕೇರುವ ಅವಕಾಶವಿತ್ತು. ಆಗ ಯಶ್ ದಯಾಳ್ ಬೌಲಿಂಗ್ ದಾಳಿಗಿಳಿದರು. ಮೊದಲ ಬಾಲ್ನಲ್ಲೇ ಯಾರ್ಕರ್ ಹಾಕುವಲ್ಲಿ ಎಡವಿದ್ದು, ಧೋನಿ ಸಿಕ್ಸರ್ ಸಿಡಿಸುವ ಮೂಲಕ ಆಘಾತ ನೀಡಿದ್ದರು. ಆದರೆ, ಮರು ಎಸೆತದಲ್ಲೇ ಧೋನಿ ವಿಕೆಟ್ ಪಡೆದ ಯಶ್, ಆರ್ಸಿಬಿಗೆ ಮೇಲುಗೈ ಸಾಧಿಸಲು ನೆರವಾದರು. ಬಳಿಕ ಮೂರನೇ ಎಸೆತದಲ್ಲಿ ಶಾರ್ದುಲ್ ಠಾಕೂರ್ಗೆ ರನ್ ಗಳಿಸಲಾಗಲಿಲ್ಲ. ನಾಲ್ಕನೇ ಬೌಲ್ನಲ್ಲಿ ಶಾರ್ದುಲ್ ಒಂದು ರನ್ ತೆಗೆದುಕೊಂಡರು. ಅಂತಿಮ ಎರಡು ಎಸೆತಗಳಲ್ಲಿ ಚೆನ್ನೈಗೆ 10 ರನ್ ಬೇಕಿದ್ದವು. ಆಗ ಜಡೇಜಾ ಸ್ಟ್ರೈಕ್ನಲ್ಲಿದ್ದರು. ಎರಡೂ ಎಸೆತಗಳಲ್ಲಿ ಜಡೇಜಾರನ್ನು ಕಟ್ಟಿಹಾಕಿದ ಯಶ್ ದಯಾಳ್, ಬೆಂಗಳೂರು ತಂಡವನ್ನು ಪ್ಲೇಆಫ್ಗೆ ಕೊಂಡೊಯ್ದರು. ಬಳಿಕ ಮೈದಾನದಲ್ಲಿ ಓಡುತ್ತ ಸಂಭ್ರಮಾಚರಿಸಿದ ದಯಾಳ್, ಈ ಹಿಂದೆ ತಾವೆದುರಿಸಿದ ಟೀಕೆಗಳಿಗೆ ಯಶಸ್ಸಿನ ಮೂಲಕ ಪ್ರತ್ಯುತ್ತರ ರವಾನಿಸಿದರು.
ರಿಂಕು ಶ್ಲಾಘನೆ: ಯಶ್ ಪ್ರದರ್ಶನಕ್ಕೆ ಪ್ರತಿಕ್ರಿಯಿಸಿರುವ ರಿಂಕು ಸಿಂಗ್ ವಿಶೇಷ ಪೋಸ್ಟ್ ಹಾಕಿದ್ದಾರೆ. ಇನ್ಸ್ಟಾಗ್ರಾಂ ಸ್ಟೋರಿಯಲ್ಲಿ ಸೆಲ್ಯೂಟ್ ಎಮೋಜಿಯೊಂದಿಗೆ, 'ದೇವರ ಪ್ಲಾನ್ ಬೇಬಿ' (God's plan baby) ಎಂದು ರಿಂಕು ಬರೆದುಕೊಂಡಿದ್ದಾರೆ. ಜೊತೆಗೆ, ಮಾಜಿ ಕ್ರಿಕೆಟಿಗರು, ಸಹ ಆಟಗಾರರು, ಅಭಿಮಾನಿಗಳು ಸೇರಿದಂತೆ ಕ್ರಿಕೆಟ್ ಜಗತ್ತಿನ ಹಲವರು ಯಶ್ ಅವರನ್ನು ಪ್ರಶಂಸಿಸಿ ಶುಭಾಶಯ ಕೋರಿದ್ದಾರೆ. ಕಳೆದ ಐಪಿಎಲ್ನಲ್ಲಿ ಭಾರಿ ಟೀಕೆ ಅನುಭವಿಸಿದ್ದ ದಯಾಳ್ ಅವರನ್ನು ಆರ್ಸಿಬಿಯು ಹರಾಜಿನಲ್ಲಿ 5 ಕೋಟಿ ರೂ.ಗೆ ಖರೀದಿಸಿತ್ತು.
ಇದನ್ನೂ ಓದಿ: ಪಂದ್ಯ ಪುರುಷ ಗೌರವ ಯಶ್ ದಯಾಳ್ಗೆ ಅರ್ಪಿಸುತ್ತೇನೆ: ಆರ್‌ಸಿಬಿ ನಾಯಕನಿಂದ ಶ್ಲಾಘನೆ - Du Plessis praises Yash Dayal
