ಮುಂಬೈ (ಮಹಾರಾಷ್ಟ್ರ): ವಿಶ್ವಕಪ್ನ ತಮ್ಮ ಎರಡನೇ ಇನ್ನಿಂಗ್ಸ್ನಲ್ಲಿ 1 ರನ್ನಿಂದ ಸೂರ್ಯಕುಮಾರ್ ಯಾದವ್ ಅರ್ಧಶತಕ ಮಿಸ್ ಮಾಡಿಕೊಂಡರೂ ಅವರ ಆಟವನ್ನು ಎಲ್ಲರೂ ನೆನಪಿನಲ್ಲಿಟ್ಟುಕೊಳ್ಳುವುದಂತೂ ಖಂಡಿತ. ಏಕೆಂದರೆ ಇಂಗ್ಲೆಂಡ್ ವಿರುದ್ಧ ತಂಡ ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿದ್ದಾಗ ಸ್ಕೈ ಪ್ರಮುಖ ಇನ್ನಿಂಗ್ಸ್ ಕಟ್ಟಿದರು. ಸೂರ್ಯ ಅವರ ಬ್ಯಾಟಿಂಗ್ ನೆರವಿನಿಂದ ಟೀಮ್ ಇಂಡಿಯಾ 229 ರನ್ನ ಗುರಿಯನ್ನು ಆಂಗ್ಲರಿಗೆ ನೀಡಿತ್ತು.
ಬಾಂಗ್ಲಾ ವಿರುದ್ಧದ ಪಂದ್ಯದಲ್ಲಿ ಕಾಲಿನ ಪಾದದ ಗಾಯಕ್ಕೆ ಹಾರ್ದಿಕ್ ತುತ್ತಾದರು. ಇದರಿಂದ ನ್ಯೂಜಿಲೆಂಡ್ ವಿರುದ್ಧದ ತಂಡದಲ್ಲಿ ಎರಡು ಪ್ರಮುಖ ಬದಲಾವಣೆಗಳಾದವು. ಬ್ಯಾಟಿಂಗ್ನಲ್ಲಿ 6ನೇ ವಿಕೆಟ್ಗೆ ಹಾರ್ದಿಕ್ ಜಾಗದಲ್ಲಿ ಸೂರ್ಯ ಅವರನ್ನು ಆಡಿಸಲಾಯಿತು. ಕಿವೀಸ್ ವಿರುದ್ಧ ಸೂರ್ಯ ಶೂನ್ಯಕ್ಕೆ ರನ್ ಔಟ್ಗೆ ಬಲಿಯಾದರು. ಆದರೆ, ಇಂಗ್ಲೆಂಡ್ ವಿರುದ್ಧ ಅಗತ್ಯ ಸಮಯದಲ್ಲಿ ಇನ್ನಿಂಗ್ಸ್ನ್ನು ಕಟ್ಟಿದರು. ಇದರಿಂದ ನಾಲ್ಕನೇ ಕ್ರಮಾಂಕದ ಬ್ಯಾಟರ್ ಶ್ರೇಯಸ್ ಅಯ್ಯರ್ ಅವರ ಸ್ಥಾನ ಅಲುಗಾಡುತ್ತಿದೆ.
ವಿಶ್ವಕಪ್ನಲ್ಲಿ ಶ್ರೇಯಸ್ ವಿಫಲ: ಗಾಯದಿಂದ ಚೇತರಿಸಿಕೊಂಡಿದ್ದ ಅಯ್ಯರ್ ಏಷ್ಯಾಕಪ್ಗೆ ಆಯ್ಕೆ ಆಗಿದ್ದರು. ಅಲ್ಲಿ ಒಂದು ಪಂದ್ಯ ಆಡಿದ ನಂತರ ಮತ್ತೆ ನೋವಿನಿಂದ ಬಳಲಿದ ಕಾರಣಕ್ಕೆ ಏಷ್ಯಾಕಪ್ನಲ್ಲಿ ಕಾಣಿಸಿಕೊಳ್ಳಲಿಲ್ಲ. ನಂತರ ಭಾರತದಲ್ಲಿ ನಡೆದ ಆಸ್ಟ್ರೇಲಿಯಾ ಸರಣಿಯಲ್ಲಿ ಅಯ್ಯರ್ ಕಮ್ಬ್ಯಾಕ್ ಮಾಡಿದ್ದಲ್ಲದೇ ಒಂದು ಶತಕವನ್ನು ದಾಖಲಿಸಿ ಭರವಸೆ ಮೂಡಿಸಿದರು. ಇದರಿಂದಾಗಿ ವಿಶ್ವಕಪ್ನಲ್ಲಿ ತಂಡದ ನಾಲ್ಕನೇ ಸ್ಥಾನದಲ್ಲಿ ಅಯ್ಯರ್ ಮುಂದುವರೆದರು.
