ಹಾರ ಬದಲಿಸಿಕೊಂಡು ಸರಳ​ ವಿವಾಹವಾದ ಐಎಎಸ್​, ಐಪಿಎಸ್​ ಅಧಿಕಾರಿಗಳು: ವಿಡಿಯೋ ನೋಡಿ

ಮಚಲಿಪಟ್ಟಣಂ (ಆಂಧ್ರಪ್ರದೇಶ) : ವಿವಾಹ ಎಂದರೆ ಅದೊಂದು ಸಂಭ್ರಮ, ಅದ್ಧೂರಿತನ, ಬಂಧು ಬಾಂಧವರ ಸದ್ದು ಗದ್ದಲವಿರುತ್ತೆ. ಗಂಡು- ಹೆಣ್ಣಿಗೆ ನೂರಾರು ಕನಸುಗಳು ಕೋರೈಸುತ್ತಿರುತ್ತವೆ. ಆದರೆ ಇಲ್ಲಿಬ್ಬರು ಅಧಿಕಾರಿಗಳು ಮಾತ್ರ ಯಾವುದೇ ಸದ್ದುಗದ್ದಲವಿಲ್ಲದೇ ಸಿಂಪಲ್​ ಆಗಿ ಮದುವೆಯಾಗಿ ಆದರ್ಶ ಮೆರೆದಿದ್ದಾರೆ. ರಿಜಿಸ್ಟ್ರಾರ್​ ಆಫೀಸಿನಲ್ಲಿ ನೋಂದಣಿ ಮಾಡಿಕೊಳ್ಳುವ ಮೂಲಕ ಗೃಹಸ್ಥಾಶ್ರಮಕ್ಕೆ ಕಾಲಿಟ್ಟಿದ್ದಾರೆ.

ಐಎಎಸ್​ ಅಧಿಕಾರಿ ಡಾ.ಅಪರಾಜಿತ ಸಿಂಗ್​ ಸಿನ್ವರ್​​, ಐಪಿಎಸ್​ ತರಬೇತಿ ಪಡೆಯುತ್ತಿರುವ ದೇವೇಂದ್ರ ಕುಮಾರ್ ಆದರ್ಶ ವಿವಾಹವಾದ ಅಧಿಕಾರಿಗಳು. ಇಬ್ಬರೂ ರಾಜಸ್ಥಾನ ಮೂಲದವರಾಗಿದ್ದಾರೆ. ಅಪರಾಜಿತ ಸಿಂಗ್​ ಆಂಧ್ರಪ್ರದೇಶದ ಕೃಷ್ಣಾ ಜಿಲ್ಲೆಯ ಮಚಲಿಪಟ್ಟಣಂನಲ್ಲಿ ಜಂಟಿ ಜಿಲ್ಲಾಧಿಕಾರಿಯಾಗಿದ್ದಾರೆ. ದೇವೇಂದ್ರಕುಮಾರ್​ ಹೈದರಾಬಾದ್‌ನ ಪೊಲೀಸ್ ಅಕಾಡೆಮಿಯಲ್ಲಿ ತರಬೇತಿ ಪಡೆಯುತ್ತಿದ್ದಾರೆ.

ಮಚಲಿಪಟ್ಟಣಂ ಕಲೆಕ್ಟರೇಟ್‌ನಲ್ಲಿರುವ ಜಿಲ್ಲಾ ನೋಂದಣಾಧಿಕಾರಿ ಕಚೇರಿಯಲ್ಲಿ ಬುಧವಾರ ಸಹೋದ್ಯೋಗಿಗಳು, ಸಿಬ್ಬಂದಿ ಸಮ್ಮಖದಲ್ಲಿ ಹಾರ ಬದಲಿಸುವ ಮೂಲಕ ವಿವಾಹವಾದರು. ಮದುವೆಗೆ ಸ್ವತಃ ಅವರ ಬಂಧುಗಳು ಯಾರೊಬ್ಬರೂ ಇರಲಿಲ್ಲ. ಐಪಿಎಸ್​, ಐಎಎಸ್​ ಅಧಿಕಾರಿಗಳಿದ್ದರೂ, ಸರಳ ವಿವಾಹವಾಗಿದ್ದು ಅಚ್ಚರಿ ಮೂಡಿಸಿದೆ. ಮದುವೆಯ ನಂತರ ನವ ದಂಪತಿ ಗುಡ್ಲವಲ್ಲೇರು ಮಂಡಲದ ವೇಮಾವರಂನಲ್ಲಿರುವ ಶ್ರೀಕೊಂಡಲಮ್ಮ ಅಮ್ಮನವರ ದರ್ಶನಕ್ಕೆ ತೆರಳಿದರು.

ಇದನ್ನೂ ಓದಿ: Sana Khan: ಇನ್ನೂ ಪತ್ತೆಯಾಗದ ಬಿಜೆಪಿ ನಾಯಕಿ ಸನಾ ಖಾನ್; ಪೊಲೀಸರಿಂದ ತನಿಖೆ ಚುರುಕು