ಮುಂಬೈ : 2012ರ ವಿಶ್ವಕಪ್ ವಿಜೇತ ತಂಡದ ನಾಯಕ ಉನ್ಮುಕ್ತ್ ಚಾಂದ್ ಸೇರಿದಂತೆ ಹಲವು ಭಾರತೀಯ ಕ್ರಿಕೆಟಿಗರು ಮತ್ತು 100ಕ್ಕೂ ಹೆಚ್ಚು ಪಾಕಿಸ್ತಾನದ ಕ್ರಿಕೆಟಿಗರು ಭವಿಷ್ಯದಲ್ಲಿ ಅಮೆರಿಕಾ ತಂಡದಲ್ಲಿ ವೃತ್ತಿ ಜೀವನ ಕಂಡುಕೊಳ್ಳುವುದಕ್ಕೆ ಎದುರು ನೋಡುತ್ತಿದ್ದಾರೆ ಎಂದು ಪಾಕಿಸ್ತಾನದ ಮಾಜಿ ಆರಂಭಿಕ ಬ್ಯಾಟ್ಸ್ಮನ್ ಸಮಿ ಅಸ್ಲಾಮ್ ತಿಳಿಸಿದ್ದಾರೆ.
25 ವರ್ಷದ ಸಮಿ ಅಸ್ಲಾಮ್ ತಮ್ಮ ಕಡೆಗಣಿಸಿದ ಕಾರಣಕ್ಕೆ ಪಾಕಿಸ್ತಾನ ತಂಡಕ್ಕೆ ರಾಜೀನಾಮೆ ನೀಡಿ ಯುಎಸ್ಎಗೆ ತೆರಳಿದ್ದಾರೆ. ಅವರು ಪಾಕಿಸ್ತಾನದ ಪರ 13 ಟೆಸ್ಟ್ ಪಂದ್ಯಗಳನ್ನಾಡಿದ್ದರು.
ಇದೀಗ ಅದೇ ದಾರಿಯಲ್ಲಿ ಭಾರತ, ಪಾಕಿಸ್ಥಾನ ಮತ್ತು ದಕ್ಷಿಣ ಆಫ್ರಿಕಾದ ಕೆಲವು ಪ್ರಥಮ ದರ್ಜೆ ಆಡಿದ ಅನುಭವವುಳ್ಳ ಕ್ರಿಕೆಟಿಗರೂ ಕೂಡ ತಮ್ಮ ದಾರಿಯನ್ನೇ ಹಿಡಿದಿದ್ದಾರೆ ಎಂದು ಅಸ್ಲಾಮ್ ತಿಳಿಸಿದ್ದಾರೆ.
30-40 ವಿದೇಶಿ ಆಟಗಾರರು ಇತ್ತೀಚೆಗೆ ಅಮೆರಿಕಾಗೆ ಬಂದಿದ್ದಾರೆ. ಅದರಲ್ಲಿ ಉನ್ಮುಕ್ತ್ ಚಾಂದ್, ಸ್ಮಿತ್ ಪಟೇಲ್ ಮತ್ತು ಹರ್ಮಿತ್ ಸಿಂಗ್ ಸೇರಿದಂತೆ ಭಾರತದ ಮಾಜಿ ಅಂಡರ್ 19 ಆಟಗಾರರು ಸೇರಿದ್ದಾರೆ ಎಂದು ಅಸ್ಲಾಮ್ ಪಾಕ್ಪ್ಯಾಷನ್ ಎಂಬ ವೆಬ್ಸೈಟ್ಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
ಅವರಷ್ಟೇ ಅಲ್ಲದೇ ದಕ್ಷಿಣ ಆಫ್ರಿಕಾದಲ್ಲಿ ಸಾಕಷ್ಟು ಪ್ರಥಮ ದರ್ಜೆ ಕ್ರಿಕೆಟ್ ಆಡಿರುವ ಕ್ರಿಕೆಟಿಗರು, ನ್ಯೂಜಿಲ್ಯಾಂಡ್ನ ಮಾಜಿ ಆಲ್ರೌಂಡರ್ ಕೋರೆ ಆ್ಯಂಡರ್ಸನ್ ಕೂಡ ಇಲ್ಲಿದ್ದಾರೆ. ಸುಮಾರು 100ಕ್ಕೂ ಹೆಚ್ಚು ಪಾಕಿಸ್ತಾನ ಕ್ರಿಕೆಟಿಗರಿಂದಲೂ ನಾನು ಕರೆಗಳನ್ನು ಸ್ವೀಕರಿಸಿದ್ದೇನೆ ಎಂದು ಅಸ್ಲಾಮ್ ತಿಳಿಸಿದ್ದಾರೆ.
