ಬೆಂಗಳೂರು: 2022ರ ಮೆಗಾ ಹರಾಜಿನಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಇತರೆ ತಂಡಗಳಿಗೆ ಹೋಲಿಸಿದರೆ ಜಾಣ್ಮೆ ತೋರಿ ಆಟಗಾರರನ್ನು ಖರೀದಿಸುವಲ್ಲಿ ಯಶಸ್ವಿಯಾಗಿದೆ. ತಂಡಕ್ಕೆ ಅಗತ್ಯವಿರುವ ಬಹುಪಾಲು ಆಟಗಾರರನ್ನು ಸಾಧ್ಯವಾದಷ್ಟು ಕಡಿಮೆ ಬೆಲೆಗೆ ಖರೀದಿಸುವ ಜಾಣತನ ತೋರಿಸಿದೆ.
ಡೆಲ್ಲಿ ಕ್ಯಾಪಿಟಲ್ಸ್ ಈಗಾಗಲೆ ರಿಷಭ್ ಪಂತ್ (16 ಕೋಟಿ), ಪೃಥ್ವಿ ಶಾ (7.5), ಎನ್ರಿಷ್ ನಾರ್ಕಿಯಾ(6.5) ಮತ್ತು ಅಕ್ಷರ್ ಪಟೇಲ್(9)ರನ್ನು ರಿಟೈನ್ ಮಾಡಿಕೊಂಡಿದೆ.
ಇನ್ನು ನಿನ್ನೆ ನಡೆದ ಹರಾಜಿನಲ್ಲಿ ಆಸ್ಟ್ರೇಲಿಯಾದ ಅನುಭವಿ ಆಟಗಾರ ಡೇವಿಡ್ ವಾರ್ನರ್ ಅವರನ್ನು 6.25 ಕೋಟಿ ರೂಗೆ ಮತ್ತು ಆಲ್ರೌಂಡರ್ ಮಿಚೆಲ್ ಮಾರ್ಷ್ರನ್ನು 6.5 ಕೋಟಿಗೆ ಖರೀದಿಸಿತು. ಆದರೆ ಶಾರ್ದೂಲ್ ಠಾಕೂರ್ ಅವರನ್ನು ಪೈಪೋಟಿ ನೀಡಿ 10.75 ಕೋಟಿ ರೂಗಳಿಗೆ ಖರೀದಿಸಿತು. ಠಾಕೂರ್ ಅವರ ಖರೀದಿ ವಿಚಾರದಲ್ಲಿ ಮಾತ್ರ ಫ್ರಾಂಚೈಸಿ ಹೆಚ್ಚಿನ ಹಣವನ್ನು ವ್ಯಯಿಸಿದ್ದು ಬಿಟ್ಟರೆ ಉಳಿದೆಲ್ಲಾ ಆಟಗಾರರನ್ನು ಸಸ್ತಾ ಬೆಲೆಗೆ ಖರೀದಿಸುವ ಮೂಲಕ ಈಗಾಗಲೆ ತಂಡವನ್ನು ನಿರ್ಧರಿಸುವಂತಹ ಮಟ್ಟಿಗೆ ತಂದುನಿಲ್ಲಿಸಿದೆ.
ಆರಂಭಿಕರಾಗಿ ಪೃಥ್ವಿ ಶಾ ಜೊತೆ ವಾರ್ನರ್ ಕಣಕ್ಕಿಳಿದರೆ, 3ನೇ ಕ್ರಮಾಂಕದಲ್ಲಿ ಮಿಚಲ್ ಮಾರ್ಷ್, ನಾಲ್ಕರಲ್ಲಿ ಭರತ್ ಅಥವಾ ರಿಷಭ್ ಪಂತ್ ನಂತರ ಸರ್ಫರಾಜ್ ಆಡಬಹುದು. ಬೌಲರ್ಗಳ ವಿಭಾಗ ಬಹುತೇಕ ಬಲಿಷ್ಠವಾಗಿದೆ. ನಾರ್ಕಿಯಾ ಜೊತೆಗೆ ಶಾರ್ದೂಲ್ ಠಾಕೂರ್, ಕುಲದೀಪ್ ಯಾದವ್, ನಾಗರಕೋಟಿ ಮತ್ತು ಮುಸ್ತಫಿಜುರ್ ರೆಹಮಾನ್ ಇದ್ದಾರೆ. ಡೆಲ್ಲಿ ಬಳಿ ಇನ್ನೂ 16 ಕೋಟಿ ರೂಗಳಿದ್ದು, 2ನೇದಿನ ಹರಾಜಿನಲ್ಲಿ ಮಧ್ಯಮ ಕ್ರಮಾಂಕಕ್ಕೆ ಒಂದಿಬ್ಬರು ಬ್ಯಾಟರ್ಗಳನ್ನು ಖರೀದಿಸಿದರೆ ಈ ಬಾರಿಯ ಐಪಿಎಲ್ನಲ್ಲಿ ಬಲಿಷ್ಠ ತಂಡವಾಗಿ ರೂಪುಗೊಳ್ಳಲಿದೆ.
ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಖರೀದಿಸಿದ ಆಟಗಾರರು:
- ಶಾರ್ದೂಲ್ ಠಾಕೂರ್ - ₹10,75,00,000
- ಡೇವಿಡ್ ವಾರ್ನರ್- ₹6,25,00,000
- ಮಿಚೆಲ್ ಮಾರ್ಷ್ - ₹6,50,00,000
- ಮುಸ್ತಫಿಜುರ್ ರೆಹಮಾನ್- ₹2,00,00,000
- ಕೆ.ಎಸ್. ಭಾರತ್- ₹2,00,00,000
- ಕುಲದೀಪ್ ಯಾದವ್ - ₹2,00,00,000
- ಕಮಲೇಶ್ ನಾಗರಕೋಟಿ - ₹1,10,00,000
- ಅಶ್ವಿನ್ ಹೆಬ್ಬಾರ್ - ₹20,00,000
- ಸರ್ಫರಾಜ್ ಖಾನ್-₹20,00,000
ಇದನ್ನೂ ಓದಿ:₹10 ಕೋಟಿಗೆ ಸೇಲ್... ಮೂಲ ಬೆಲೆಗಿಂತಲೂ 10 ಪಟ್ಟು ಅಧಿಕ ಪಡೆದ ಕನ್ನಡಿಗ ಪ್ರಸಿಧ್ ಕೃಷ್ಣ
