ಬೆಂಗಳೂರು:ಕರ್ನಾಟಕ ರಣಜಿ ತಂಡದ ನಾಯಕ ಕರುಣ್ ನಾಯರ್ ಜನವರಿ 16ರಂದು ಗೃಹಸ್ಥಾಶ್ರಮಕ್ಕೆ ಕಾಲಿಡಲಿರುವುದರಿಂದ ಸೌರಾಷ್ಟ್ರದ ವಿರುದ್ಧ ರಣಜಿ ಪಂದ್ಯದಿಂದ ಹೊರಗುಳಿಯಲಿದ್ದಾರೆ.
ಮುಂಬೈ ವಿರುದ್ಧ ಭರ್ಜರಿ ಜಯ ಸಾಧಿಸಿದ ಕರ್ನಾಟಕ ತಂಡ ಮುಂದಿನ ಪಂದ್ಯದಲ್ಲಿ ಸೌರಾಷ್ಟ್ರ ವಿರುದ್ಧ ಸೆಣಸಲಿದೆ. ನಾಯಕ ಕರುಣ್ ನಾಯರ್ ವಿವಾಹದ ಕಾರಣದಿಂದ ತಂಡದಿಂದ ಹೊರಗುಳಿದರೆ, ತಂಡದಿಂದ ಅಭಿಷೇಕ್ ರೆಡ್ಡಿ ಕೈಬಿಡಲಾಗಿದೆ.
ಇವರಿಬ್ಬರ ಜಾಗಕ್ಕೆ ಬದಲಿ ಆಟಗಾರರನ್ನು ಈಗಾಗಲೇ ಕೆಎಸ್ಸಿಎ ಘೋಷಣೆ ಮಾಡಿದ್ದು, ಕೆ ವಿ ಸಿದ್ದಾರ್ಥ್ ಹಾಗೂ ಗಾಯದಿಂದ ಚೇತರಿಸಿರುವ ಪವನ್ ದೇಶಪಾಂಡೆ ಸೌರಾಷ್ಟ್ರ ವಿರುದ್ಧ ಕಣಕ್ಕಿಳಿಯಲಿದ್ದಾರೆ.
ಈಗಾಗಲೇ ಮನೀಷ್ ಪಾಂಡೆ, ರಾಹುಲ್ ರಾಷ್ಟ್ರೀಯ ತಂಡದ ಪರ ಆಯ್ಕೆಯಾಗಿರುವುದುರಿಂದ ರಣಜಿ ತಂಡದಿಂದ ಹೊರಗುಳಿದಿದ್ದಾರೆ. ಮಯಾಂಕ್ ಇಂಡಿಯಾ ಎ ತಂಡದ ಪ್ರವಾಸಕ್ಕಾಗಿ ವಿಶ್ರಾಂತಿಯಲ್ಲಿದ್ದಾರೆ. ಇದೀಗ ಕರುಣ್ ಕೂಡ ಹೊರಗುಳಿಯಲಿರುವುದು ತಂಡಕ್ಕೆ ಹಿನ್ನಡೆಯಾಗಿದೆ.
ಸ್ಟಾರ್ ಆಟಗಾರರ ಅನುಪಸ್ಥಿತಿಯಲ್ಲಿ ಶ್ರೇಯಸ್ ಗೋಪಾಲ್ ತಂಡವನ್ನು ಮುನ್ನಡೆಸಲಿದ್ದಾರೆ. ಯುವ ಸ್ಫೋಟಕ ಬ್ಯಾಟ್ಸ್ಮನ್ ದೇವದತ್ ಪಡಿಕ್ಕಲ್, ಕಳೆದ ಪಂದ್ಯದ ಹೀರೋ ಸಮರ್ಥ್ ಕರ್ನಾಟಕದ ಟ್ರಂಪ್ ಕಾರ್ಡ್ ಆಗಲಿದ್ದಾರೆ.
ಸೌರಾಷ್ಟ್ರ ವಿರುದ್ಧದ ಪಂದ್ಯ ಜನವರಿ 11ರಿಂದ 14ರವರೆಗೆ ರಾಜ್ಕೋಟ್ನಲ್ಲಿ ನಡೆಯಲಿದೆ.
