ಸಮುದ್ರ ತೀರಕ್ಕೆ ಕೊಚ್ಚಿಕೊಂಡು ಬಂದ ಬ್ರಿಟಿಷರ ಕಾಲದ ಬೃಹತ್ ಮರದ ಪೆಟ್ಟಿಗೆ... ಒಡೆದಾಗ ಸಿಕ್ಕಿದೇನು?.. ವಿಡಿಯೋ

ವಿಶಾಖಪಟ್ಟಣಂ (ಆಂಧ್ರ ಪ್ರದೇಶ): ಆಂಧ್ರ ಪ್ರದೇಶದ ವಿಶಾಖಪಟ್ಟಣಂ ಸಮುದ್ರ ತೀರಕ್ಕೆ ಬೃಹತ್ ಮರದ ಪೆಟ್ಟಿಗೆಯೊಂದು ಕೊಚ್ಚಿಕೊಂಡು ಬಂದ ಘಟನೆ ನಡೆದಿದೆ. ಇದು ಬ್ರಿಟಿಷರ ಕಾಲದ ಪೆಟ್ಟಿಗೆ ಹಾಗೂ ಸುಮಾರು 100 ಟನ್​ ತೂಕ ಇರುವ ಶಂಕೆಯನ್ನು ಪೊಲೀಸರು ವ್ಯಕ್ತಪಡಿಸಿದ್ದಾರೆ. ಮುನ್ನೆಚ್ಚರಿಕೆ ಕ್ರಮವಾಗಿ ಬಾಂಬ್​ ನಿಷ್ಕ್ರಿಯ ದಳದ ಸಮ್ಮುಖದಲ್ಲಿ ಪೆಟ್ಟಿಗೆಯನ್ನು ಪೊಲೀಸರು ಒಡೆದಿದ್ದು, ಯಾವುದೇ ಹಾನಿಕಾರಕ ವಸ್ತುಗಳು ಪತ್ತೆಯಾಗಿಲ್ಲ.

ಇಲ್ಲಿನ ವೈಎಂಸಿಎ ಬೀಚ್‌ನಲ್ಲಿ ಶುಕ್ರವಾರ ಬೃಹತ್ ಮರದ ಪೆಟ್ಟಿಗೆಯು ಕೊಚ್ಚಿ ಬಂದ ವಿಷಯ ತಿಳಿದ ಜನರು ಇದನ್ನು ನೋಡಲು ಮುಗಿಬಿದ್ದಿದ್ದರು. ಈ ವಿಷಯ ತಿಳಿದ ಪೊಲೀಸರು ಸಹ ಸ್ಥಳಕ್ಕೆ ಆಗಮಿಸಿ ಪರಿಶೀಲನೆ ನಡೆಸಿದ್ದಾರೆ. ಅಲ್ಲದೇ, ಪುರಾತನ ಕಾಲದ ಮರದ ಪೆಟ್ಟಿಗೆಯಾಗಿದ್ದರಿಂದ ಪೊಲೀಸರು ಪುರಾತತ್ವ ಇಲಾಖೆಗೂ ಮಾಹಿತಿ ನೀಡಿದ್ದಾರೆ.  ಸಮುದ್ರ ದಡಕ್ಕೆ ಕೊಚ್ಚಿಕೊಂಡು ಬಂದ ಈ ಬೃಹತ್​ ಪೆಟ್ಟಿಗೆ ಬಗ್ಗೆ ಜನರಲ್ಲಿ ತೀವ್ರ ಕುತೂಹಲಕ್ಕೆ ಕಾರಣವಾಗಿತ್ತು. 

ಅಷ್ಟೇ ಅಲ್ಲ,  ಮರದ ಪೆಟ್ಟಿಗೆ ಬಗ್ಗೆ ಊಹಾಪೋಹಗಳು ಹಬ್ಬಿದ್ದವು. ಆದ್ದರಿಂದ ಬಹಳ ಎಚ್ಚರಿಕೆಯಿಂದ ಎರಡು ಹಿಟಾಚಿಗಳ ಸಹಾಯದಿಂದ ಪಟ್ಟಿಗೆಯನ್ನು ಒಡೆಯಲಾಯಿತು.  ಬಾಂಬ್​ ನಿಷ್ಕ್ರಿಯ ದಳದವರು ಕೂಡ ಈ ಸಮಯದಲ್ಲಿ ಹಾಜರಿದ್ದರು.  ಪೆಟ್ಟಿಗೆಯಲ್ಲಿ ಯಾವುದೇ ಹಾನಿಕಾರಕ ವಸ್ತುಗಳು ಕಂಡುಬಂದಿಲ್ಲ. ಇದರಿಂದ ಜಿಲ್ಲಾಡಳಿತ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದೆ. ಈ ಪಟ್ಟಿಗೆಯು ಸಮುದ್ರದಲ್ಲಿ ಹಡಗುಗಳನ್ನು ಲಂಗರು ಹಾಕಲು ಬಳಸುವ ಮರದ ಜೋಡಣೆ ಎಂದು ತಿಳಿದು ಬಂದಿದೆ.

ಇದನ್ನೂ ಓದಿ: ಆಸ್ಟ್ರೇಲಿಯಾ ಕಡಲ ತೀರದಲ್ಲಿ ಭಾರಿ ಕುತೂಹಲ ಕೆರಳಿಸಿದ ಬೃಹತ್‌ ಗಾತ್ರದ ವಸ್ತು: ಇದು ಭಾರತದ ರಾಕೆಟ್‌ನ ಭಾಗವೇ? ISRO ಹೇಳಿದ್ದೇನು?