ವಿಶ್ವಕಪ್ನಲ್ಲಿ ಅಯ್ಯರ್ ಬ್ಯಾಟ್ ರನ್ ಬರ ಎದುರಿಸುತ್ತಿದೆ ಎಂದರೆ ತಪ್ಪಾಗದು. ಆಸ್ಟ್ರೇಲಿಯಾ ವಿರುದ್ಧ ಮೊದಲ ಪಂದ್ಯದಲ್ಲಿ ಶೂನ್ಯಕ್ಕೆ ಔಟ್ ಆದರು. ನಂತರ ಅಫ್ಘನ್ ವಿರುದ್ಧ 25*, ಪಾಕಿಸ್ತಾನ 53*, ಬಾಂಗ್ಲಾ 19, ನ್ಯೂಜಿಲೆಂಡ್ 33 ಮತ್ತು ಇಂಗ್ಲೆಂಡ್ ವಿರುದ್ಧ 4 ರನ್ ಗಳಿಸಿ ವಿಕೆಟ್ ಒಪ್ಪಿಸಿದರು. 6 ಇನ್ನಿಂಗ್ಸ್ನಲ್ಲಿ ಅವರಿಂದ 1 ಅರ್ಧಶತಕದ ಪ್ರದರ್ಶನ ಮಾತ್ರ ಬಂತು ಮತ್ತು ಅಗತ್ಯ ಇದ್ದಾಗ ಜತೆಯಾಟವನ್ನು ನಿರ್ಮಿಸುವಲ್ಲಿ ಅಯ್ಯರ್ ಸತತ ವಿಫಲತೆ ಕಂಡಿದ್ದಾರೆ.
ಹಾರ್ದಿಕ್ ಮರಳಿದರೆ ಅಯ್ಯರ್ಗೆ ಕೊಕ್: ಬಾಂಗ್ಲಾ ವಿರುದ್ಧದ ಪಂದ್ಯದ ವೇಳೆ ಗಾಯಕ್ಕೆ ತುತ್ತಾದ ಆಲ್ರೌಂಡರ್ ಹಾರ್ದಿಕ್ ಪಾಂಡ್ಯ ಚೇತರಿಸಿಕೊಂಡು ಮರಳಿದರೆ, ಅಯ್ಯರ್ಗೆ ಕೊಕ್ ನೀಡುವ ಸಾಧ್ಯತೆ ಇದೆ. ಟಿ20ಯಲ್ಲಿ 4ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡಿದ ಅನುಭವ ಹೊಂದಿರುವ ಹಾರ್ದಿಕ್ ಅವರು ಶ್ರೇಯಸ್ ಜಾಗದಲ್ಲಿ ಬ್ಯಾಟ್ ಬೀಸುವ ಸಾಧ್ಯತೆ ಹೆಚ್ಚಿದೆ. ಇಲ್ಲವಾದಲ್ಲಿ ಇಶಾನ್ ಕಿಶನ್ ಸಹ ಮಧ್ಯಮ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಮಾಡುವ ಸಾಮರ್ಥ್ಯ ಹೊಂದಿರುವುದರಿಂದ ಅವರಿಗೂ ಅವಕಾಶ ಲಭಿಸಬಹುದು.
ಭರವಸೆ ಮೂಡಿಸಿದ ಸೂರ್ಯ: ಏಕದಿನ ಮಾದರಿಯಲ್ಲಿ ಮೂರು ಬಾರಿ ಡಕ್ ಔಟ್ ಆಗಿ ಟ್ರೋಲ್ಗೆ ಒಳಗಾಗಿದ್ದ ಸೂರ್ಯ, ಆಸ್ಟ್ರೇಲಿಯಾ ಸರಣಿಯಲ್ಲಿ ಏಕದಿನ ಮಾದರಿಗೆ ಹೊಂದಿಕೊಂಡರು. ಟಿ20 ನಂ.1 ಬ್ಯಾಟರ್ ಏಕದಿನ ಮಾದರಿಯಲ್ಲಿ ಈಗ ಲಯಕ್ಕೆ ಬಂದಿದ್ದಾರೆ. ಕಿವೀಸ್ ವಿರುದ್ಧ ವಿರಾಟ್ ಕೊಹ್ಲಿ ಮಾಡಿದ ಎಡವಟ್ಟಿನಿಂದ ರನ್ಔಟ್ಗೆ ಬಲಿಯಾಗಿದ್ದರು. ಇಂಗ್ಲೆಂಡ್ ವಿರುದ್ಧ ಒತ್ತಡದ ಸಮಯದಲ್ಲಿ ಜವಾಬ್ದಾರಿಯುತರಾಗಿ 47 ಬಾಲ್ನಲ್ಲಿ 49 ರನ್ನ ಇನ್ನಿಂಗ್ಸ್ ಕಟ್ಟಿದ್ದು, ಕೆಳ ಕ್ರಮಾಂಕದಲ್ಲಿ ಅವರ ಬ್ಯಾಟಿಂಗ್ ಮೇಲಿನ ಭರವಸೆಯನ್ನು ಹೆಚ್ಚಿಸಿದೆ.
ಇದನ್ನು ಓದಿ: ವಿಶ್ವಕಪ್ ಕ್ರಿಕೆಟ್: ಅಫ್ಘನ್ ದಾಳಿ ಮುಂದೆ ಮಂಕಾದ ಸಿಂಹಳೀಯರು; 241 ರನ್‌ಗಳಿಗೆ ಸರ್ವಪತನ
