ಮ್ಯಾಂಚೆಸ್ಟರ್: ಇಂಗ್ಲೆಂಡ್ ವಿರುದ್ಧದ ಮೊದಲ ಪಂದ್ಯದಲ್ಲಿ ಪಾಕಿಸ್ತಾನ ತಂಡ 3 ವಿಕೆಟ್ಗಳ ಸೋಲು ಕಂಡು ನಿರಾಶೆ ಅನುಭವಿಸಿದೆ. 107 ರನ್ಗಳ ಮುನ್ನಡೆ ಪಡೆದರೂ ಪಾಕ್ ತಂಡ ಸೋತಿರುವುದಕ್ಕೆ ನಾಯಕ ಅಜರ್ ಅಲಿ ಕಾರಣ ಎಂದು ಪಾಕಿಸ್ತಾನದ ಮಾಜಿ ನಾಯಕ ವಾಸೀಮ್ ಅಕ್ರಮ್ ದೂಷಿಸಿದ್ದಾರೆ.
ಪಾಕಿಸ್ತಾನ ನೀಡಿದ್ದ 277 ರನ್ಗಳ ಗುರಿ ಬೆನ್ನತ್ತಿದ್ದ ಇಂಗ್ಲೆಂಡ್ 117 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡು ಆಘಾತ ಅನುಭವಿಸಿತ್ತು. ಆದರೆ ಬಟ್ಲರ್ (75) ಹಾಗೂ ಕ್ರಿಸ್ ವೋಕ್ಸ್ (84) ಭರ್ಜರಿ ಅರ್ಧಶತಕದ ನೆರವಿನಿಂದ ಇಂಗ್ಲೆಂಡ್ ತಂಡ ಇನ್ನೂ ಒಂದು ದಿನವಿರುವಂತೆ ಗೆಲುವು ಸಾಧಿಸಿ ಸರಣಿಯಲ್ಲಿ 1-0 ಮುನ್ನಡೆ ಸಾಧಿಸಿತು.
ಸೋಲಿನ ಬಳಿಕ ಮಾತನಾಡಿದ ವಾಸೀಮ್ ಅಕ್ರಮ್, ಕ್ರಿಸ್ ವೋಕ್ಸ್ರನ್ನು ನಮ್ಮ ತಂಡದ ಆಟಗಾರರು ಲಘುವಾಗಿ ಪರಿಗಣಿಸಿದ್ದೇ ಅಚ್ಚರಿಯ ಸೋಲಿಗೆ ಕಾರಣ ಎಂದಿದ್ದಾರೆ.
ಈ ಸೋಲು ಪಾಕ್ ತಂಡಕ್ಕೆ ಮತ್ತು ಅಭಿಮಾನಿಗಳಿಗೆ ಬಹಳ ನೋವನ್ನುಂಟು ಮಾಡಿದೆ. ಕ್ರಿಕೆಟ್ನಲ್ಲಿ ಸೋಲು-ಗೆಲುವು ಸಾಮಾನ್ಯ. ಆದರೆ, ಇಲ್ಲಿ ನಮ್ಮ ಸೋಲಿಗೆ ನಾಯಕನ ತಂತ್ರಗಾರಿಕೆಯ ವೈಫಲ್ಯವೇ ಕಾರಣ. ಅಜರ್ ಅಲಿ ನಿರ್ಣಾಯಕ ಹಂತದಲ್ಲಿ ಸೂಕ್ತ ನಿರ್ಧಾರ ತೆಗೆದುಕೊಳ್ಳುವಲ್ಲಿ ಹಲವು ಬಾರಿ ವಿಫಲರಾದರು ಎಂದಿದ್ದಾರೆ.
ಕ್ರಿಸ್ ವೋಕ್ಸ್ ಬ್ಯಾಟಿಂಗ್‌ಗೆ ಬಂದಾಗ ಬೌನ್ಸ್ ಮತ್ತು ಶಾರ್ಟ್ಪಿಚ್ ಎಸೆತಗಳು ಕಾಣಿಸಲಿಲ್ಲ. ಅವರು ಸುಲಭವಾಗಿ ರನ್ ಗಳಿಸಿದರು. ವಿಕೆಟ್ಗಾಗಿ ಹೆಚ್ಚು ಸ್ಪಿನ್ ಬೌಲರ್ಗಳನ್ನು ಬಳಸಿದರು. ನನ್ನ ಪ್ರಕಾರ, ವೋಕ್ಸ್ ಬ್ಯಾಟಿಂಗಿಳಿದಾಗ ಹೆಚ್ಚು ವೇಗಿಗಳಿಂದ ಬೌಲಿಂಗ್ ಮಾಡಿಸಬೇಕಿತ್ತು. ಬೌಲರ್ಗಳ ವೈಫಲ್ಯವನ್ನು ಬಳಸಿಕೊಂಡ ಬಟ್ಲರ್-ವೋಕ್ಸ್ ಜೋಡಿ ಪಾಕ್ ಕೈಯಲ್ಲಿದ್ದ ಗೆಲುವನ್ನು ಕಸಿದುಕೊಂಡಿತು ಎಂದು ಅಕ್ರಮ್ ತಮ್ಮ ತಂಡದ ಸೋಲಿಗೆ ಕಾರಣ ತಿಳಿಸಿದ್ದಾರೆ.
ಇಂಗ್ಲೆಂಡ್ ತಂಡ ವಿಶ್ವ ಚಾಂಪಿಯನ್ ಭಾಗವಾಗಿರುವ ಈ ಟೆಸ್ಟ್ ಸರಣಿಯನ್ನು 1-0ಯಲ್ಲಿ ಮುನ್ನಡೆ ಸಾಧಿಸಿದೆ. ಎರಡು ತಂಡಗಳ ನಡುವಿನ ಮುಂದಿನ ಪಂದ್ಯ ಆಗಸ್ಟ್ 13ರಿಂದ ಸೌತಾಂಪ್ಟನ್ನಲ್ಲಿ ನಡೆಯಲಿದೆ.
