ಬಾಗಲಕೋಟೆಯಲ್ಲಿ ಭಾರೀ ಮಳೆ: ಹಾಲು ತರಲು ಹೋದ ವ್ಯಕ್ತಿ​ ನೀರು ಪಾಲು

ಮುಧೋಳ ತಾಲೂಕಿನ ಒಂಟಗೋಡಿ ಕ್ರಾಸ್ ಬಳಿ ಯಾದವಾಡ ಹಳ್ಳದಲ್ಲಿ ಹಾಲು ತರಲು ಹೋಗಿ ವ್ಯಕ್ತಿ ನೀರು ಪಾಲಾಗಿರುವ ಘಟನೆ ನಡೆದಿದೆ.

ಬಾಗಲಕೋಟೆ: ಜಿಲ್ಲೆಯಲ್ಲಿ ಭಾರೀ ಮಳೆಯಾಗಿದ್ದು ಮುಧೋಳ ತಾಲೂಕಿನ ಒಂಟಗೋಡಿ ಕ್ರಾಸ್ ಬಳಿ ಯಾದವಾಡ ಹಳ್ಳದಲ್ಲಿ ಹಾಲು ತರಲು ಹೋಗಿ ವ್ಯಕ್ತಿ ನೀರು ಪಾಲಾಗಿರುವ ಘಟನೆ ನಡೆದಿದೆ.

ಬೈಕ್​​ನಲ್ಲಿ ಹೊರಟಿದ್ದ ಡಿಸಿಸಿ ಬ್ಯಾಂಕಿನ ಕ್ಲರ್ಕ್ ​​ಸಂತೋಷ (34) ನೀರು ಪಾಲಾಗಿರುವ ವ್ಯಕ್ತಿ. ಮುಧೋಳ ಡಿಸಿಸಿ ಬ್ಯಾಂಕ್​​ನಲ್ಲಿ ಕ್ಲರ್ಕ್ ಆಗಿದ್ದರು. ಮೃತ ಸಂತೋಷ ಬೈಕ್​ನಲ್ಲಿ ಹೋಗುವಾಗ ರಸ್ತೆಯಲ್ಲಿ ನೀರು ತುಂಬಿದ್ದು, ತಗ್ಗು ಪ್ರದೇಶದಲ್ಲಿ ಬಿದ್ದು ಮೃತಪಟ್ಟಿದ್ದಾರೆ.

ಮುಧೋಳ ಅಗ್ನಿಶಾಮಕ ದಳ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ ಶವ ಹೂರಕ್ಕೆ ತೆಗೆದಿದ್ದಾರೆ. ಜಿಲ್ಲೆಯ ರಬಕವಿ-ಬನಹಟ್ಟಿ ಪಟ್ಟಣದಲ್ಲಿ ರಸ್ತೆ ತುಂಬಾ ನೀರು ತುಂಬಿ, ಸಂಚಾರಕ್ಕೆ ತೊಂದರೆ ಉಂಟಾಗಿದೆ. ಬಾಗಲಕೋಟೆ ನಗರ ಸೇರಿದಂತೆ, ಕೆರೂರು ಪಟ್ಟಣ, ಕಿರಸೂರ ಗ್ರಾಮದಲ್ಲಿ ಮನೆಗಳು ಕುಸಿದಿದ್ದು, ಹಾನಿಯಾಗಿದೆ.

ಜಿಲ್ಲೆಯಾದ್ಯಂತ ಕಳೆದ ರಾತ್ರಿಯಿಂದ ಭಾರಿ ಮಳೆ ಆಗುತ್ತಿದ್ದು, ಎಲ್ಲೆಡೆ ಹಳ್ಳ-ಕೊಳ್ಳ ತುಂಬಿ ಹರಿಯುತ್ತಿದೆ. ತುಳಸಿಗೇರಿ ಆಂಜನೇಯ ದೇವಾಲಯ ಬಳಿ ನೀರು ಸಂಗ್ರಹವಾಗಿ, ಭಕ್ತರ ದರುಶಕ್ಕೆ ತೊಂದರೆ ಉಂಟಾಗಿದೆ.

ಸತತ ಮಳೆ ಸುರಿಯುತ್ತಿರುವ ಪರಿಣಾಮ ಮುನ್ನೆಚ್ಚರಿಕೆ ಕ್ರಮವಾಗಿ ಜನತೆ ಸೂಕ್ತ ಸ್ಥಳಕ್ಕೆ ಸ್ಥಳಾಂತರ ಆಗಬೇಕು ಎಂದು ಜಿಲ್ಲಾಧಿಕಾರಿ ಸೂಚನೆ ನೀಡಿದ್ದಾರೆ.