ಬೆಂಗಳೂರು: ಲಾಕ್ಡೌನ್ ಸದ್ಯಕ್ಕೆ ಬಡವರ ಜೀವನವನ್ನು ಸಂಕಷ್ಟಕ್ಕೆ ನೂಕಿದೆ. ನಿರ್ಗತಿಕರು ಒ‌ಂದೊತ್ತು ಊಟಕ್ಕೆ ದಾನಿಗಳನ್ನು ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಇಂತವರ ಕಷ್ಟಕ್ಕೆ ಮಿಡಿದ ಇಬ್ಬರು ಎಸ್ಎಸ್ಎಲ್ಸಿ ವಿದ್ಯಾರ್ಥಿನಿಯರು ಸಮಾಜಮುಖಿ ಕೆಲಸ ಮಾಡಿ ಸದ್ಯ ಎಲ್ಲರ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಸಿಲಿಕಾನ್ ಸಿಟಿ ನಿವಾಸಿಗಳಾದ ಟಿಯಾ ಪೂವಯ್ಯ ಹಾಗೂ ನಿಖಿತಾ ಖನ್ವಾ ಎಂಬ ಇಬ್ಬರು ಸ್ನೇಹಿತೆಯರು ಸದ್ಯ ಎಸ್ಎಸ್ಎಲ್ಸಿ ಪರೀಕ್ಷೆಗೆ ತಯಾರಾಗಬೇಕಿತ್ತು. ಈ ವೇಳೆ ಓದಿಗಾಗಿ, ಪರೀಕ್ಷಾ ತಯಾರಿಗೆ ಸಮಯ ಮೀಸಲಿಡಬೇಕಿದ್ದ ಅವರು ಸಮಾಜಸೇವೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಅದರಲ್ಲೂ ಮಹಿಳೆಯರ ಆರೋಗ್ಯ ಕಾಪಾಡುವ ನಿಟ್ಟಿನಲ್ಲಿ ಇಬ್ಬರು ದಿಟ್ಟ ನಿರ್ಧಾರ ತೆಗೆದುಕೊಂಡು ಮಹಿಳೆಯರಿಗೆ ಬೇಕಾದ ಸ್ಯಾನಿಟರಿ ಪ್ಯಾಡ್, ಮಾಸ್ಕ್ ಇರುವ ಸಾವಿರ ಕಿಟ್ಗಳನ್ನು ಮಹಿಳೆಯರಿಗೆ ಹಂಚುತ್ತಿದ್ದಾರೆ.
ಈ ಕಿಟ್ಗಳಿಗೆ ತಮ್ಮ ಸಂಬಂಧಿಕರು, ಸ್ನೇಹಿತರು ಮುಂತಾದವರ ಬಳಿ ಇನ್ಸ್ಟಾಗ್ರಾಂನಲ್ಲಿ ಹಣ ಸಂಗ್ರಹಿಸಿದ್ದಾರೆ. ಅವುಗಳನ್ನು ಹೇಗೆ ಮಹಿಳೆಯರಿಗೆ ತಲುಪಿಸಬೇಕೆಂದು ತಿಳಿಯದೇ ಇದ್ದಾಗ ಕೋರಮಂಗಲ ಪೊಲೀಸ್ ಠಾಣೆಯ ಸಬ್ ಇನ್ಸ್ಪೆಕ್ಟರ್ ಈಶ್ವರಿ ಅವರನ್ನು ನೂಪುರ್ ಎಂಬುವರ ಸಹಾಯದಿಂದ ಭೇಟಿಯಾಗಿದ್ದಾರೆ.
ಈಗಾಗಲೇ ಈಶ್ವರಿಯವರು ಬಡಜನರಿಗೆ, ಮಹಿಳೆಯರಿಗೆ ಲಾಕ್ಡೌನ್ ಸಂದರ್ಭದಲ್ಲಿ ಸಹಾಯ ಮಾಡಿ ಹೆಸರುವಾಸಿಯಾಗಿದ್ದು, ಬೆಂಗಳೂರು ಆಗ್ನೇಯ ವಿಭಾಗದ ಬಡ ಮಹಿಳೆಯರಿಗೆ ಈಶ್ವರಿ ಅವರ ನೇತೃತ್ವದಲ್ಲಿ ಟಿಯಾ ಪೂವಯ್ಯ ಹಾಗೂ ನಿಖಿತಾ ಖನ್ವಾ ನ್ಯಾಪ್ಕಿನ್, ಶಾಂಪೂ, ಸೋಪ್, ಮಾಸ್ಕ್ ಒಳಗೊಂಡ ಕಿಟ್ಗಳನ್ನು ವಿತರಿಸಲಾಗಿದೆ. ಮಹಿಳೆಯರಿಗೆ ನೆರವಾಗಲು ಬಂದಿರುವ ಈ ವಿದ್ಯಾರ್ಥಿನಿಯರ ಕಾರ್ಯಕ್ಕೆ ಪ್ರಶಂಸೆ ವ್ಯಕ್ತವಾಗಿದೆ.
