ಇಂದೋರ್​(ಮಧ್ಯಪ್ರದೇಶ): ಡೆವೊನ್ ಕಾನ್ವೇಯ ಶತಕದ ನಡುವೆಯೂ ಭಾರತೀಯ ಬೌಲರ್​ಗಳ ಕರಾರುವಕ್ಕು ದಾಳಿಯಿಂದ​ 90ರನ್​ಗಳ ಜಯ ಭಾರತದ್ದಾಗಿದೆ. ಕಿವೀಸ್​ ಎದುರಿನ ಏಕದಿನ ಸರಣಿಯನ್ನು ವೈಟ್​ವಾಶ್​ ಮಾಡಿರುವ ಬ್ಲೂ ಬಾಯ್ಸ್​ ಐಸಿಸಿ ರ್‍ಯಾಂಕಿಂಗ್​ನಲ್ಲಿ ಮೊದಲ ಸ್ಥಾನವನ್ನು ಅಲಂಕರಿಸಿದೆ. ಭಾರತದ ಪರ ಇಬ್ಬರು ಆರಂಭಿಕರು ಶತಕ ಗಳಿಸಿ, ದ್ವಿಶತಕದ ಜೊತೆಯಾಟ ನೀಡಿದ್ದರು. ಅಲ್ಲದೇ ಉಪನಾಯಕ ಹಾರ್ದಿಕ್​ ಪಾಂಡ್ಯರ ಅರ್ಧಶತಕದ ನೆರವಿನಿಂದ ಭಾರತ 385 ರನ್​ ಗಳಿಸಿತ್ತು.

ಭಾರತ ನೀಡಿದ್ದ ಬೃಹತ್​ ಮೊತ್ತವನ್ನು ಬೆನ್ನುಹತ್ತಿದ್ದ ಬ್ಲಾಕ್​ಕ್ಯಾಪ್ಸ 41.2 ಓವರ್​ಗೆ ತನ್ನೆಲ್ಲಾ ವಿಕೇಟ್​ಗಳನ್ನು ಕೆಳೆದುಕೊಂಡು 295 ರನ್​ ಗಳಿಸಿತ್ತು. ಭಾರತ 90 ರನ್​ಗಳ ಅಂತರದ ಗೆಲುವು ಸಾಧಿಸಿತು. ಭಾರತದ ಪರ ಸ್ವಿನ್​ನಲ್ಲಿ ಕುಲ್ಚಾ ಜೋಡಿ 5 ವಿಕೆಟ್​ ತೆಗೆದು ಮೋಡಿ ಮಾಡಿದರು. ವೇಗದಲ್ಲಿ ಶಾರ್ದೂಲ್​ ಠಾಕೂರ್​ 3 ವಿಕೆಟ್​ ಕಬಳಿಸಿ ಪಾರಮ್ಯ ಮೆರೆದರು.

ಬ್ಯಾಟಿಂಗ್​ನಲ್ಲಿ ಅರ್ಧ ಶತಕ ಗಳಿಸಿ ಮಿಂಚಿದ್ದ ಉಪನಾಯಕ ಹಾರ್ದಿಕ್​ ಇಂದು ಮೊದಲ ಓವರ್​ ಮಾಡಿದರು. ಪ್ರಥಮ ಓವರ್​ನ ಎರಡನೇ ಎಸೆತದಲ್ಲೇ ಫಿನ್​ ಅಲೆನ್​ ಅವರನ್ನು ಕ್ಲೀನ್​ ಬೌಲ್ಡ್​ ಆಗಿ ಪೆವಿಲಿಯನ್​ ದಾರಿ ಹಿಡಿದರು. ನಂತರ ಬಂದ ಹೆನ್ರಿ ನಿಕೋಲ್ಸ್ ಆರಂಭಿಕ ಡೆವೊನ್ ಕಾನ್ವೇಯೊಂದಿಗೆ ಉತ್ತಮ ಜೊತೆಯಾಟ ಮಾಡಿದರು. 42 ರನ್​ ಗಳಿಸಿ ಆಡುತ್ತಿದ್ದ ಹೆನ್ರಿ ನಿಕೋಲ್ಸ್ ಕುಲ್​ದೀಪ್​ಗೆ ಎಲ್​ಬಿಡ್ಬ್ಯೂಗೆ ಬಲಿಯಾದರು.

ಮೂರನೇ ವಿಕೆಟ್ ಆಗಿ ಬಂದ ಡೇರಿಲ್ ಮಿಚೆಲ್ 24 ರನ್​ಗೆ ಠಾಕೂರ್​ಗೆ ವಿಕೆಟ್​ ಒಪ್ಪಿಸಿರು. ನಂತರ ಬಂದ ಬ್ಲಾಕ್​​ಕ್ಯಾಪ್ಸ್​ ನಾಯಕ ಟಾಮ್ ಲ್ಯಾಥಮ್ ಶಾರ್ದೂಲ್ ಠಾಕೂರ್​ಗೆ ಗೋಲ್ಡನ್​ ಡಕ್​ ಆದರು. ಎರಡನೇ ಪಂದ್ಯದಲ್ಲಿ ಉತ್ತಮವಾಗಿ ಆಡಿದ್ದ ಗ್ಲೆನ್ ಫಿಲಿಪ್ಸ್ 5ರನ್​ಗೆ ಪೆವಿಲಿಯನ್​ ಹಾದಿ ಹಿಡಿದರು. ಮೊದಲ ಪಂದ್ಯದಲ್ಲಿ ಶತಕ ಗಳಿಸಿ ತಂಡವನ್ನು ಗೆಲುವಿನ ಹಂತಕ್ಕೆ ತೆಗೆದುಕೊಂಡು ಹೋಗುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದ ಮೈಕೆಲ್ ಬ್ರೇಸ್‌ವೆಲ್ ಇಂದು ಹೆಚ್ಚಿನ ಪ್ರದರ್ಶನ ನೀಡುವಲ್ಲಿ ವಿಫಲವಾಗಿ 26 ರನ್​ಗೆ ಔಟ್​ ಆದರು.

