ಮೈಸೂರು: ಡಿಎಫ್‌ಆರ್‌ಎಲ್ (ರಕ್ಷಣಾ ಆಹಾರ ಸಂಶೋಧನಾ ಪ್ರಯೋಗಾಲಯ) ನೂತನ ತಂತ್ರಜ್ಞಾನದ 3 ವಾಣಿಜ್ಯ ಉತ್ಪನ್ನಗಳ ಬಿಡುಗಡೆ ಕಾರ್ಯಕ್ರಮ ಇಂದು ಮೈಸೂರಿನಲ್ಲಿ ನಡೆಯಿತು. ವಾಣಿಜ್ಯ ಉದ್ದೇಶಕ್ಕಾಗಿ ತನ್ನ ತಂತ್ರಜ್ಞಾನದಲ್ಲಿ ಸುಲಭವಾಗಿ ಮಣ್ಣಿನಲ್ಲಿ ಕರಗುವ ತಂತ್ರಜ್ಞಾನ, ಗ್ರೀನ್ ಟೆಕ್, ಮಿಲ್ಕ್ ಟೆಸ್ಟ್ ಕಿಟ್ ತಂತ್ರಜ್ಞಾನವನ್ನು ಈ ಸಮ್ಮೇಳನದಲ್ಲಿ ಬಿಡುಗಡೆ ಮಾಡಲಾಯಿತು. ಖಾಸಗಿ ಸ್ಟಾರ್ ಹೋಟೆಲ್ನಲ್ಲಿ ಡಿಎಫ್‌ಆರ್‌ಎಲ್, ಡಿಆರ್‌ಡಿಓ, ರಕ್ಷಣಾ ಸಚಿವಾಲಯ ಭಾರತ ಸರ್ಕಾರದ ಸಹಯೋಗದೊಂದಿಗೆ ಈ ಕಾರ್ಯಕ್ರಮ ನಡೆಯಿತು.
ವಿವಿಧ ಭೂ ಪ್ರದೇಶದಲ್ಲಿ ರಕ್ಷಣಾ ಪಡೆಗಳ ಸುಸ್ಥಿರತೆಗಾಗಿ ಭವಿಷ್ಯದ ಕಾರ್ಯತಂತ್ರಗಳ ಕುರಿತು 3 ದಿನಗಳ ಕಾಲ ರಾಷ್ಟ್ರೀಯ ಸಮ್ಮೇಳನ ಅಯೋಜನೆ ಮಾಡಲಾಗಿದೆ. ಸಮ್ಮೇಳನದಲ್ಲಿ ಆಹಾರ ವಿಜ್ಞಾನಿಗಳು, ಸೇನೆಯ ಹಿರಿಯ ಅಧಿಕಾರಿಗಳು, ಆಹಾರೋದ್ಯಮಿಗಳು ಮತ್ತು ಶಿಕ್ಷಣ ತಜ್ಞರನ್ನು ಒಟ್ಟಿಗೆ ಸೇರಿಸಲಾಗಿದೆ. ಭೂ ಸೇನೆ, ವಾಯು ಸೇನೆ, ನೌಕಾ ದಳ ಮತ್ತು ಸಶಸ್ತ್ರ ಸೇನೆಯ ಅನುಭವಗಳನ್ನು ಹಾಗೂ ಅವು ಎದುರಿಸುತ್ತಿರುವ ಸವಾಲುಗಳನ್ನು ಕೂಲಂಕಷವಾಗಿ ಚರ್ಚಿಸಿ, ಆಧುನಿಕ ತಂತ್ರಜ್ಞಾನದ ಮೂಲಕ ಪರಿಹರಿಸುವ ಪ್ರಯತ್ನ ಈ ಸಮ್ಮೇಳನದ ಉದ್ದೇಶವಾಗಿದೆ.
ಸೇನಾ ಕಾರ್ಯ ಕ್ಷಮತೆಯನ್ನು ಉತ್ತಮಗೊಳಿಸಲು ಸಂಶೋಧನೆ ಮತ್ತು ಅಭಿವೃದ್ಧಿ, ಸುಸ್ಥಿರ ಆಹಾರ ಪ್ಯಾಕೇಜಿಂಗ್ ಅಭಿವೃದ್ಧಿ, ಆಹಾರ ಸಂಸ್ಕರಣೆಗಾಗಿ ಹೈಬ್ರಿಡ್ ತಂತ್ರಜ್ಞಾನ ಸೇರಿದಂತೆ ಸೇನೆಗೆ ಉತ್ತಮ ಆಹಾರ ಒದಗಿಸುವ ತಂತ್ರಜ್ಞಾನದ ಬಗ್ಗೆ ಈ ಸಮ್ಮೇಳನದಲ್ಲಿ 3 ದಿನಗಳ ಕಾಲ ತಜ್ಞರಿಂದ ಚರ್ಚೆ ನಡೆಸಲಾಗುತ್ತದೆ. ಮೈಸೂರಿನ ಡಿಎಫ್‌ಆರ್‌ಎಲ್ ಸೇನೆಯ ಆಹಾರಕ್ಕೆ ಸಂಬಂಧಿಸಿದ ರೆಡಿ_ಟು_ಈಟ್ ಹಾಗೂ ಪೌಷ್ಟಿಕ ಆಹಾರಗಳನ್ನು ಸಂಶೋಧನೆ ಮಾಡಲಾಗಿದ್ದು, ಇದರ ಜೊತೆಗೆ ಬಾಹ್ಯಾಕಾಶಕ್ಕೆ ಪ್ರಯಾಣ ಬೆಳೆಸುವ ಗಗನಯಾತ್ರಿಗಳಿಗೂ ಪೌಷ್ಟಿಕ ಆಹಾರ ಕಂಡುಹಿಡಿಯಲಾಗುತ್ತಿದೆ.
ಇದನ್ನೂ ಓದಿ :ವೈದ್ಯಕೀಯ ಕಲಿಕೆಗೂ ತಂತ್ರಜ್ಞಾನದ ಟಚ್; ಡಿಜಿಟೈಸನ್ ಮೂಲಕ ವೈದ್ಯಲೋಕದಲ್ಲೂ ಹಲವು ಬದಲಾವಣೆ
