ದೇವನಹಳ್ಳಿ: ಬೆಳಗ್ಗೆಯಿಂದ ದಟ್ಟವಾದ ಮಂಜು ಕವಿದ ಹಿನ್ನೆಲೆ ವಿಮಾನ ಹಾರಾಟದಲ್ಲಿ ಭಾರಿ ವ್ಯತ್ಯಯವಾಗಿದೆ. ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ವಿಮಾನಗಳ ಹಾರಾಟಕ್ಕೆ ದಟ್ಟ ಮಂಜು ಬ್ರೇಕ್ ಹಾಕಿದೆ. ಕಳೆದ 2 ಗಂಟೆಯಿಂದ ಯಾವುದೇ ವಿಮಾನಗಳು ಟೇಕ್ ಆಪ್ ಆಗಿಲ್ಲ. ಸುಮಾರು 34 ವಿಮಾನಗಳು ಟೇಕ್ ಆಪ್ ಆಗಲು ಕಾಯುತ್ತಿವೆ. ವಿಮಾನ ಹಾರಾಟದಲ್ಲಿ ಭಾರಿ ವ್ಯತ್ಯಯ ಉಂಟಾಗಿದ್ದು, ವಿಮಾನಗಳಲ್ಲೆ ಪ್ರಯಾಣಿಕರು ಕುಳಿತುಕೊಂಡಿದ್ದಾರೆ ಎನ್ನಲಾಗಿದೆ.
ದಟ್ಟ ಮಂಜು ಕರಗಿದ ಬಳಿಕ ಒಂದೊಂದೇ ವಿಮಾನಗಳು ಏರ್ಪೋರ್ಟ್ನಿಂದ ಟೇಕ್ ಆಪ್ ಆಗಲಿವೆ. ವಿಮಾನಗಳ ನಿರ್ಗಮನ ಸಮಯದಲ್ಲಿ ಸ್ವಲ್ಪ ಬದಲಾವಣೆಯಾಗಲಿದೆ.
ದೆಹಲಿಯಲ್ಲೂ ಅಧಿಕ ಮಂಜಿಗೆ 200 ವಿಮಾನ ಹಾರಾಟದಲ್ಲಿ ವಿಳಂಬ: ರಾಜಧಾನಿ ದೆಹಲಿಯಲ್ಲೂ ಮಂಜಿನ ಮಟ್ಟ ಅಧಿಕವಾಗಿದ್ದು ಹವಾಮಾನ ಇಲಾಖೆ ಎಲ್ಲೋ ಅಲರ್ಟ್ ನೀಡಿದೆ. ಗರಿಷ್ಠ ತಾಪಮಾನ 19 ಡಿಗ್ರಿ ಸೆಲ್ಸಿಯಸ್ ಇದ್ದು, ಕನಿಷ್ಠ ತಾಪಮಾನ 4 ಡಿಗ್ರಿ ಸೆಲ್ಸಿಯಸ್ ದಾಖಲೆಯಾಗಿದೆ. ದಟ್ಟ ಮಂಜಿಗೆ ಒಟ್ಟು 200 ವಿಮಾನ ಹಾಗೂ 22 ರೈಲು ಸಂಚಾರದಲ್ಲಿ ವ್ಯತ್ಯಯ ಉಂಟಾಗಿದೆ.
ಇಂದಿರಾಗಾಂಧಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ವಿಮಾನಗಳ ಹಾರಾಟಕ್ಕೆ ತಾತ್ಕಾಲಿಕ ಬ್ರೇಕ್ ಬಿದ್ದಿದೆ. ಮಂಜು ಆವರಿಸಿ ರನ್ವೇ ಸ್ಪಷ್ಟವಾಗಿ ಗೊಚರಿಸದೇ ಇರುವ ಕಾರಣ ಟೇಕ್ ಆಪ್ ಹಿಂಪಡೆಯಲಾಗಿದೆ. ಇನ್ನು ನಿನ್ನೆ 250 ವಿಮಾನಗಳ ಹಾರಾಟದಲ್ಲಿ ವಿಳಂಬ ಉಂಟಾಗಿತ್ತು. ಅದರಲ್ಲಿ 225 ವಿಮಾನಗಳು ದೇಶೀಯ, 25 ಅಂತಾರಾಷ್ಟ್ರೀಯ ವಿಮಾನಗಳು ಇದ್ದವು. ಇದಕ್ಕೂ ಹಿಂದೆ ಅಂದರೆ ಶುಕ್ರವಾರ ವಿಮಾನ ನಿಲ್ದಾಣದಲ್ಲಿ 300 ವಿಮಾನಗಳು ಬಾಕಿಯಾಗಿದ್ದವು. ಒಟ್ಟಾರೆ ಮಂಜಿನಿಂದ 4-5 ದಿನಗಳಿಂದ ಪ್ರಯಾಣಿಕರು ತೊಂದರೆ ಅನುಭವಿಸುತ್ತಿದ್ದಾರೆ. ಇನ್ನು ರೈಲುಗಳು 1 ರಿಂದ 6 ಗಂಟೆಗಳ ವರೆಗೆ ತಡವಾಗಿ ಸಂಚರಿಸುತ್ತಿವೆ.
ಚಳಿಯ ತೀವ್ರತೆಗೆ ಜನರು ಮನೆಯಿಂದ ಹೊರಬರಲು ಅಸಾಧ್ಯವಾಗಿದೆ. ದಟ್ಟ ಮಂಜಿನ ಪರಿಣಾಮ 10 ಮೀಟರ್ ದೂರದಲ್ಲಿರುವ ವಸ್ತುಗಳು ಗೋಚರಿಸದ ಪರಿಸ್ಥಿತಿ ಉಂಟಾಗಿದೆ. ಈ ಕುರಿತು ದೆಹಲಿ ಪೋಲೀಸ್ ಇಲಾಖೆ ತನ್ನ ಅಧಿಕೃತ ಎಕ್ಸ್ ಖಾತೆಯಿಂದ ಪೋಸ್ಟ್ ಮಾಡಿದ್ದು, "ಹವಮಾನ ಇಲಾಖೆ ಜನವರಿ 14,15, 16 ರಂದು ದಟ್ಟವಾದ ಮಂಜಿನ ಮುನ್ಸೂಚನೆಯನ್ನು ನೀಡಿದೆ. ಹಾಗಾಗಿ ಮಂಜಿನಲ್ಲಿ ಎಚ್ಚರಿಕೆಯಿಂದ ವಾಹನ ಚಲಾಯಿಸಲು ನಾವು ಎಲ್ಲರಿಗೂ ಮನವಿ ಮಾಡುತ್ತೇವೆ." ಎಂದು ಹಾಕಿಕೊಂಡಿದೆ.
ಇದನ್ನೂ ಓದಿ: ಸಂಕ್ರಾಂತಿ ಹಿನ್ನೆಲೆ ಬೆಂಗಳೂರು, ಧರ್ಮಸ್ಥಳಕ್ಕೆ ಹೆಚ್ಚುವರಿ ವಿಶೇಷ ಬಸ್ ವ್ಯವಸ್ಥೆ
