ದುಬೈ: ಐಸಿಸಿ ಟಿ-20 ವಿಶ್ವಕಪ್ನ ಸೂಪರ್-12 ಹಂತದ ಗ್ರೂಪ್ 1ರ ದಕ್ಷಿಣ ಆಫ್ರಿಕ ಹಾಗೂ ವೆಸ್ಟ್ ಇಂಡೀಸ್ ನಡುವಿನ ಪಂದ್ಯದಲ್ಲಿ ಹರಿಣಗಳ ಪಡೆ 8 ವಿಕೆಟ್ಗಳಿಂದ ಜಯದಾಖಲಿಸಿದೆ. 144 ರನ್ಗಳ ಟಾರ್ಗೆಟ್ ನೀಡಿದ್ದ ವಿಂಡೀಸ್ ಪಡೆಗೆ ಮತ್ತೆ ಸೋಲಿನ ಆಘಾತವಾಗಿದ್ದು, ಟೂರ್ನಿಯಲ್ಲಿ 2ನೇ ಸೋಲು ಅನುಭವಿಸಿದೆ.
ಟಾಸ್ ಗೆದ್ದು ಮೊದಲು ಬೌಲಿಂಗ್ ಆಯ್ದುಕೊಂಡಿದ್ದ ಆಫ್ರಿಕಾ ಪಡೆ ವಿಂಡೀಸ್ ಬ್ಯಾಟ್ಸ್ಮನ್ಗಳಿಗೆ ಅಬ್ಬರದ ಬ್ಯಾಟಿಂಗ್ ನಡೆಸಲು ಅವಕಾಶ ನೀಡದೇ 8 ವಿಕೆಟ್ ಉರುಳಿಸಿ ಕೇವಲ 143 ರನ್ಗಳಿಗೆ ಕಟ್ಟಿಹಾಕಿದ್ದರು.
ಈ ಮೊತ್ತ ಬೆನ್ನಟ್ಟಿದ ಆಫ್ರಿಕಾ ಪಡೆ ಆರಂಭದಲ್ಲೇ ನಾಯಕ ಟೆಂಬ ಬುವಂ 2 (3) ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತು. ಆದರೆ, ರೀಝಾ ಹೆನ್ರಿಕ್ಸ್ 39 (30) ರನ್ ಗಳಿಸಿ ತಂಡಕ್ಕೆ ನೆರವಾದರು. ಈ ನಡುವೆ, 39 ರನ್ ಗಳಿಸಿದ್ದಾಗ ಹೊಸೆನ್ಗೆ ವಿಕೆಟ್ ಒಪ್ಪಿಸಿದರು. ಇನ್ನೊಂದೆಡೆ ದುಸ್ಸೆನ್ ಹಾಗೂ ಮಾರ್ಕ್ರಾಮ್ ತಂಡವನ್ನ ಗೆಲುವಿನ ದಡ ಸೇರಿಸಲು ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಿದರು.
ವಿಂಡೀಸ್ ಬೌಲರ್ಗಳ ವಿರುದ್ಧ ಅಬ್ಬರಿಸಿದ ಮರ್ಕ್ರಾಮ್ 4 ಸಿಕ್ಸರ್ಗಳ ನೆರವಿನಿಂದಾಗಿ ಭರ್ಜರಿ ಅರ್ಧ ಶತಕ ಗಳಿಸಿದರು. 26 ಎಸೆತದಲ್ಲಿ 51 ರನ್ಗಳಿಸಿದರೆ ಇತ್ತ ದುಸ್ಸೆನ್ 43 (51) ರನ್ ಗಳಿಸಿದರು.
ಅಂತಿಮವಾಗಿ ಆಫ್ರಿಕಾ ತಂಡ 10 ಬಾಲ್ ಬಾಕಿ ಇರುವಂತೆಯೇ ನಿಗದಿತ ಗುರಿ ತಲುಪಿದ್ದು, ಈ ಮೂಲಕ ಟೂರ್ನಿಯಲ್ಲಿ ಗೆಲುವಿನ ಖಾತೆ ಆರಂಭಿಸಿದೆ.
