ಸೌತಾಂಪ್ಟನ್: ಟೆಸ್ಟ್ ಕ್ರಿಕೆಟ್ನಲ್ಲಿ 600 ವಿಕೆಟ್ ಪಡೆದ ವಿಶ್ವದಾಖಲೆ ಬರೆದ ಬೆನ್ನಲ್ಲೇ ಜೇಮ್ಸ್ ಆ್ಯಂಡರ್ಸನ್ ದೀರ್ಘಾವಧಿಯ ಕ್ರಿಕೆಟ್ನಲ್ಲಿ 700 ವಿಕೆಟ್ ಪಡೆಯುವ ಮಹತ್ವಾಕಾಂಕ್ಷೆ ವ್ಯಕ್ತಪಡಿಸಿದ್ದಾರೆ.
ಮಂಗಳವಾರ ಅಂತ್ಯಗೊಂಡ ಪಾಕಿಸ್ತಾನದ ವಿರುದ್ಧದ ಕೊನೆಯ ಟೆಸ್ಟ್ನ ಅಂತಿಮ ದಿನ ಪಾಕ್ ನಾಯಕ ಅಜರ್ ಅಲಿ ವಿಕೆಟ್ ಪಡೆಯುವ ಮೂಲಕ ಟೆಸ್ಟ್ ಕ್ರಿಕೆಟ್ನಲ್ಲಿ 600 ವಿಕೆಟ್ಗಳ ಮೈಲಿಗಲ್ಲನ್ನು ದಾಟಿದ ಮೊದಲ ವೇಗದ ಬೌಲರ್ ಎಂಬ ದಾಖಲೆಗೆ ಆ್ಯಂಡರ್ಸನ್ ಪಾತ್ರರಾದರು. ಈ ಮೂಲಕ ಈ ಸಾಧನೆ ಮಾಡಿದ ವಿಶ್ವದ ನಾಲ್ಕನೇ ಬೌಲರ್ ಎನಿಸಿಕೊಂಡರು. ಇವರಿಗೂ ಮೊದಲು ಶ್ರೀಲಂಕಾದ ಮುತ್ತಯ್ಯ ಮುರಳೀದರನ್(800), ಆಸ್ಟ್ರೇಲಿಯಾದ ಶೇನ್ ವಾರ್ನ್(708) ಹಾಗೂ ಭಾರತದ ಅನಿಲ್ ಕುಂಬ್ಳೆ(619) ವಿಕೆಟ್ ಪಡೆದಿದ್ದಾರೆ.
ಪಂದ್ಯ ಡ್ರಾ ಆದ ನಂತರ ಮಾಧ್ಯಮಗಳೊಂದಿಗೆ ಮಾತನಾಡಿದ ಜೇಮ್ಸ್ ಆ್ಯಂಡರ್ಸನ್, ತಾವು ಟೆಸ್ಟ್ ಕ್ರಿಕೆಟ್ನಲ್ಲಿ 700 ವಿಕೆಟ್ ಪಡೆಯುವ ಆಸೆ ಹೊಂದಿರುವುದಾಗಿ ಹೇಳಿಕೊಂಡಿದ್ದಾರೆ.
ನಾನು ಈಗಾಗಲೇ ಈ ಕುರಿತು ಜೋ ರೂಟ್ ಜೊತೆ ಸಣ್ಣ ಮಾತುಕತೆ ನಡೆಸಿದ್ದೇನೆ. ಅವರು ನನ್ನನ್ನು ಮುಂದಿನ ಆಸ್ಟ್ರೇಲಿಯಾ ವಿರುದ್ಧದ ಆ್ಯಶಸ್ ಸರಣಿಯಲ್ಲಿ ಇಂಗ್ಲೆಂಡ್ ತಂಡದಲ್ಲಿ ಇರಲು ಬಯಸಿದ್ದಾರೆ. ನನ್ನ ಕೈಯಲ್ಲಿ ಆಗುವುದಿಲ್ಲ ಎನ್ನುವುದಕ್ಕೆ ಯಾವುದೇ ಕಾರಣವಿಲ್ಲ. ನನ್ನ ಎಲ್ಲಾ ಸಮಯದಲ್ಲೂ ಫಿಟ್ನೆಸ್ಗಾಗಿ ಕಠಿಣವಾಗಿರುತ್ತೇನೆ. ಆಟದಲ್ಲೂ ಹೆಚ್ಚು ಶ್ರಮಿಸುತ್ತಿದ್ದೇನೆ ಎಂದು ಆ್ಯಂಡರ್ಸನ್ ಹೇಳಿದ್ದಾರೆ.
ನಾನು ಈ ಸಮ್ಮರ್ನಲ್ಲಿ ಇಷ್ಟಪಟ್ಟಂತೆ ಬೌಲಿಂಗ್ ಮಾಡಲಿಲ್ಲ. ಆದರೆ ಈ ಟೆಸ್ಟ್ನಲ್ಲಿ ನನ್ನ ಆಶಯದ ಮೇಲೆ ಇದ್ದೆ ಮತ್ತು ತಂಡ ಬಯಸಿದ್ದನ್ನು ನಾನು ನೀಡಿದ್ದೇನೆ ಎಂದು ಭಾವಿಸುತ್ತೇನೆ. ಅದೇ ರೀತಿ ಭಾವಿಸುತ್ತಾ ಮುಂದುವರೆಯುತ್ತೇನೆ. ಇಂಗ್ಲೆಂಡ್ ಕ್ರಿಕೆಟಿಗನಾಗಿ ನನ್ನ ಕೊನೆಯ ಟೆಸ್ಟ್ ಪಂದ್ಯಗಳನ್ನು ಗೆದ್ದಿದ್ದೇನೆ ಎಂದು ನಾನು ಭಾವಿಸುವುದಿಲ್ಲ. ಹಾಗಾಗಿ ನಾನು 700 ವಿಕೆಟ್ ತಲುಪಬಹುದಲ್ಲವೇ? ಏಕೆ ಆಗಲ್ಲ? ಎಂದು ಪ್ರಶ್ನಿಸಿದ್ದಾರೆ.
ನಾವು ಇನ್ನೂ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿದ್ದೇವೆ. ನಮ್ಮ ಮುಂದೆ ಇನ್ನೂ ಅನೇಕ ಟೆಸ್ಟ್ ಸರಣಿಗಳಿವೆ. ಗೆಲ್ಲಲು ಸಾಕಷ್ಟು ಪಂದ್ಯಗಳಿವೆ. ನನಗೂ ನಿಜವಾಗಿಯೂ ಆಸಕ್ತಿಯಿದೆ. ಅದಕ್ಕಾಗಿ ಪ್ರತಿ ದಿನವೂ ತರಬೇತಿ ಪಡೆಯಲಿದ್ದೇನೆ. ಡ್ರೆಸ್ಸಿಂಗ್ ರೂಮ್ ಹುಡುಗರೊಂದಿಗೆ ಇಂಗ್ಲೆಂಡ್ ತಂಡಕ್ಕಾಗಿ ಗೆಲುವು ತಂದು ಕೊಡಲು ಪ್ರಯತ್ನಿಸುವೆ ಎಂದು ತಾವು ಇನ್ನೂ ಒಂದೆರಡು ವರ್ಷ ಆಡುವ ಬಯಕೆಯನ್ನು ವ್ಯಕ್ತಪಡಿಸಿದ್ದು, ಈ ವೇಳೆ 700 ವಿಕೆಟ್ ಸಾಧನೆ ಮಾಡಲು ಅವಕಾಶವಿದೆ ಎಂದಿದ್ದಾರೆ.