ಒಂದೆಡೆ ವಿಕೆಟ್​ ಪತನವಾದರೂ ಡೆವೊನ್ ಕಾನ್ವೇ ಸ್ಥಿರ ಪ್ರದರ್ಶನ ಮುಂದುವರೆಸಿದ್ದರು. 100 ಎಸೆತಗಳನ್ನು ಎದುರಿಸಿದ ಅವರು 8 ಸಿಕ್ಸರ್​ ಮತ್ತು 12 ಬೌಂಡರಿಗಳಿಂದ 138 ರನ್​ ಗಲಿಸಿದರು. ನ್ಯೂಜಿಲೆಂಡ್​ನ್ನು ಗೆಲುವಿನ ದಡಕ್ಕೆ ಸೇರಿಸುತ್ತಾರೆ ಎನ್ನುವ ಹೊತ್ತಿಗೆ ಉಮ್ರಾನ್​ ಮಲಿಕ್​ಗೆ ವಿಕೆಟ್​ ಒಪ್ಪಿಸಿದರು. ಮಿಚೆಲ್ ಸ್ಯಾಂಟ್ನರ್ ಆಲ್​ ರೌಂಡ್​ ಆಟಕ್ಕೆ ಮುಂದಾದರು ಆದರೆ ಚಹಾಲ್​ ಬೌಲನ್ನು ಬೌಂಡರಿ ದಾಟಿಸುವ ವೇಗದಲ್ಲಿ ವಿರಾಟ್​ಗೆ ಕ್ಯಾಚ್​ನೀಡಿದರು. ನಂತರ ಬಂದ ಜಾಕೋಬ್ ಡಫಿ(0) ಮತ್ತು ಲಾಕಿ ಫರ್ಗುಸನ್(7) ಔಟ್​ ಆದರು.

ಭಾರತದ ಪರ ಮತ್ತೆ ಕುಲ್ಚಾ ಜೋಡಿ ಮೋಡಿ ಮಾಡಿತು. ಕುಲ್​ದೀಪ್​ ಯಾದವ್​ 3 ಮತ್ತು ಚಹಾಲ್​ ಎರಡು ಪ್ರಮುಖ ವಿಕೆಟ್​ ಪಡೆಯುವ ಮೂಲಕ ಮತ್ತೆ ತಮ್ಮ ಕೈಚಳಕ ಮೆರೆದರು. ವೇಗದ ಬೌಲಿಂಗ್​ ವಿಭಾಗದಲ್ಲಿ ಶಾರ್ದೂಲ್​ ಠಾಕೂರ್​ 3 ವಿಕೆಟ್​ ಮತ್ತು ಹಾರ್ದಿಕ್​, ಉಮ್ರಾನ್​ ತಲಾ ಒಂದು ವಿಕೆಟ್​ ಪಡೆದರು.

ಇಂದಿನ ಪಂದ್ಯದಲ್ಲಿ ಬ್ಯಾಟಿಂಗ್​ ಮತ್ತು ಬೌಲಿಂಗ್​ನಲ್ಲಿ ಮಿಂಚಿದ ಶಾರ್ದೂಲ್​ ಠಾಕೂರ್​ಗೆ ಪಂದ್ಯ ಶ್ರೇಷ್ಠ ಪ್ರಶಸ್ತಿ ಮತ್ತು ಮೊದಲ ಪಂದ್ಯದಲ್ಲಿ ದ್ವಿಶತಕ, ಎರಡನೇ ಪಂದ್ಯದಲ್ಲಿ 41 ರನ್​ ಹಾಗೇ ಇಂದಿನ ಪಂದ್ಯದಲ್ಲಿ 112 ರನ್​ಗಳಿಸಿ ಸರಣಿಯಲ್ಲಿ ಒಟ್ಟು 360 ರನ್​ಗಳಿಸಿದ ಗಿಲ್​ಗೆ ಸರಣಿ ಶ್ರೇಷ್ಠ ಪ್ರಶಸ್ತಿ ನೀಡಲಾಯಿತು.

ಸಂಕ್ಷಿಪ್ತ ಸ್ಕೋರ್‌ಗಳು : ಭಾರತ 50 ಓವರ್‌ಗಳಲ್ಲಿ 385/9 (ಶುಬ್‌ಮನ್ ಗಿಲ್ 112, ರೋಹಿತ್ ಶರ್ಮಾ 101; ಬ್ಲೇರ್ ಟಿಕ್ನರ್ 76ಕ್ಕೆ 3) ನ್ಯೂಜಿಲೆಂಡ್ 295 (ಡೆವೊನ್ ಕಾನ್ವೆ 138; ಶಾರ್ದೂಲ್ ಠಾಕೂರ್ 3-45) ಫಲಿತಾಂಶ: ಭಾರತಕ್ಕೆ 90 ರನ್‌ಗಳಿಂದ ಗೆಲುವು.

ಇದನ್ನೂ ಓದಿ: IND vs NZ 3rd ODI: ಭಾರತದ ಆರಂಭಿಕರ ದ್ವಿಶತಕದ ದಾಖಲೆಯ ಜೊತೆಯಾಟ: ಕಿವೀಸ್​ಗೆ 386 ರನ್​ಗಳ ಬೃಹತ್​ ಗುರಿ