ನವದೆಹಲಿ: ಟಿ-20 ಕ್ರಿಕೆಟ್ ಜಗತ್ತಿನಲ್ಲಿ ಐಪಿಎಲ್ ದೊಡ್ಡ ಕ್ರಾಂತಿಯನ್ನೇ ಎಬ್ಬಿಸಿದೆ. 2007ರ ವಿಶ್ವಕಪ್ ನಂತರದ ವರ್ಷದಲ್ಲೇ ಆರಂಭವಾದ ಐಪಿಎಲ್ ಇದೀಗ ಎಲ್ಲ ಕ್ರಿಕೆಟ್ ಆಡುವ ರಾಷ್ಟ್ರಗಳಲ್ಲಿ ಕ್ರಿಕೆಟ್ ಲೀಗ್ಗಳ ಆರಂಭಕ್ಕೆ ದಾರಿ ದೀಪವಾಗಿದೆ. ಈ ಮೂಲಕ ವಿಶ್ವ ಯುವ ಕ್ರಿಕೆಟಿಗರಿಗೆ ತಮ್ಮ ಸಾಮರ್ಥ್ಯ ಸಾಬೀತುಪಡಿಸಲು ನೆರವಾಗಿದೆ.
ಮೊದಲ ಆವೃತ್ತಿಯಲ್ಲಿ ಕೆಕೆಆರ್ ಕೋಚ್ ಆಗಿದ್ದ ಪಾಕಿಸ್ತಾನದ ವಾಸಿಂ ಅಕ್ರಮ್ ಇದೀಗ ಚೊಚ್ಚಲ ಲಂಕಾದ ಪ್ರೀಮಿಯರ್ ಲೀಗ್ನಲ್ಲೂ ತಮ್ಮ ಅನುಭವನ್ನು ಹಂಚಲು ಕಾತುರರಾಗಿದ್ದಾರೆ. ಸುಲ್ತಾನ್ ಆಫ್ ಸ್ವಿಂಗ್ ಎಂದೇ ಖ್ಯಾತರಾಗಿರುವ ಅಕ್ರಂ ಎಲ್ಪಿಎಲ್ನಲ್ಲೂ ಕೋಚ್ ಆಗಿ ಕಾರ್ಯನಿರ್ವಹಿಸಲಿದ್ದಾರೆ.
ಈ ಸಂದರ್ಭದಲ್ಲಿ ಮಾತನಾಡಿರುವ ಅವರು ಟಿ-20 ಕ್ರಿಕೆಟ್ ವಿಶ್ವದಾದ್ಯಂತ ಇರುವ ಯುವ ಕ್ರಿಕೆಟಿಗರಿಗೆ ಅದ್ಭುತ ವೇದಿಕೆ ಕಲ್ಪಿಸಿಕೊಡುತ್ತಿದೆ. ಇದರಿಂದ ಕ್ರಿಕೆಟ್ ವೇಗವಾಗಿ ಬೆಳೆಯುವಂತಾಗಿದೆ. ಬ್ಯಾಟ್ಸ್ಮನ್ಗಳು ವೇಗವಾಗಿ ರನ್ಗಳಿಸುತ್ತಿದ್ದರೆ, ಬೌಲರ್ಗಳು ತುಂಬಾ ನವೀನ ಮಾದರಿಯಲ್ಲಿ ಬೌಲಿಂಗ್ ಮಾಡಲು ಶುರುಮಾಡಿದ್ದಾರೆ. ಅಲ್ಲದೇ ಫೀಲ್ಡಿಂಗ್ನಲ್ಲೂ ಅದ್ಭುತ ಬದಲಾವಣೆಗಳು ಕಂಡು ಬರುತ್ತಿವೆ ಎಂದಿದ್ದಾರೆ.
ಟಿ-20 ಕ್ರಿಕೆಟ್ನ ಪ್ರಭಾವದಿಂದ ಟೆಸ್ಟ್ ಕ್ರಿಕೆಟ್ನಲ್ಲೂ ಹಿಂದಿಗಿಂತಲೂ ಪ್ರಸ್ತುತ ಹೆಚ್ಚಿನ ಫಲಿತಾಂಶಗಳನ್ನು ಕಾಣುತ್ತಿದ್ದೇವೆ. ಇದು ಆಟಕ್ಕೆ ಉತ್ತಮ ಸಂಕೇತವಾಗಿದೆ. ನೀವು ವಿವಿಧ ದೇಶದ ಆಟಗಾರರೊಂದಿಗೆ ಕ್ರಿಕೆಟ್ ಆಡುವಾಗ, ವಿವಿಧ ರೀತಿಯ ವಿಕೆಟ್ನಲ್ಲಿ ಹಲವು ವೈವಿಧ್ಯಮಯ ಬೌಲರ್ಗಳ ದಾಳಿಯನ್ನು ಎದುರಿಸುತ್ತೀರಾ. ಇದರಿಂದ ನಿಮ್ಮ ಆಟ ತುಂಬಾ ಸುಧಾರಣೆ ಕಾಣುತ್ತದೆ. ಅದನ್ನ ಈಗಾಗಲೆ ವಿಶ್ವದ ಎಲ್ಲಾ ಟಿ-20 ಲೀಗ್ಗಳಲ್ಲೂ ನಾವು ನೋಡುತ್ತಿದ್ದೇವೆ ಎಂದು ಅಕ್ರಮ್ ತಿಳಿಸಿದ್ದಾರೆ.
ಪಾಕಿಸ್ತಾನದ ಲೆಜೆಂಡ್ ಭವಿಷ್ಯದಲ್ಲಿ ಪಾಕಿಸ್ತಾನ ಹಾಗೂ ಭಾರತ ತಂಡದ ಆಟಗಾರರು ಐಪಿಎಲ್ ಮತ್ತು ಪಿಎಸ್ಎಲ್ನ ಭಾಗವಾಗಬೇಕೆಂದು ಬಯಸಿದ್ದಾರೆ.
ಸ್ಪೋರ್ಟ್ಸ್ ರಾಜಕಾರಣಕ್ಕೆ ಬಲಿಯಾಗಬಾರದು ಎಂದು ನಾನು ಯಾವಾಗಲು ನಂಬಿದ್ದೇನೆ. ಆದರೆ, ಇದು ಎರಡು ದೇಶಗಳ ಸರ್ಕಾರದ ವಿಷಯವಾಗಿದೆ. ಇದರ ಬಗ್ಗೆ ನಾನು ಏನನ್ನು ಹೇಳುವುದು ಸೂಕ್ತವಲ್ಲ. ಆದರೆ, ಐಪಿಎಲ್ ವಿಶ್ವದ ಸ್ಪರ್ಧಾತ್ಮಕ ದೇಶೀಯ ಲೀಗ್ಗಳಲ್ಲಿ ಅತ್ಯಂತ ಪ್ರಸಿದ್ಧವಾದ್ದಾಗಿದೆ. ಈ ಲೀಗ್ನಲ್ಲಿ ಪಾಕಿಸ್ತಾನದ ಯುವ ಆಟಗಾರರು ಭಾಗವಾಗಬೇಕು ಎಂದು ನಾನು ಬಯಸುತ್ತೇನೆ. ಹಾಗೂ ಭಾರತೀಯ ಆಟಗಾರರನ್ನು ಪಾಕಿಸ್ತಾನ ಪ್ರೀಮಿಯರ್ ಲೀಗ್ನಲ್ಲಿ ನೋಡಲು ಬಯಸುತ್ತೇನೆ ಎಂದು ಅವರು ಹೇಳಿದ್ದಾರೆ.
