ವಿಜಯನಗರ : ಚಳಿಗಾಲದ ವಲಸೆಗಾರ ಸೈಬೀರಿಯನ್ ರೂಬಿಥ್ರೋಟ್ (ಕ್ಯಾಲಿಯೋಪ್) ಎಂಬ ಅಪರೂಪದ ಪಕ್ಷಿ ಹಂಪಿ ಪ್ರದೇಶದಲ್ಲಿ ಕಾಣಸಿಕ್ಕಿದೆ. ಸೈಬೀರಿಯಾದ ಕೋನಿಫೆರಸ್ ಕಾಡುಗಳಲ್ಲಿ ಸಂತಾನೋತ್ಪತ್ತಿ ಮಾಡುವ ಈ ಪಕ್ಷಿಯು ಭಾರತ, ಥಾಯ್ಲೆಂಡ್, ಇಂಡೋನೇಷ್ಯಾ ಮತ್ತು ಬಾಂಗ್ಲಾ ದೇಶದಲ್ಲಿ ಇದನ್ನು ಚಳಿಗಾಲದ ವಲಸೆ ಪಕ್ಷಿ ಎಂದು ಕರೆಯುತ್ತಾರೆ. ವಿಜಯನಗರದಲ್ಲಿ ಛಾಯಾಗ್ರಾಹಕ ನಾಗರಾಜ್‌.ಡಿ ಅವರು ದರೋಜಿ ಕರಡಿಧಾಮದ ಪರಿಸರದಲ್ಲಿ ಈ ಬಾನಡಿಯ ಫೋಟೋ ಕ್ಲಿಕ್ಕಿಸಿದ್ದಾರೆ. ಈ ಪಕ್ಷಿಯೊಂದಿಗೆ 'ನವರಂಗ' (ಇಂಡಿಯನ್ ಪಿಟ್ಟ) ಪ್ಯಾನ್ ಟೈಲ್ ಫೈ ಕ್ಯಾಚರ್, ಟಿಕಲ್ಸ್ ಬ್ಲೂ ಫೈ ಕ್ಯಾಚರ್, ಬ್ಲಾಕ್ ರೆಡ್ ಸ್ಪಾಟ್ ಎಂಬ ಅಪರೂಪದ ಪಕ್ಷಿಗಳೂ ಇದ್ದವು ಎಂದು ಅವರು ತಿಳಿಸಿದ್ದಾರೆ.
ಇದುವರೆಗೆ ಈ ಪಕ್ಷಿಯನ್ನು ನೋಡಿಲ್ಲ ಎಂದು ಪರಿಸರ ಮಾರ್ಗದರ್ಶಿ, ವನ್ಯಜೀವಿ ಛಾಯಗ್ರಾಹಕ ಪಂಪಯ್ಯಸ್ವಾಮಿ ಮಠ ಹೇಳಿದರು. "ಇದು ವಲಸೆ ಪಕ್ಷಿ. ಹಂಪಿ ಪ್ರದೇಶದಲ್ಲಿ ಇದೇ ಮೊದಲ ಬಾರಿಗೆ ನೋಡಲು ಸಿಕ್ಕಿದೆ. ಬೆಂಗಳೂರು, ಪಶ್ಚಿಮಘಟ್ಟ ಹಾಗೂ ತಮಿಳುನಾಡಿನ ನೀಲಗಿರಿ ಪ್ರದೇಶದಲ್ಲಿ ಈ ಹಿಂದೆ ಕಾಣಿಸಿಕೊಂಡಿತ್ತು. ಹವಾಮಾನ ಬದಲಾವಣೆಯಿ೦ದಾಗಿ ಉತ್ತರ ಧ್ರುವದಲ್ಲಿ ಉಷ್ಣಾಂಶ ಹೆಚ್ಚಾಗುತ್ತಿದ್ದು ವಲಸೆ ಹಕ್ಕಿಗಳು ದಕ್ಷಿಣ ಭೂಭಾಗಕ್ಕೆ ಬರುತ್ತಿವೆ" ಎಂದು ಪಕ್ಷಿ ಸಂಶೋಧಕ ಸಮದ್‌ ಕೊಟ್ಟೂರು ಹೇಳಿದರು.
ಇದನ್ನೂ ಓದಿ: 11 ವರ್ಷಗಳ ಬಳಿಕ ಹಕ್ಕಿ ಗಣತಿ: ಬಿಳಿಗಿರಿ ಬನದಲ್ಲಿ 274 ಪಕ್ಷಿ ಗುರುತು