ವಿರಾಟ್ ಕೊಹ್ಲಿ, ಪೃಥ್ವಿ ಶಾ, ಶುಬ್ಮನ್ ಗಿಲ್ ಮತ್ತು ರವೀಂದ್ರ ಜಡೇಜಾ ಅಂಡರ್ 19 ವಿಶ್ವಕಪ್ ಗೆಲ್ಲುತ್ತಿದ್ದಂತೆ ದೇಶೀಯ ಕ್ರಿಕೆಟ್ನಲ್ಲಿ ಉತ್ತಮ ಪ್ರದರ್ಶನ ತೋರಿ ಟೀಂ ಇಂಡಿಯಾದಲ್ಲಿ ಅವಕಾಶ ಪಡೆದರು. ಆದರೆ, ಉನ್ಮುಖ್ ಚಾಂದ್ಗೆ ಆ ಅದೃಷ್ಟ ದೊರೆಯಲಿಲ್ಲ.
ಜೊತೆಗೆ ಅವರ ಫಾರ್ಮ್ ಕೂಡ ಕೈ ಹಿಡಿಯಲಿಲ್ಲ. ಐಪಿಎಲ್ನಲ್ಲಿ ಅವಕಾಶ ಪಡೆದರೂ ನಿರೀಕ್ಷಿತ ಪ್ರದರ್ಶನ ತೋರುವಲ್ಲಿ ವಿಫಲರಾದರು. ಇದೀಗ 28 ವರ್ಷದ ಚಾಂದ್ ಕ್ರಿಕೆಟ್ ಶಿಸು ಅಮೆರಿಕಾ ಪರ ಹೊಸ ಇನ್ನಿಂಗ್ಸ್ ಆರಂಭಿಸಲು ಮುಂದಾಗಿದ್ದಾರೆ. ಮುಂಬೈ ರಣಜಿ ತಂಡದಲ್ಲಿ ಆಡಿದ್ದ ಸೌರಭ್ ನೇತ್ರಾವಾಲ್ಕರ್ ಪ್ರಸ್ತುತ ಯುಎಸ್ ರಾಷ್ಟ್ರೀಯ ತಂಡದ ನಾಯಕರಾಗಿದ್ದಾರೆ.
ಆದರೆ ಚಾಂದ್ ಅಮೆರಿಕಾಕ್ಕೆ ತೆರಳಿರುವುದರ ಬಗ್ಗೆಯಾಗಿರಲಿ ಅಥವಾ ಯುಎಸ್ಎ ತಂಡ ಅಥವಾ ಲೀಗ್ಗಳಲ್ಲಿ ಭಾಗವಹಿಸುವ ವಿಚಾರದಲ್ಲಿ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ. ಏಕೆಂದರೆ ಬೇರೆ ದೇಶ ಅಥವಾ ಲೀಗ್ಗಳಲ್ಲಿ ಆಡಬೇಕೆಂದರೆ ಮೊದಲು ಬಿಸಿಸಿಐನಿಂದ ಎನ್ಒಸಿ ಪಡೆಯಬೇಕಿರುತ್ತದೆ.
ಇದನ್ನು ಓದಿ:ಕೊಹ್ಲಿ ಸದಾ ನಮ್ಮ ಜೊತೆ ಬಾಲ್ಯದ ಗೆಳೆಯನಂತೆ ವರ್ತಿಸುತ್ತಾರೆ : ಮೊಹಮ್ಮದ್ ಶಮಿ
