ದುಬೈ: ಭಾನುವಾರ ನಡೆದ ಐಪಿಎಲ್ ಪಂದ್ಯದಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್(ಸಿಎಸ್ಕೆ) ಅಮೋಘ ಜಯ ದಾಖಲಿಸಿ ಫೈನಲ್ಗೆ ಲಗ್ಗೆ ಇಟ್ಟಿದೆ. ಈ ಮೂಲಕ ತಂಡ ಕ್ಯಾಪ್ಟನ್ ಕೂಲ್ ಧೋನಿ ನಾಯಕತ್ವದಲ್ಲಿ 9ನೇ ಬಾರಿ ಫೈನಲ್ ತಲುಪಿದಂತಾಯ್ತು. ಕೊನೆಯ ಓವರ್ನಲ್ಲಿ ಅಬ್ಬರಿಸಿದ ಧೋನಿ, ಡೆಲ್ಲಿ ವಿರುದ್ಧ ಗೆಲುವಿನಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದರು.
ಈ ಮೊದಲು ಸಿಎಸ್ಕೆ, 2010, 2011 ಹಾಗೂ 2018ರ ಐಪಿಎಲ್ ಪ್ರಶಸ್ತಿಗೆ ಮುತ್ತಿಟ್ಟು ಸಂಭ್ರಮಿಸಿದೆ. ಈ ಬಾರಿಯೂ ಪ್ರಶಸ್ತಿ ಗೆಲ್ಲುವ ಫೇವರಿಟ್ ತಂಡ ಎನಿಸಿದೆ.
ಬಲಿಷ್ಟ ಸಿಎಸ್ಕೆ ತಂಡದಲ್ಲಿ ಬ್ಯಾಟ್ಸ್ಮನ್ಗಳು ಉತ್ತಮ ಫಾರ್ಮ್ ಕಂಡುಕೊಂಡಿದ್ದು ತಂಡಕ್ಕೆ ಆಸರೆಯಾಗಿದೆ. ಆರಂಭಿಕರಾದ ರುತುರಾಜ್ ಗಾಯಕ್ವಾಡ್ ಹಾಗೂ ಡುಪ್ಲೆಸಿಸ್ ಉತ್ತಮ ಫಾರ್ಮ್ನಲ್ಲಿದ್ದು, ಅವರ ಹಿಂದೆ ರಾಯುಡು, ಉತ್ತಪ್ಪ, ಮೊಯಿನ್ ಅಲಿ ಸಹ ತಂಡಕ್ಕೆ ರನ್ ಹೊಳೆ ಹರಿಸಿದ್ದಾರೆ.
ಬೌಲಿಂಗ್ ವಿಭಾಗದಲ್ಲಿಯೂ ತಂಡ ಸಮರ್ಥ ಪ್ರದರ್ಶನ ತೋರುತ್ತಿದೆ. ದೀಪಕ್ ಚಾಹರ್, ಶಾರ್ದುಲ್ ಠಾಕೂರ್ ಹಾಗೂ ಹ್ಯಾಜಲ್ವುಡ್ ತಂಡದ ಭರವಸೆಯ ಬೌಲರ್ಗಳಾದರೆ, ಜಡೇಜಾ ಮತ್ತು ಬ್ರಾವೋ ಆಲ್ರೌಂಡರ್ ವಿಭಾಗಕ್ಕೆ ಬಲ ತುಂಬಿದ್ದಾರೆ.
ಎಲಿಮಿನೇಟರ್ ಪಂದ್ಯದಲ್ಲಿ ಗೆದ್ದು, ಡೆಲ್ಲಿ ಕ್ಯಾಪಿಟಲ್ಸ್ ನಡುವಿನ ಪಂದ್ಯದಲ್ಲಿ ಜಯ ದಾಖಲಿಸುವ ತಂಡ ನೇರವಾಗಿ ಚೆನ್ನೈ ತಂಡವನ್ನು ಫೈನಲ್ನಲ್ಲಿ ಎದುರಿಸಬೇಕಿದೆ. ಐಪಿಎಲ್ ಟೂರ್ನಿಯಲ್ಲಿ ಅತೀ ಹೆಚ್ಚು ಬಾರಿ ಫೈನಲ್ ಪ್ರವೇಶಿಸಿದ ತಂಡ ಚೆನ್ನೈ ಆಗಿದ್ದು, 9ನೇ ಬಾರಿಗೆ ಫೈನಲ್ ಎಂಟ್ರಿ ಪಡೆದಿದೆ. ಇದರಲ್ಲಿ ಮೂರು ಬಾರಿ ಪ್ರಶಸ್ತಿ ಗೆದ್ದಿದೆ. 5 ಬಾರಿ ಪ್ರಶಸ್ತಿ ಪಡೆದಿರುವ ಮುಂಬೈ ತಂಡ ಈ ಬಾರಿ ಲೀಗ್ ಹಂತದಲ್ಲಿಯೇ ಮುಗ್ಗರಿಸಿದೆ.
6 ಬಾರಿ ಫೈನಲ್ ಪ್ರವೇಶಿಸಿದ್ದ ಮುಂಬೈ ತಂಡ 5 ಬಾರಿ ಟೈಟಲ್ ಬಾಚಿಕೊಂಡಿದೆ. ಡೆಲ್ಲಿ ತಂಡ 2020ರಲ್ಲಿ ಮೊದಲ ಬಾರಿಗೆ ಫೈನಲ್ ಪ್ರವೇಶಿಸಿ 2ನೇ ಸ್ಥಾನಕ್ಕೆ ತೃಪ್ತಿಪಡೆದುಕೊಂಡಿತ್ತು. ಕೋಲ್ಕತ್ತಾ 2 ಬಾರಿ ಫೈನಲ್ ಪ್ರವೇಶಿಸಿದ್ದರೆ, ಬೆಂಗಳೂರು ತಂಡ ಒಟ್ಟು 3 ಬಾರಿ ಫೈನಲ್ ಹಂತ ತಲುಪಿದೆ.
ಇದನ್ನೂ ಓದಿ: IPL 2021: 'ಇದು ಖಂಡಿತಾ ಬೇಸರದ ಸಂಗತಿ..': ಸೋಲಿನ ಬಳಿಕ ಪಂತ್ ನೋವಿನ ನುಡಿ
